Général
-
Clément V (1305-1314)
-
Les podestat, abbé, gouverneurs, conseil et commune de Gênes
-
Le maître et la communauté de l'Hôpital Saint-Jean de Jérusalem
-
VI kalendas decembris, anno septimo
-
-
Vienne
-
Mandement (littere cum filo canapis)
-
[Registre de la chancellerie apostolique] R. CITÉ DU VATICAN, Archivio apostolico Vaticano, Registra Vaticana 59, ep. 10, fol. 2b.
-
Ici reprise de Regestum Clementis papae quinti, Rome : Typographia Vaticana, 1884-1892, n. 7631.
-
?
-
n. c.
-
Mandatur infrascriptis, ut quosdam concives suos compellant ad restituenda bona fratribus Hospitalis s. Iohannis Hierosolymitani ablata [Regestum].
-
Dilectis filiis.. potestati, .. abbati, gubernatoribus, consilio et communi Ianuen.
Non immerito gravem nostris auribus et molestam dilecti filii.. magistri et conventus hospitalis sancti Iohannis Ierosolimitani querelam nuper accepimus continentem, quod quidam cives Ianuen., summi Regis timore postposito, et christiane religionis veritate despecta, spretisque sacris et antiquis conciliis et prohibitionibus apostolice Sedis, tam per nos, quam diversos predecessores nostros, Romanos pontifices, contra deferentes ad partes Egypti et Alexandrie terras, hosti publico et persecutori notorio fidei orthodoxe subiectas, qui una cum incolis earundem, Terram sanctam, patrimonium Crucifixi, in obprobrium omnium qui crucem adorant, impie detinet et abhominabili, prothdolor ! feditate conculcat, victualia seu ferrum, lignamina ad galeas et balistas faciendas, arma et alias res vetitas, quibus catholica fides eiusque cultores, non absque Redemptoris nostri iniuria, graviter impugnantur, habitis et etiam repetitis, ac penis adiectis et impositis in eisdem omnino contemptis, tanquam proprie salutis immemores, deferre dampnabili temeritate presumunt1, et inter alios huiusmodi vetita deferentes, contigit noviter per galeas hospitalis eiusdem, pro debilitatione virium hostium fidei memorate, ad nostra principaliter et hospitalis ipsius et que de fidelium elemosinis colligi et haberi possunt stipendia, iuxta nostram et ipsius Sedis dispositionem specialiter deputatas, quamdam galeam cum certis mercimoniis repertam in mari, iuxta ordinationem conciliorum predictorum et prohibitiones easdem eiusque sedis canones detineri; propter quod vos ad magistrum et conventum predictos, Antonium Spinulam, civem Ianuen. nuntium et ambasciatorem vestrum cum litteris vestris, ad repetendum prefatam galeam cum eisdem mercimoniis vel ipsorum extimatione, specialiter transmisistis.
Verum prefati magister et conventus, eiusdem ambasciatoris petitione super hoc diligenter audita et subsequenter deliberato consilio, ipsi ambassiatori oretenus responderunt, ac vobis etiam per suas volebant litteras, quas ei obtulerant, respondere, videlicet quod restitutionem vel satisfactionem huiusmodi, de rebus tam iuste ac legitime occupatis, sine nostro et dicte sedis speciali mandato facere non poterant nec audebant, sed per suos ambassiatores vobis super hoc, in brevi taliter responderent, quod possetis exinde ac deberetis merito contentari. Idem vero Antonius responsione huiusmodi non contentus, dictisque litteris non receptis, immo potius conceptam nequitiam, ausu nephario producens in actum, ad Turchie partes cum Symone de Auria, Barnabone de Savignono, et Antonio Archantonis civibus Ianuen., patronis quarundam galearum, quas ibidem habebant, transfretare immediate presumpsit et quendam Sarracenum de partibus illis, Madachiam nomine, multa vallatum potentia, adeo graviter suis pravis suggestionibus incitavit, quod diversos mercatores et nonnullos alios, circa ducentorum quinquaginta numerum, de insula Rodi, qui cum suis navigabilibus vasis, ad easdem partes Turchie, pro victualibus et animalibus ad insulam deferendis eandem, et etiam deducendis accesserant, in grave detrimentum hospitalis eiusdem ac fidei et insule predictarum enorme dispendium, capi fecit et nequiter detineri, et quod detestabilius est auditu, quantumvis tam infesto relatui nostre credulitatis inclinare nequeamus auditum, eidem Madachie quinquaginta milia florenorum auri, prout fuerat eidem magistro relatum, pro certa quantitate gentis per ipsum Madachiam ad dictam insulam et fidelium populos residentium in eadem, una cum eo qui potest, imperio Romanie et aliis partium illarum scismaticis invadendum; ipsamque redigendum in orridam et abhominabilem dictorum infidelium servitutem, ac magistrum eundem et fratres hospitalis eiusdem inde radicitus extirpandos, habenda, vestro nomine, promiserunt; et adhuc patroni galearum ipsarum tam orrendis non contenti sceleribus, immo potius in graviorem divine maiestatis offensam prorumpere non verentes, quam plures fratres et homines, qui cum certis vasis navigabilibus, ac diversis bonis et rebus hospitalis eiusdem ad eandem insulam pro tuitione et munitione ipsius et substentatione custodum eiusdem, que per eosdem magistrum et fratres cum nostro et eiusdem sedis favore, non absque gravium expensarum oneribus et multarum personarum periculis erepta noviter extitit de faucibus impiorum, et in augmentum eiusdem fidei viriliter acquisita, queve pro tuitione Terre prefate, multipliciter, propter sui dispositionem habetur accomoda et pro recuperatione ipsius opportuna multipliciter, deferebant, tunc repertos in mari capere presumpserunt, ipsosque et nonnullos milites et fratres alios hospitalis eiusdem, quos in manibus eorum adversitas premens inclusit, privato, illicito ac temerario carceri manciparunt eos ad proprie redemptionis incomoda, nephandis ausibus compellendo, et alias publice vocis comminando terroribus, quod dampnis et iniuriis huiusmodi non contenti, quam citius congruum navigandi tempus advenerit, quoscumque et quotcumque de fratribus memoratis in mari reperire poterunt et habere, seve morti tradere eorumque invadere bona, quousque illos evulserint de insula supradicta, radicitus, non cessabunt.
