« bullarium-franciscanum-3721 »

Dilectis filiis ‥ abbati monasterii sancti Proculi Bononiensis et magistro Ioanni de Regio, camerae nostrae clerico, praeposito Parmensis, et Andreae de Galluciis canonico Bononiensis ecclesiarum.

Cum, sicut accepimus, dilecta in Christo filia Blansafloris nata dilecti filii nobilis viri Guroni de Garisendis, puella litterata, cupiat in monasterio monialium sancti Francisci Bononiensi ordinis sanctae Clarae sub regulari habitu Domino famulari, nos volentes eandem puellam in huiusmodi suo laudabili proposito confovere, discretioni vestrae per apostolica scripta mandamus, quatenus vos vel duo aut unus vestrum per vos vel alium seu alios praefatam puellam, si sit idonea et aliud canonicum non obsistat, in dicto monasterio auctoritate nostra recipi faciatis in monacham et sororem, sibique iuxta monasterii et ordinis praedictorum consuetudinem regularem habitum exhiberi et sincera in Domino caritate tractari. Non obstantibus de certo monialium numero, si ibidem etc. Datum Avinione, IV idus maii, anno quinto.