« Testament d'Isabeau de Bavière, reine de France (1408) »
Document | actes-des-femmes-de-pouvoir/notice/193196
Description
-
-
testament
Description de l'acte
Sceau
-
non
Analyses
-
Testament d'Isabeau de Bavière, reine de France (acte de 1408). D'autres testaments et codicilles suivront.
Texte
-
(Texte lacunaire au début de l'acte) Ce qui y appartient et non voulans de ce siecle trespasser intestate de l’auctorité, consentement et licence de mon seigneur a nous sur ce par lui donnez et octroyez par ses lettres dont la teneur sensuit. Charles par la (grace de Dieu roy de Fran)ce. A tous ceulx qui ces presentes lettres verront salut. Savoir faisons de la partie de notre tres chiere et tres amee compaigne la royne nous avoir esté exposé que elle, considerant que a toute personne ayant entendement et usaige de raison appartient de faire testament et selon son estat ordenner a l’onneur de Dieu et pour le salut de son ame des biens que Notre Seigneur lui a prestez en ceste mortel vie, considerant aussi et cognoissant les grans biens, estaz, honneurs, richesses et autres biens temporelz que par la grace de Notre Seigneur elle a en ce monde, a despieça proposé et encor a tres grant desir, devocion et voulenté de donner, distribuer et aumosner de ses diz biens a l’onneur de Notre Seigneur et pour le salut des ames de nous et de elle et de en ordenner et disposer par son testament et darreniere voulenté et autrement ainsi que selon Dieu et sa conscience lui semblera bon et expediant, mais sanz le consentement et congié de nous de qui apres Dieu elle se recognoist avoir les diz biens ne la voulu, ne veult faire ; et pour ce nous a humblement supplié que de ce faire nous plaise lui donner congié et licence pourquoy nous considerans et approuvans le bon et sain propos d’icelle notre compaigne ayans en consideracion et memoire les tres grans et agreables services et plaisirs qu’elle nous a faiz depuis qu’il pleut a Notre Seigneur nous joindre ensemble par mariage et la tres grant cure et diligence qu’elle a eue et a continuelment de tout ce qu’elle a sceu et scet estre a nostre honneur et prouffit, inclinans pour ce favorablement a sa supplicacion devant dicte, voulons et nous plaist et a icelle notre compaigne avons octroyé et octroyons de notre certeine science et grace especial par ces presentes que de touz ses biens meubles qu’elle a de present et aura ou temps avenir elle puisse et lui loise franchement et selon sa voulenté et plaisir ordenner, distribuer, aumosner et despenser en et par son testament ou ordennance de darreniere voulenté, ainsi qu’il lui plaira et que selon sa devocion lui semblera bon a faire jusques a la somme de cent mille frans oultre et par dessuz le payement et acquit de toutes ses debtes ; et de ce faire lui avons donné congié et licence, auctorité et plain povoir et donnons par ces mesmes lettres ausquelles en tesmoing de ce nous avons fait mectre notre seel. Donné a Paris le Xe jour de juillet l’an de grace mil CCCC et sept et de notre regne le XXVIIe. Faisons et ordennons notre testament et ordennance de darreniere voulenté en la forme et maniere qui cy apres sensuivent en rappellant premierement et avant toute euvre et revoquant touz autres testamens, codicilles et ordennances de darreniere voulenté par nous faiz ou temps passé en quelque maniere que ce soit. Premierement nous creans, recognoissans et confessans la verité de la sainte foy catholique ainsi que notre mere sainte eglise la tient et enseigne et que touz bons chretiens la doivent croirre et tenir, recommandons tres humblement l’ame de nous a notre createur Dieu tout puissant, a la tres glorieuse Vierge Marie, a monseigneur saint Michiel archange et a toute la benoite compaignie des sains et saintes de Paradis afin que quant elle partira de notre corps et de ceste mortel vie Notre Seigneur Jhesus Crist qui, de son tres precieux sang la rachetee, la vueille par sa tres grant grace et misericorde recevoir en sa bieneuree compaignie et pardurable gloire, amen. Et pour ce que nous voulons et est notre entencion tousiours vivre et quant il plaira a Dieu mourir comme vraye chretienne et en la foy et creance de notre mere sainte eglise, nous requerons des maintenant pour lors que les sains sacremens de l’eglise a nous convenables nous soyent administrez et baillez chascun en son lieu et temps deu si comme en sainte eglise sont ordennez se par force de maladie ou autre accident advenoit ce que Dieu ne vueille que nous ne les peussions requerir et demander comme il appartendroit, et semblablement requerons que notre indulgence et remission de peine et de coulpe nous soit leue et donnee en la forme acoustumee. Item, nous eslisons la sepulture de notre corps ou lieu plus prouchain de celli ou mondit seigneur a esleue la sienne et voulons, ordennons et nous plaist que apres notre trespassement le plus tost que bonnement faire se pourra notre dit corps soit enseveli et mis en terre ou dit lieu tout entier sanz icelli divisier ou y faire aucune ouverture ou incision en ensuivant par celle maniere humblement et devotement le commun usaige de ensevelir corps humains. Item, nous voulons que toutes noz debtes soyent a plain et parfaitement payees et noz torffaiz entierement adreciez et amendez, et pour ce que nous voulons ceste chose mieulx et plus seurement estre faicte et que elle viengne a plus grant clarté si comme nous le desirons, nous voulons et ordennons que apres notre deces il soit crié et publié en touz les lieux ou noz excecuteurs verront qu’il sera bon a faire que touz ceulx a qui nous pourrons aucunement estre tenue viengnent par devers eulx pour en estre sattiffaiz ainsi qu’il appartendra de raison en chargant noz diz excecuteurs que de ce qui leur apperra en leurs consciences en quoy nous pourrons estre tenue a eulx soit pour debtes, pour torsfaiz, pour delaiz de payemens ou autres justes causes, ilz en facent ou facent faire payemens et sattiffacions a touz ceulx a qui il appartendra et aussi de touz les coux fraiz et dommaiges qu’ilz auroient euz et soustenuz pour ce. Et pour ce que ceste chose se puisse faire et a moins de grevance des bonnes gens, nous voulons et ordennons que noz diz excecuteurs ou cas que ilz ne pourroient ou vouldroyent faire ceste chose en leurs personnes par conseil commettent deux personnes preudommes et loyaulx ou plus se mestier est qui aillent es lieux et paiz ou nous serons et pourrons estre tenue pour payer et sactiffier aux bonnes gens ce qui sera venu a clarté et cognoissance jusques a la somme de cent soulz parisis ou six livres ou environ deuz a une personne et en faire le payement aux dictes bonnes gens a qui ilz trouveront par la dicte informacion et enqueste que nous y soyons tenue comme dit est dessuz et prandront ceulx