« bullarium-franciscanum-3887 »

Venerabili fratri ‥ episcopo Abrincensi.

Significarunt nobis dilecti filii Petrus de Soeriis et socii sui, mercatores burgenses de Manso Condomiensis dioecesis, quod dudum ipsi tunc in Britania existentes, mille octingentas et quinquaginta quinque libras Turonensium parvorum, quas cum magnis laboribus, sudoribus et periculis de vino et aliis mercimoniis suis acquisiverunt quasque, timentes commotionem guerrarum, pro maiori securitate ipsorum apud villam Dinaea Macloviensis dioecesis, sub dominio dilecti filii nobilis viri ‥ ducis Britaniae constitutam, penes dilectos filios fratres ordinis Minorum loci eiusdem villae in eorum dormitorio in quadam archa sub firma clausura ferrea duxerunt fiducialiter deponendas; quodque dicti mercatores post aliquos dies redeuntes ad locum dictorum fratrum, ubi fecerant depositum supradictum, invenerunt dictam archam fractam et vacuam et praedictam pecuniam ex ea subtractam nequiter extitisse, et quod eis propter hoc conquerentibus guardiano et fratribus dicti loci illi responderunt, se nescire dicti maleficii patratores. Quare praefati mercatores nobis humiliter supplicarunt, ut providere eis super hoc de opportuno remedio dignaremur. Nos igitur attendentes, huiusmodi furtum et maleficium in dicto loco commissum censendum sacrilegum et sacrilegos dicti maleficii patratores, ac propterea nolentes illud sub dissimulatione transire, fraternitati tuae per apostolica scripta mandamus, quatenus per te vel alium seu alios (simpliciter, summarie et de plano, sine strepitu et figura iudicii) de praemissis inquirere studeas diligentius veritatem, et quoscunque repereris in dicto sacrilegio culpabiles extitisse, eos ad restituendum dictam pecuniam mercatoribus praelibatis et satisfaciendum eis de expensis et damnis, quae praeterea incurrerunt, prout iustum fuerit, per censuram ecclesiasticam appellatione remota compellas etc. Datum Avinione, XI kal. decembris, anno decimo.