Et licet dilecti filii .. Urbis et .. Lombardie priores hospitalis eiusdem de mandato magistri et conventus predictorum, vobis expositis premissis omnibus diligenter, super ipsis, hospitalis eiusdem, ac fidei et Terre sancte predictarum indempnitatibus, per vos modis et viis congruis exquisitis, utiliter provideri, cum instantia postulassent, a vobis tamen, quod mirantes audivimus, quodque multipliciter derogat, si diligenter advertitis, antique vestre devotionis honoribus, non potuerunt super hiis responsionem aliquam, quamvis illam, per unius mensis expectassent spatium, obtinere ; sicque priores ipsi ad nos et apostolicam sedem, tanquam ad refugium singulare, coacti sunt habere recursum ac super hiis nostrum et eiusdem sedis remedium implorare. Nos igitur, qui vos inter alios devotos matris ecclesie, tanquam peculiares filios, brachiis paterne dilectionis astringimus, nolentes pro vestro et vestre civitatis honore, tam detestandos errores, si predictis veritas suffragatur, prout etiam nec debemus, sub dissimulatione transire, quin, oculis vestris instantia paterne sollicitudinis et hortationis apertis, vos ab inviis ad viam rectitudinis reducamus et circa premissa, prout tam horrendorum excessuum, que gravia trahunt secum pericula, qualitas exigit, adhibeamus remedia oportuna, universitatem vestram attente requirimus et hortamur in filio dei patris, quatenus contra presumptores huiusmodi, sic oportunum et salubre remedium, prout expedit, predictis fratribus et hominibus aliis libere ac sine redemptione et exactione qualibet relaxatis, omnibusque rebus et bonis integraliter restitutis eisdem, celeriter apponatis, quod Salvatoris nostri et eiusdem catholice fidei ac dicte Sedis et nostre reverentie satisfiat, dictique transgressores ex huiusmodi enormitatibus debite corrigantur, a similibus in futurum prorsus abstineant et agere talia non presumant, et huiusmodi correctionis exemplo omnibus tollatur audacia et via precludatur omnimode similia presumendi, et nichilominus contra omnes et singulos de civitate vestra, cuiuscumque conditionis existant, [qui] super confederatione seu coniuratione cum eisdem scismaticis vel quibuscumque aliis inimicis eiusdem fidei facienda, verbum movere presumpserint, quod solum dicere summum nefas est et auditu terribile, taliter procedatis, quod eiusdem fidei vos ostendatis zelatores fervidos per effectum nosque ac sedem predictam non oporteat super hiis alia cogitare remedia, qui tam detestabiles enormitates facinorum, tamque pernitiosum totius christianitatis obprobrium, sub dissimulatione transire aliquatenus non possemus.
Recolimus insuper, quod dudum in primis nostre promotionis auspiciis ad culmen apostolice dignitatis, nonnulla licita et laudanda statuta, que in vestris asserebatis capitulariis contineri, a vobis pro divini nominis ac fidei et sedis predicte reverentia et honore facta provide contra eos, qui in Alexandriam et terras Egipti predictas, cum vetitis antedictis accederent, nostro apostolatui transmisistis, quibus coram nobis et fratribus nostris lectis, non absque gratificationis et devotionis multe preconiis ea consideravimus diligenter ; que dum ad presens in animo recensemus, non indigne cogimur admirari, si adversus transgressores statutorum huiusmodi, debito modo, iuxta formam ipsorum et canonicas procedere negligitis sanctiones, cum parum sit condere in civitate statuta, nisi sit, qui ea per executionem debitam tueatur. Potest etiam circumspectionis vestre prudentia diligenter advertere, quod negligentia talis in tam enormibus casibus tolerari non debet, sed favor quilibet, qui tam notoriis transgressoribus directe vel indirecte quomodolibet preberetur, eo gravius dinoscitur arguendus, quo per hoc amplius Redemptoris nostri benignitas provocatur.
Preterea, ut vobis super hiis mentis nostre propositum clarius innotescat, ecce quod dilectum filium magistrum Buxolum de Parma, canonicum Tornacen. capellanum nostrum, latorem presentium ad vos propter hoc duximus specialiter destinandum, cui super hiis, que circa premissa vobis ex parte nostra retulerit, plenam fidem adhibere velitis et illa cum efficatia liberaliter adimplere.
Datum Vienne, VI kalendas decembris, anno septimo. -
(a) ?
-
(b) ?
-
(c) ?
-
(d) ?
-
(e) ?
-
(f) ?
-
1. Sapienter agebant Romani pontifices in urbes praecipue maritimas saevientes, quae turpis quaestus avidae, hostibus christiani nominis arma praebebant [Regestum].
-
2. ?
-
3. ?
-
4. n. c.
-
n. c.
Informations
Acte
Julien
Théry
(CIHAM (UMR 5648)), dans
APOSCRIPTA database
APOSCRIPTA database – Lettres des papes, dir. J. Théry, CIHAM/UMR 5648, éd. électronique TELMA (IRHT), Orléans, 2017 [en ligne], acte n. 192968 (aposcripta-40708), http://telma.irht.cnrs.fr/chartes/aposcripta/notice/192968 (mise à jour : 23/06/2024).