qui a ce seront establiz lettre de quictance soubz seaulx autentiques des bonnes gens a qui ilz payeront et les apporteront devers noz excecuteurs pour monstrer quelz payemens ilz auront faiz a qui et pour quelles causes lesquelles quictances nous voulons et ordennons estre payees du notre ainsi comme le principal afin que ceulx qui seront par ce sactiffiez ayent franchement le leur, et les autres payemens qui seront trouvez de greigneur somme ilz se payeront par noz excecuteurs aux lieux ou notre excecucion se fera principalment ; et de ces payemens restitucions faire aux dictes bonnes gens prions nous et requerons noz diz excecuteurs que ilz en facent tant que il doye estre a Dieu agreable et que les consciences de nous et de eulx en demeurent deschargees a tousiours. Item, voulons et ordennons que se nous trespassons a Paris ou pres d’illec que notre corps soit porté en l’eglise de Paris et illec fait un service solennel en la maniere qu’il a esté acoustumé a faire pour noz devancieres roynes selon l’advis et ordennance de noz excecuteurs ; et s’il advenoit que nous trespasseissions loing de Paris ou pres de Saint Denis en tel lieu que pour porter notre corps a Saint Denis ne feust point neccessité qu’il passast parmj Paris, nous voulons qu’il soit porté tout droit en l’eglise de Saint Denis et de noz obseques, de l’attour de notre corps, de draps d’or, de enterrement et sepulture, il nous plaist, voulons et ordennons que ilz soyent faiz sanz orgueil et vanité selon le regart et bon advis de noz excecuteurs ; et que se bonnement et honnorablement se puet faire que notre corps soit porté a visage descouvert en la forme et maniere qu’il a esté acoustumé a faire de noz devancieres roynes en tel cas. Item, quant au fait de noz luminaires, nous ordennons en la maniere qui s’ensuit. C’est assavoir que s’il advient que nous trespassons avant que mondit seigneur, notre luminaire soit tel comme ont acoustumé a avoir les roynes de France, et ou cas que nous survivrons mondit seigneur et trespasserons en viduité, nous voulons et ordennons que noz diz luminaires tant en portant notre corps de lieu a autre comme es eglises ou il sera porté et que en la presence d’icelli l’en fera aucun service pour nous soient faiz telz et en la maniere qu’il a esté acoustumé de faire pour les roynes noz devancieres qui sont trespassees en viduité et selon ce qu’il semblera bon a noz diz excecuteurs. Item, voulons et ordennons que le jour de notre obseque et enterrement de notre corps a Saint Denys soit faicte une donnee generale et solennelment cryee a chascun qui y viendra de huit deniers parisis. Item, voulons que le jour de notre obseque a Saint Denys soit faicte pitance au couvent de cinquante frans. Item, voulons et ordennons que touz prestres et clers qui vendront dire messes ou psauctiers en la presence de notre corps avant l’enterrement d’icelli et aussi le jour qu’il sera enterré ayent c’est assavoir chascun prestre qui celebrera messe trois soulz parisis et les clers qui diront psauctiers chascun deux soulz huit deniers parisis. Item, donnons et leissons a l’eglise de Notre Dame de Paris ou cas que par la condicion devant dicte notre corps seroit porté en icelle apres notre trespas et non autrement deux cens soixante frans pour le rachat de notre coronne et draps d’or que nous aurions sur et entour nous, et avec ce donnons et leissons ou cas dessuz dit et non autrement au college de la dicte eglise soixante frans pour distribuer aux chanoines, chappellains, vicaires, clers et autres dudit college qui seront au service fait en la presence de notre corps et y demoureront des le commancement jusques a la fin. Et aussi donnons et leissons vint frans a distribuer aus marregliers de la dicte eglise et sonneurs d‘icelle qui feront la sonnerie bien et deuement. Et s’il advenoit par la condicion devant dicte que notre dit corps ne feust point porté en la dicte eglise de Notre Dame de Paris, nous voulons et ordonnons que tantost apres ce qu’il sera enterré en l’eglise de Saint Denys un service solennel soit fait le plus briefment que faire se pourra en la dicte eglise de Notre Dame de Paris et que notre luminaire soit fait illec tel et en la maniere comme en tel cas a esté acoustumé de faire pour noz devancieres roynes. Et en ce cas donnons et leissons aux chanoines, chappellains, vicaires, clers et autres du college de la dicte eglise soixante livres parisis pour distribuer entre eulx c’est assavoir a ceulx qui seront presens a faire ledit service et y demoureront du commancement jusques a la fin et aussi pour payer les marregliers et ceulx qui feront la sonnerie de notre dit service. Item, voulons et ordonnons que apres notre enterrement au plus brief que on pourra soyent faiz six services solennelz c’est assavoir aux quatre ordres mendians, aus celestins de Paris et aus chartreux lez Paris et que a chascun desdiz services ait douze cierges chascun de sept livres qui ardront aux vigilles et messe entour la representacion de notre corps. Et voulons que aux jours desdiz services soit faicte pitance aux couvens et religieux dessuz diz c’est assavoir aus couvens des jacobins et cordeliers a chascun soixante frans, aus augustins, aus freres du carme, aus celestins et aux chartreux a chascun quarante frans parmj ce toutevoyes que chacun prestre desdiz couvens sera tenu de dire une messe pour le salut de notre ame. Et a ces six services et aussi au dessuz dit de Notre Dame de Paris, voulons estre presens noz excecuteurs, noz amis et serviteurs qui bonnement y pourront estre et a chascun de ces services voulons estre donné a chascun pouvre qui sera trouvé apres la messe en l’eglise ou le service aura esté fait quatre deniers parisis. Item, donnons et leissons a chascun couvent des quatre ordres mendians de Paris dessuz nommez c’est assavoir jacobins, cordeliers, augustins et carmes quarante frans pour faire un anué en chascun desdiz couvens par les freres d’icelli lesquiex anuez nous voulons que l’en commance a faire tantost apres les services dessus diz faiz es diz couvens. Item, voulons et ordennons une chappellenie perpetuele estre fondee bien et souffisamment ou lieu ou notre corps reposera selon la bonne discrettion de noz excecuteurs et que celli ou ceulx qui tendra ou tendront ladicte chappelle soit ou soyent tenuz de y dire messe chascun jour perpetuelment pour le salut des ames de monseigneur, de nous et de notre lignee. Item, nous leissons et donnons a l’eglise de Notre Dame de Paris, soit que notre corps y soit porté ou non, dix livres de rente admortie ou deux cens frans pour icelle rente achetez et faire admortir pour faire notre anniversaire chascun an perpetuelment en la dicte eglise le jour de notre trespassement ; et ou cas que en notre vivant nous aurions baillé icelle rente admortie ladicte eglise en devra estre contenté et chargee de faire notre dit anniversaire comme dit est et par ainsi demourroit ceste clause acomplie ; et se fait n’estoit en notre vivant, nous voulons que noz excecuteurs baillent apres notre deces aux doyen et chappitre de ladicte eglise lesdiz IIc frans pour l’achat et admortissement de ladicte rente pour la fondacion de notre dit anniversaire. Item, donnons et leissons a la Sainte Chappelle du palaiz royal a Paris dix livres parisis de rente admortie ou deux cens frans pour icelle rente acheter et admortir pour faire notre anniversaire perpetuelment chascun an en ladicte chappelle le jour que nous trespasserons ; et ou cas que en notre vie aurions icelle rente baillee a la dicte Sainte Chappelle nous en demourrons deschargee ; et se fait n’estoit en notre vivant nous ordonnons et voulons iceulx IIc frans estre baillez par noz excecuteurs aux tresorier et chanoines d’icelle pour la fondacion de notre dit anniversaire. Et avec ce donnons et leissons ausdiz tresorier et chanoines et autres dudit college quarante frans, douze cierges et douze torches chacun et chacune de six livres de cire pour faire un service solennel pour nous en ladicte chappelle apres notre trespassement le plus tost que bonnement faire se pourra lesquiex cierges et torches seront atachiez et ardront autour de la representacion de notre corps durant ledit service ; et lesdiz quarante frans seront distribuez a ceulx dudit college qui seront presens audit service du commancement jusques a la fin. Item, donnons et leissons a l’eglise de Saint Denys en France pour faire en icelle notre anniversaire perpetuelment chacun an le jour que nous trespasserons dix livres parisis de rente admortie ou deux cens frans par les condicions et maniere cy devant dictes de la fondacion de notre anniversaire en l’eglise de Paris et en la Sainte Chappelle du palaiz. Item, donnons et leissons a l’eglise de Notre Dame de Chartres pour faire en icelle notre anniversaire perpetuelment chascun an le jour de notre obit cent soulz parisis de rente admortie ou cent frans pour icelle rente acheter et admortir pour la fondacion de notre dit anniversaire par les condicions et maniere devant dictes. Item, a l’eglise de Senliz en laquelle nous avons fondee une messe perpetuelment, donnons et leissons pour faire en icelle notre anniversaire perpetuelment chascun an le jour de notre trespas cent soulz parisis de rente admortie ou cent frans pour icelle rente acheter et admortir pour la fondacion de notre dit anniversaire par les condicions et maniere devant dictes ; et avec ce donnons et leissons a la dicte eglise une de noz chappelles entieres de celles que nous aurons au temps de notre trespassement tele comme bon semblera a noz diz excecuteurs. Item, a l’eglise collegiale de Saint Florent de Roye en Vermandoys en laquelle nous avons semblablement fondee une messe perpetuele, donnons et leissons pour faire en icelle notre anniversaire perpetuelment chascun an a tel jour comme nous trespasserons cent soulz parisis de rente admortie ou cent frans pour icelle rente acheter et admortir pour la fondacion de notre dit anniversaire par les condicions devant dictes es fondacions de noz autres anniversaires ; et avec ce leur donnons et leissons une de noz chappelles entieres tele comme bon semblera a noz excecuteurs. Item, donnons et leissons a la dicte eglise pour l’accroissement de la fondacion de la dicte messe perpetuele que nous y avons fondee trois cens frans ; et pour faire en la dicte eglise un service solennel pour nous tantost apres nostre trespassement donnons et leissons vint frans au college d’icelle. Item, aux religieuses cordelieres de Leursines empres Saint Marcel lez Paris en l’eglise desqueles nous avons semblablement fondee une messe perpetuele a l’autel de monseigneur saint Loys de Marsaille, nous donnons et leissons cent soubz parisis de rente admortie ou cent frans pour icelle rente acheter et admortir pour fonder et faire notre dit anniversaire chacun an perpetuelment en ladicte eglise le jour que nous yrons de vie a trespassement selon les condicions et maniere devant dictes es autres fondacions de noz anniversaires. Item, donnons et leissons a ladicte eglise un cothidien de chappelle des chappelles que nous aurons au temps de nostre trespassement ; et avec ce donnons et leissons aux dictes religieuses vint frans pour faire en la dicte eglise un service solennel pour nous le plus tost que bonnement faire se pourra apres nostre trespassement. Item, au couvent des freres mineurs de Verneul ou Perche ouquel nous avons semblablement fondee une messe perpetuele, nous donnons et leissons cinquante frans pour l’accroissement de la fondacion de la dicte messe et un cothidien de chappelle ; et avec ce leur donnons et leissons vint frans pour faire un service solennel pour nous apres notre deces et que chacun frere d’icelli couvent die une messe pour nous. Item, donnons et leissons aus celestins de Paris pour faire en leur eglise notre anniversaire perpetuelment chacun an a tel jour comme nous trespasserons cent soulz parisis de rente admortie ou cent frans pour icelle rente acheter et admortir pour la fondacion de notre anniversaire par les condicions devant dictes es fondacions de noz autres anniversaires ; et avec ce leur donnons et voulons qu’ilz ayent une de noz chappelles entieres pour prier pour nous et que chacun prestre de leur couvent die une messe pour nous apres notre deces. Item, nous donnons et leissons aux chartreux lez Paris pour faire en leur eglise notre anniversaire perpetuelment chacun an a tel jour comme nous trespasserons cent soubz parisis de rente admortie ou cent frans pour icelle rente acheter et admortir selon les condicions devant dictes es fondacions de noz autres anniversaires ; et avec ce voulons qu’ilz ayent aucun de noz reliquiaires tel comme bon semblera a noz diz excecuteurs. Item, donnons et leissons aus chanoines du boys de Vincennes pour semblablement faire notre anniversaire cent soulz parisis de rente admortie ou cent frans pour icelle rente acheter et admortir par les condicions devant dictes es fondacions de noz autres anniversaires. Et avec ce leur donnons et leissons soixante frans pour faire un anue et un service solennel pour nous en leur eglise tantost apres notre trespassement. Item, a noz bien amez les doyen et chappitre de l’eglise de Laon lesquiex de leur bonne et liberal voulenté nous ont pieça offert, accordé et promis faire celebrer perpetuelment en leur eglise pour nous une messe solennele du saint Esperit tant comme nous vivrons et apres notre trespassement une messe de mors avec vigilles solenneles et commandises si comme par leurs lettres puet apparoir ; nous considerans la bonne affection qu’ilz ont et monstrent envers nous leur donnons et leissons dix livres parisis de rente admortie ou deux cens frans pour icelle rente acheter et admortir pour faire notre anniversaire en leur eglise perpetuelment chacun an le jour de notre trespassement selon les condicions mises es fondacions de noz autres anniversaires. Item, donnons et leissons a l’eglise monseigneur Saint Loys de Poissy pour faire notre anniversaire en icelle perpetuelment chacun an a tel jour comme nous trespasserons dix livres parisis de rente admortie ou deux cens frans pour icelle rente acheter et admortir par les condicions cy devant mises. Et avec ce leissons et donnons aux religieuses de ladicte eglise trente frans pour faire en icelle un service solennel pour nous et afin que chacune d’icelles religieuses die pour nous vigilles et commandacions de mors apres notre trespassement le plus tost que bonnement faire se pourra. Item, aus religieuses de l’ordre saint Dominique lez Montargis pour estre acompaignee en leurs prieres et faire notre anniversaire en leur eglise perpetuelment chacun an le jour que nous yrons de vie a trespassement nous donnons et leissons cent soulz parisis de rente admortie ou cent frans pour icelle rente acheter et admortir par les condicions devant mises es fondacions de noz autres anniversaires ; et avec ce donnons et leissons aus dictes religieuses vint frans pour faire un service solennel pour nous en leur eglise et afin que chacune d’elles die pour nous vigilles et commandacions de mors apres notre trespassement le plus tost que bonnement elles pourront. Item, donnons et leissons vint frans au couvent de saint Bernart a Paris pour y faire un service solennel pour nous et estre acompaignee es prieres dudit couvent et que chacun prestre d’icelli die une messe pour nous apres notre trespassement le plus tost que bonnement faire se pourra. Item, au couvent de Saint Germain des Prez lez Paris donnons et leissons vint frans pour faire un service solennel pour nous en leur eglise pour estre recuillie et acompaignee en leurs prieres et afin que chacun prestre dudit couvent die pour nous une messe le plus tost que bonnement faire se pourra apres notre trespassement. Item, au couvent de l’abbaye de Sainte Genevieve de Paris pour faire un service solennel pour nous en ladicte eglise apres notre trespassement le plus tost que bonnement faire se pourra et afin d’estre acompaignee en leurs prieres et que chacun prestre dudit couvent die une messe pour nous, nous leur donnons et leissons vint frans. Item, au couvent de Saint Victor lez Paris donnons et leissons vint frans pour faire un service solennel pour nous en leur eglise apres notre trespassement le plus tost que bonnement faire se pourra et afin d’estre acompaignee en leurs prieres et que chacun prestre dudit couvent die une messe pour nous. Item, au couvent de Saint Martin des Champs a Paris donnons et leissons vint frans pour faire un service solennel pour nous en leur eglise apres notre trespassement le plus tost que bonnement faire se pourra et afin d’estre acompaignee en leurs prieres et que chacun prestre dudit couvent die pour nous une messe. Item, aus freres de saint Anthoine de Viennois fondé a Paris nous donnons et leissons vint frans pour faire un service solennel pour nous en leur eglise le plus tost que bonnement faire se pourra apres notre trespassement et afin d’estre acompaignee en leurs prieres et que chacun d’eulx prestre die une messe pour nous. Item, au couvent de Sainte Katherine du Val des Escoliers de Paris nous donnons et leissons vint frans pour faire un service solennel pour nous en leur eglise le plus tost que bonnement faire se pourra apres notre trespassement et afin d’estre acompaignee en leurs prieres et que chacun prestre dudit couvent die pour nous une messe. Item, au couvent de Saint Magloire de Paris nous donnons et leissons vint frans pour faire un service solennel pour nous en leur eglise apres notre trespassement le plus tost que bonnement faire se pourra et afin d’estre acompaignee en leurs prieres et que chacun prestre dudit couvent die pour nous une messe. Item, a l’abbesse et couvent de l’eglise de Saint Anthoine lez Paris donnons et leissons vint frans pour faire un service solennel pour nous en ladicte eglise tantost apres notre trespassement et afin d’estre acompaignee es prieres de la dicte eglise et que chacune religieuse d’icelle die pour nous unes vigilles de mors, sept seaumes et letanie avec les oroisons qui s’ensuivent. Item, aux bons hommes du bois de Vincennes donnons et leissons trente frans pour faire un service solennel pour nous en leur eglise apres notre trespassement et afin d’estre acompaignee en leurs prieres et biens faiz et que chascun prestre de leur dicte eglise die une messe pour le salut de notre ame. Item, a l’eglise de Saint Denys de la Chartre a Paris donnons et leissons dix frans pour faire un service solennel pour nous en la dicte eglise apres notre trespassement le plus tost que bonnement se pourra faire et afin que chascun religieux d’icelle eglise die une messe pour le salut de notre ame. Item, a l’eglise de Saint Maturin de Paris leissons et donnons dix frans pour faire un service solennel pour nous en la dicte eglise apres notre trespassement le plus tost que bonnement faire se pourra et afin que chascun religieux d’icelle eglise die une messe pour le salut de notre ame. Item, a l’eglise de Saint Eloi devant le palaiz a Paris donnons et leissons dix frans pour faire un service solennel pour nous en ladicte eglise tantost apres notre trespassement et afin que chascun religieux d’icelle eglise die une messe pour l’ame de nous. Item, a l’eglise de Notre Dame des Champs lez Paris donnons et leissons dix frans pour faire un service solennel pour nous en ladicte eglise et afin que chascun prestre d’icelle die une messe pour nous. Item, au couvent de Sainte Croix a Paris donnons et leissons dix frans pour faire un service solennel pour nous en ladicte eglise tantost apres notre trespassement et afin que chascun religieux d’icelle eglise die une messe pour nous. Item, a l’eglise des Billettes donnons et leissons dix frans pour faire un service solennel pour nous en ladicte eglise tantost apres notre trespassement et afin que chascun religieux d’icelle eglise die une messepour nous. Item, au couvent des Blans Manteaulx donnons et leissons dix frans pour faire un service solennel pour nous en la dicte eglise tantost apres notre trespassement et afin que chacun religieux d’icelle eglise die une messe pour nous. Item, au college de Saint Germain l’Aucerroys a Paris donnons et leissons quinze frans pour faire un service solennel pour nous en ladicte eglise le plus tost que bonnement faire se pourra apres notre trespassement et que chacun prestre dudit college die pour nous une messe. Item, au college de Saint Marceau lez Paris donnons et leissons dix frans pour faire un service solennel pour nous en ladicte eglise le plus tost que bonnement faire se pourra apres notre trespassement et afin que chascun prestre dudit college die pour nous une messe. Item, aux colleges de Saint Merry, de Sainte Opportune, de Saint Honoré, de Saint Benoist le Bestourné, de Saint Estienne des Grez, de Saint Thomas du Louvre et de Saint Nicolas d’illec nous donnons et leissons a chacun d’iceulx colleges dix frans pour faire en leurs eglises un service solennel pour nous tantost apres notre trespassement et afin que chascun prestre desdiz colleges die une messe pour nous. Item, nous donnons et leissons a chascun curé de toutes les eglises parrochiales de Paris quatre frans pour faire un service pour nous en leurs eglises, et a la fabrique de chascune des dictes eglises quatre frans. Item, nous leissons et donnons a l’ostel Dieu de Paris, c’est assavoir au prieur pour les necessitez dudit hostel cinquante frans et a la prieuse pour les neccessitez de son office cinquante frans, et parmj ce seront tenuz de faire un service solennel pour nous apres notre trespassement. Et si leissons et donnons a chacun pouvre qui au temps de notre trespassement gierra et sera oudit hostel trois soulz parisis, et a chascune pouvre femme gisant d’enfant illec cinq soulz parisis. Item, a la congregacion des avugles nommez les XVxx de Paris, nous donnons et leissons trente frans lesquieulx nous voulons estre distribuez et departiz par la voulenté de noz excecuteurs par porcion a chascun pouvre en sa main. Item, aus prestres et clers dudit college leissons et donnons dix frans pour faire un service pour nous apres notre trespassement et afin que chascun desdiz prestres die une messe pour nous et chascun desdiz clers psaultier. Item, nous leissons et donnons a l’ospital du saint Esperit fondé en Greve pour la substantacion des pouvres et malades et pour estre acompaignee es biens faiz d’icelli vint frans. Item, aus freres de lostel de saint Ladre lez Paris leissons et donnons dix frans pour faire un service solennel pour nous en leur eglise tantost apres notre trespassement et afin que chacun prestre dudit hostel die une messe pour le salut de notre ame. Item, nous leissons et donnons aus beguines de Paris pour prier pour nous vint frans. Item, donnons et leissons aux filles Dieu de Paris pour semblable cause vint frans. Item, nous donnons et leissons la somme de deux cens frans pour donner et distribuer par l’ordonnance de noz excecuteurs aus autres pouvres eglises, hospitaulx et lieux piteables de la ville de Paris qui ne sont cy devant nommez. Item, nous leissons et donnons a l’eglise de la parroisse ou nous trespasserons cent frans, c’est assavoir au curé pour faire un service solennel et prier pour nous cinquante frans et a la fabrique d’icelle eglise cinquante frans. Et ou cas que nous trespasserons hors de la parroisse de Saint Pol de Paris, nous donnons et leissons au curé d’icelle pour faire notre service solennelment vint frans et a la fabrique d’icelle vint frans. Item, nous donnons et leissons a chascun couvent des quatre ordres mandiens de Paris, c’est assavoir des jacobins, des cordeliers, des augustins, des freres du carme cent livres parisis pour faire en chacun desdiz couvens quatre anuez pour nous lesquiex nous voulons et ordonnons que l’en commence a faire tantost apres notre trespassement. Item, nous donnons et leissons aus religieuses du Moncel lez le Pont Sainte Maissence cinquante frans pour faire en leur eglise un service solennel pour nous apres notre trespassement et afin d’estre acompaignee es prieres des dictes religieuses et que chascune d’icelles die pour nous vigilles de mors, sept pseaumes, letanye et les oroisons qui sensuivent. Item, donnons et leissons a l’eglise de Notre Dame d’Amiens cent frans pour faire en icelle un service solennel pour nous apres notre trespassement et que chascun prestre du college de la dicte eglise die une messe pour le salut de l’ame de nous. Item, a l’eglise de Saint Euremont de Creil donnons et leissons cinquante frans pour faire un service solennel pour nous apres notre trespassement et que chascun prestre dudit college die une messe pour l’ame de nous. Item, aus cordelieres de Longchamp donnons et leissons cinquante frans pour faire un service solennel pour nous en leur eglise apres notre trespassement et estre acompaignee en leurs prieres et que chascune d’elles die pour nous vigilles et commandacions de mors. Item, donnons et leissons a l’eglise de la Saussoye cent frans pour faire un service solennel pour nous et pour estre participans es prieres de la dicte eglise. Item, donnons et leissons aus religieuses de sainte Baudeuz de Chiele quarante frans pour faire un service solennel pour nous ; et que chascune des dictes religieuses die vigilles et commandacions de mors pour nous apres notre trespassement. Item, donnons et leissons a l’eglise parrochial de Montargis vint et cinq frans a partir par egal porcion entre le prieur et le curé de la dicte eglise lesquiex seront pour ce tenuz de faire illec un service solennel pour nous apres notre trespassement. Item, donnons et leissons a l’ostel Dieu d’illec dix frans pour estre acompaignee es biens faiz d’icelli. Item, donnons et leissons a l’eglise parrochial de Courtenay vint et cinq frans a partir par egal porcion entre le prieur et le curé de la dicte eglise lesquiex seront pour ce tenuz de faire illec un service solennel pour nous apres notre trespassement. Item, au college des chanoines de l’eglise de Saint George fondee en notre chastel de Crecy donnons et leissons trente frans pour faire en la dicte eglise un service solennel pour nous apres notre trespassement et que chascun prestre d’icelli college die une messe pour le salut de notre ame. Item, donnons et leissons a la maladerie dudit lieu de Crecy dix frans pour employer es reparacions d’icelle et non ailleurs. Item, donnons et leissons semblablement a l’ostel Dieu dudit lieu dix frans. Item, aus nonnains du Pont au dames lez Crecy donnons et leissons quarante frans pour faire un service solennel pour nous en leur eglise apres notre trespassement et pour estre acompaignee en leurs prieres et que chacune d’elles die pour nous vigilles et commandacions de mors. Item, donnons et leissons a l’eglise de la chappelle lez Crecy trois frans pour faire un service pour nous en icelle apres notre trespassement et a la fabrique d’icelle donnons et leissons quatre frans. Item, voulons et ordonnons que a chascun curé des eglises parrochiales estans es terres que nous tendrons au temps de notre trespassement soyent donnez deux frans pour dire une messe et vigilles de mors pour nous et a la fabrique de chascune desdictes eglises parrochiales donnons et leissons quatre frans. Item, donnons et leissons au couvent des Cordeliers de Saint Loys de Marsaille pour faire un service solennel pour nous en leur eglise tantost apres notre trespassement avec un anue cent frans. Item, leissons et donnons a l’euvre et fabrique de l’eglise ou chappelle de Saint Santin de Chuyne lez Cournille cent frans. Item, donnons et leissons au college de l’eglise Saint Santin ou marchié de Meaulx vint frans pour faire illec un service solennel pour nous et que chascun prestre dudit college die une messe pour le salut de notre ame, et a la fabrique de la dicte eglise donnons et leissons quatre vins frans. Item, donnons et leissons a la priore de Saint Fiacre en Brye pour semblable cause cent frans c’est assavoir vint frans pour faire un service et dire messes, et quatre vins frans pour la fabrique. Item, au college de l’eglise Notre Dame de Meleun donnons et leissons cinquante frans pour faire illec un service solennel pour nous et que chascun prestre dudit college die une messe pour le salut de notre ame. Item, a l’eglise parrochial de Saint Nicolas de Meleun, donnons et leissons vint frans c’est assavoir dix frans au curé pour faire un service pour nous en la dicte eglise et a la fabrique d’icelle dix frans. Item, aus nonnains de Notre Dame du Liz lez Meleun donnons et leissons cinquante frans pour faire un service solennel pour nous et que chascune d’elles die pour nous unes vigilles et commandacions de mors. Item, aus couvens de Clugny et de Cysteaux pour faire un service solennel pour nous en leurs eglises donnons et leissons en chacun d’iceulx couvens trente frans. Item, au college de l’eglise Notre Dame du Puy donnons et leissons vint frans pour faire un service solennel pour nous en leur eglise apres notre trespassement. Item, leissons et donnons aux religieux, abbé et couvent de l’eglise Notre Dame de Bouloigne sur la mer vint frans pour faire un service solennel pour nous en leur eglise apres notre trespassement. Item, donnons et leissons a l’eglise Notre Dame de Lyance pour dire unes vigilles de mors et une messe a note pour nous par le curé ou chappellain du lieu quatre frans, et a la fabrique de la dicte eglise donnons et leissons dix frans. Item, pareillement donnons et leissons a l’eglise de Notre Dame de Montfort sur Ruille pour dire unes vigilles de mors et une messe a note pour nous par le curé ou chappellain du lieu quatre frans, et a la fabrique d’icelle donnons et leissons dix frans. Item, semblablement leissons et donnons a l’eglise de Notre Dame de Bouloigne la petite lez Saint Cloud pour dire unes vigilles de mors et une messe a note quatre frans par le curé ou chappellain du lieu, et a la fabrique d’icelle donnons et leissons dix frans. Item, a l’eglise de Notre Dame du Vivier en Brye donnons et leissons trente frans pour faire illec un service solennel pour nous apres notre trespassement, et que chascun prestre du college de ladicte eglise die pour nous une messe. Item, donnons et leissons a l’eglise de Notre Dame de Munich en Baviere vint frans pour faire en icelle un service solennel pour nous apres notre trespassement. Item, donnons et leissons a l’eglise de Notre Dame de Rainstorf vint frans pour semblablement faire en la dicte eglise apres notre trespassement un service solennel pour nous. Item, a l’eglise des freres mineurs de Munich donnons et leissons vint frans pour faire en leur eglise un service solennel pour nous apres notre trespassement, et que chascun des diz freres die une messe pour le salut de notre ame. Item, leissons et donnons a l’eglise de Freysnighen en Baviere vint frans pour faire en ladicte eglise un service solennel pour nous apres notre trespassement. Item, leissons et donnons aux freres mineurs de Norlinghen vint frans pour faire un service solennel pour nous en leur eglise apres notre trespassement, et que chacun frere dudit couvent die une messe pour nous. Item, nous voulons et ordonnons que aux chapitres generaulx des ordres de Cyteaux, des Jacobins, des Cordeliers, des Augustins, des freres du carme, des Chartreux, et de premonstré qui premierement seront tenuz a celebrer apres notre trespassement noz excecuteurs le signifient afin qu’ilz facent services pour nous es eglises de leurs ordres et nous recueillent en leurs prieres comme ont acoustumé a faire pour leurs bienfaitteurs. Et leissons et donnons a chascun desdiz chappitres c’est assavoir de Cyteaux, des Jacobins et des Cordeliers cent frans et aux chappitres des Augustins, des freres du Carme, des Chartreux et de Premonstré a chacun soixante frans. Item, de noz biens meubles que notre Seigneur de sa grace nous a prestez dont nous le mercions tres humblement nous ordonnons en la maniere qui s’ensuit. Premierement a l’onneur de lui et de sa sainte eglise, nous voulons et ordonnons que touz noz joyaulx d’or et d’argent garniz et non garniz de perles et de pierrerie propres et convenables pour servir a l’eglise, c’est assavoir croix, reliquiaires, tableaux et ymages de sains et de saintes et autres semblables que nous aurons au temps de notre trespassement soyent donnez et distribuez a eglises par noz excecuteurs selon leurs discrecions et que a cause de ce les gens desdictes eglises soyent chargiez de faire aucunes prieres especiales pour le salut de notre ame. Item, voulons et ordennons que de touz noz joyaulx d’or et d’argent garniz et non garniz de perles et de pierrerie que nous aurons au temps de notre trespassement et que nous aurons portez ou fait faire pour porter sur nous en notre vie pour notre parement et attour, c’est assavoir coronnes, cercles, chappeaux, coiffes, coliers, fermaulx, anneaulx, chaennes, bourses et saintures et de toute notre veisselle d’or garnie de pierrerie et aussi de touz noz autres joyaulx d’or et d’argent qui ne seroient propres et convenables pour servir en eglise comme miroers, ymages de hommes et de femmes, de bestes, d’oyseaux ou d’autres figures soyent faiz autres joyaulx propices et convenables pour servir a l’eglise, c’est assavoir croix, reliquiaires, tableaux et ymages de sains et de saintes et que en iceulx soyent mises et employees toutes les perles et pierrerie qui estoyent es joyaulx dont ilz auront esté faiz et que iceulx reliquiaires, croix, tableaux et ymages de sains et saintes ainsi faiz soyent donnez et distribuez par noz diz excecuteurs a pluseurs eglises et que par ce les gens d’icelles soyent chargiez de faire pour nous aucuns especiaulx services ou prieres qui devisez leur seront par noz diz excecuteurs. Item, voulons et ordennons que toute notre veisselle d’or sanz pierrerie et aussi notre veisselle d’argent tant doree comme blanche que nous aurons au temps de notre trespassement soit vendue et adeneree et les deniers qui en vendront convertiz et employez ou payement de ce present testament et des codicilles que nous ferons s’il advient que aucuns en facions. Ou cas toutevoyes que nous ne les aurions payez en notre vie ou que l’en ne trouveroit en noz coffres et par devers nous apres notre deces argent comptant pour les payer et acomplir esquieux cas nous voulons et ordonnons que de notre dicte veisselle soyent faiz calices, coppes a mectre le corps Notre Seigneur, burettes et portepaix pour donner et distribuer a eglises par l’advis et discrecion de noz diz excecuteurs afin que les gens d’icelles eglises soyent tenuz de faire aucuns especiaulx suffraiges et services pour le salut de notre ame selon ce que advisé sera par noz diz excecuteurs. Item, voulons et ordonnons que toutes noz chappelles et les parties d’icelles, c’est assavoir chappes, chasubles, tuniques, dalmatiques, frontiers, dossiers et autres manieres de paremens et vestemens, croix, calices, encensiers, chandeliers, bacins, burettes, portepaix, aubes, amitz, nappes et touailles d’autel, et quanqui a servi en notre dicte chappelle soyent donnez et distribuez a eglises especialment a celles ou nous avons fondé ou fonderons chappelles, messes ou anniversaires. Et voulons que pour ce les gens des dictes eglises soyent chargiez de faire pour notre salut aucunes especiales messes ou autres prieres et suffrages ainsi que advisé sera par noz diz excecuteurs. Item, voulons et ordonnons que de toutes noz robes brodees de perles, de orfraiz ou d’autres ouvraiges tant longues comme courtes soyent hoppellandes, chapperons ou autres habiz telz comme ilz seront trouvez par devers nous apres notre trespas soyent faictes chappes, chasubles, tuniques, dalmatiques et paremens de autelz et estuiz a corporaulx sanz riens oster ou changier desdictes perles et broderie ne desdiz orfraiz mais voulons que lesdictes perles et broderies y demeurent telz comme ilz estoient en noz dictes robes et que lesdiz orfraiz soyent employez a faire les orfraiz desdictes chasubles et que iceulx paremens et vestemens soyent donnez et distribuez a l’eglise de Notre Dame de Paris, a la sainte Chappelle du palaiz, a l’eglise de Saint Denis en France, a l’eglise de Saint Pol a Paris et a autres eglises notables et de fondacion royal par l’advis de noz diz excecuteurs especialment a eglises ou nous aurons fait aucune fondacion comme cy dessuz est dit et que les gens d’icelles eglises soyent chargiez par nos diz excecuteurs de faire aucuns services especiaulx pour le salut de notre ame. Item, voulons et ordennons que de toutes noz robes de veluyau, de draps dor et de soye tant longues comme courtes soyent hoppellandes ou autres garnemens que nous aurons au temps de notre trespassement soyent semblablement faiz paremens et vestemens comme dessuz est devisé qui soyent donnez et distribuez par noz diz excecuteurs a pluseurs pouvres eglises et premierement a celles des terres que nous tendrons au temps de notre deces et que nous aurons tenues en notre vie et puis a autres selon l’advis et discrettion de noz diz excecuteurs et que les gens des dictes eglises soyent pour ce chargiez de faire aucunes prieres pour nous. Item, voulons et ordonnons que toutes les fourreures et doubleures des robes dessuz dictes tant d’ermines, letices, martres, menu vair gris comme cendal et autres soyent vendues et adenerees et les deniers ou argent d’icelles convertiz ou payement des façons, orfraiz, doubleures et autres estoffes des vestemens et paremens qui seront faiz de noz robes devant dictes selon ce que cy dessuz est devisé et le surplus se aucun en y a voulons estre donné et aumosné pour Dieu. Item, voulons et ordonnons que toutes noz robes de draps de laine tant d’escarlate comme autres avec leurs fourreures de penne et de cendal que nous aurons au temps de notre trespassement soyent vendues, et les deniers d’icelles donnez et distribuez par noz diz excecuteurs a pouvres femmes grosses et acouchees, a pouvres filles a marier, a pouvres orfelins pour les nourrir et faire aprandre aucun mestier et a pouvres mesnagiers honteux. Item, voulons et ordonnons que de tout notre linge que nous aurons au temps de notre trespassement tant nappes et touailles comme toilles en quoy l’eglise de la Saussoye n’aura aucun droit soyent faictes nappes et touailles a autelz et aubes et amitz lesquiex soyent par noz diz excecuteurs donnez et distribuez a pouvres eglises afin que nous soyons acompaignee es prieres d’icelles ; et tout notre linge en quoy ladicte eglise aura droit, nous voulons et ordonnons qu’il lui soit baillé et delivré. Item, voulons et ordonnons que touz noz autres biens meubles dont cy devant n’est faicte mencion comme livres, chambres, tappisserie et aussi les choses appartenans au fait de notre escuirie en quoy l’eglise de la Saussoye n’auroit aucun droit et touz noz autres meubles quelzconques soyent venduz pour payer, acomplir et acquiter notre present testament et les choses contenues en icelli ; et se residu ou demourant y a notre dit testament acompli, nous voulons et ordennons icelli residu estre donné et aumosné a relever pouvres eglises et a pouvres gens comme pouvres filles a marier, pouvres orfelins et autres aumosnes piteables. Item, donnons et leissons la somme de dix mille frans pour distribuer et departir a touz les officiers de notre hostel tant hommes comme femmes, c’est assavoir a chacun et a chacune selon son estat et le temps qu’il aura servi au regart et par l’advis et discrecion de noz diz excecuteurs appellez avec eulx aucun des maistres de notre dit hostel. Item, nous voulons et ordonnons que noz gens et officiers soyent aux despens de notre hostel en la maniere acoustumee jusques a tant que notre corps soit enterré ou enfouy et l’obseque d’icelli fait et que les services que nous avons ordonnez estre faiz aus quatre ordres mendians, aux chartreux et aux celestins soyent faiz comme ordennez les avons cy devant. Et que avant que notre hostel soit departi, noz gens soyent payez entierement des deniers que nous leur avons leissiez ou leissons en notre present testament et leisserons es codicilles que nous ferons se aucuns en faisons se il se puet faire bonnement car touz les laiz que nous avons faiz ou ferons a noz diz serviteurs de notre hostel nous tenons et reputons noz propres debtes et voulons qu’ilz soyent payez tantost apres notre sepulture et obseques devant touz autres laiz et ainsi le emoignons a noz diz excecuteurs. Et s’il advenoit que noz dictes gens et serviteurs ne peussent ainsi et par la maniere que dit est estre contentez et payez par deffault de finance ou pour autres causes, nous voulons que les d(espe)ns que ilz feroient en venant aux jours que mis leur seront pour estre payez leur soyent payez et renduz des deniers de notre excecucion selon les bonnes discrecions de noz excecuteurs. Item, nous voulons et ordonnons que chacun de noz excecuteurs qui cy apres seront nommez en ce present testament ou en noz codicilles s’il advient que aucuns en facions ayent chacun cent frans de et sur les biens de notre dicte excecucion et leur prions et requerons par ces presentes et pensons a prier et requerir de bouche que ilz se vueillent chargier de excecuter et acomplir notre dit testament et noz codicilles se aucuns en faisons sur l’ordonnance de notre darreniere voulenté. Et pour ce que nous pensons bien que continuelment ilz n’y pourront pas bonnement touz vaquer et entendre, nous voulons que tantost apres notre trespassement, ilz se assemblent touz ou au moins ceulx qui se pourront assemblez pour avoir advis et regart et deliberer entre eulx lesquiex de noz diz excecuteurs pourront mieulx et plus continuelment vaquer et entendre a poursuir, demener et acomplir le fait de notre dicte excecucion et que en poursuivant et demenant le fait de notre dicte excecucion et en acomplissant ce present testament et noz codicilles s’il advient que aucuns en facions iceulx noz excecuteurs ayent et preignent sur les biens de notre dicte excecucion despens raisonnables pour tant de temps comme ilz y vaqueront et entendront desquieux despens nous voulons qu’ilz soyent justement payez selon raison par le regart et bon jugement de noz diz excecuteurs. Et en oultre voulons que celli de noz diz excecuteurs qui sera chargié de la recepte de notre dicte excecucion et de rendre le compte d’icelle ait cent frans oultre les cent frans dessuz diz pour ce que nous savons bien qu’il aura plus grant charge et peine que les autres. Item, voulons et ordonnons que noz diz excecuteurs puissent contraindre ou faire contraindre touz noz receveurs et autres personnes qui en fait de recepte se seront entremis de noz finances des revenues de noz terres ou autres besoignes quelzconques a payer toutes les debtes qui par eulx nous seront deues au temps de notre trespassement oyr et clorre leurs comptes composer, transiger et accorder se mestier est et bon semble a noz diz excecuteurs ausdiz receveurs ou autres personnes quelzconques qui par la fin de leurs comptes ou autrement en quelque maniere et pour quelque cause que ce soit seront tenuz a nous a notre excecucion et que iceulx noz excecuteurs puissent baillier et baillent ausdiz debteurs teles lettres de quictance comme bon leur semblera lesqueles lettres de quictance nous voulons estre valables selon la forme et teneur d’icelles sanz ce que noz hoirs ou ayans cause les puissent debatre ou contredire ne contraindre les diz debteurs a leur rendre compte ne payement ne les molester en aucune maniere de ou sur ce dont ilz auront les dictes quictances. Item, il nous plaist, voulons et ordennons que de toutes noz debtes qui nous seront deues au temps de notre trespassement noz diz excecuteurs puissent faire grace et remission a noz debteurs en tout ou en partie selon ce qu’ilz verront en leurs consciences que par equité, raison ou pitié sera a faire au prouffit et salut de l’ame de nous. Item, voulons et ordonnons que s’il escheoit aucunes doubtes ou obscurtez es choses dessuz dictes contenues en ce present testament et en noz codicilles ou es deppendences d’icelles, noz diz excecuteurs les quatre ou les trois d’iceulx puissent faire declaracion et leur bon jugement pourveu que iceulx quatre ou trois ayent sur les dictes doubtes ou obscurtez l’advis et conseil de noz autres excecuteurs se mestier est et le cas le requiert. Et se noz diz excecuteurs trouvoyent ou veoyent en leurs consciences que aucunes personnes par avant notre trespassement ou au temps d’icelli eussent repaire en notre hostel et service ausquiex nous feussions tenue pour services non remunerez ou autres causes raisonnables, nous voulons et ordennons que noz diz excecuteurs leur en facent recompensacion et sattisfacion deue le conseil et advis des maistres de notre hostel et des autres de notre conseil sur ce euz se mestier est. Item, nous voulons et ordonnons que tout ce que nous adjousterons, soubstrairons, muerons ou changerons en ce present testament par codicilles a icelli annexez ou non annexez tiengne, vaille, et soit mis a excecucion et acompli tout ainsi comme s’il estoit contenu en ce present testament. Neantmoins quant au surplus ce present testament demourant en sa force et vertu entierement et a plain. Item, pour mectre a excecucion, enteriner et acomplir le contenu en ce present testament et darreniere voulenté et en noz codicilles se aucuns en faisons, nous des maintenant pour lors qu’il plaira a Notre Seigneur que nous trespassions de ce siecle, nous dessaisissons et desvestons de touz noz biens meubles tant joyaulx comme autres quelzconques et quelzqu’ilz soyent et aussi de tout ce qui lors nous sera et pourra estre deu tant a cause des rentes et revenues des terres que nous tendrons lors et aurons tenues a quelque cause ou tiltre que ce soit comme pour autres causes quelzconques et voulons que noz diz excecuteurs en soyent et demeurent saisiz et vestuz sanz moyen incontinent apres notre trespassement ausquieulx noz excecuteurs nous des maintenant pour lors transportons par cest present notre testament tout le droit et possession que nous y avons affin que d’iceulx biens, joyaulx, debtes et autres meubles quelzconques, ilz puissent apres notre deces joir, user et exploictiez paisiblement iceulx prandre et tenir en leurs mains en faire bon et loyal inventoire et les vendre et exploictier au mieulx et plus prouffitablement qu’ilz pourront sanz aucune faneur (faveur ?) tout au prouffit de notre dicte excecucion et leur transportons pour les causes dessuz dictes touz droiz, raisons, et accions que nous y aurons et pourrons avoir contre quelzconques personnes et pour quelzconques causes que ce soit au jour de notre dit trespassement. Toutesvoyes, nous ne voulons pas que aucuns de quelzques estaz qu’ilz soyent ayent aucuns de noz joyaulx ou autres biens se promptement ilz ne baillent a noz excecuteurs l’argent de ce qu’ilz vouldront avoir, c’est assavoir le pris que lesdiz joyaulx ou autres choses vauldront et que l’en en pourroit avoir justement et loyaulment. Item, nous ne voulons pas que aucun notre heritier ou successeur ou quelconque autre personne de notre lignage ou autres ait ou ayent la possession et saisine de noz diz biens meubles soyent joyaulx ou autres choses sur caucion ou autrement ne pour quelque occasion, droit, usaige ou coustume soubz quelconques forme de paroles ou couleur que ce soit ou puisse estre mais pour certaines et justes causes qui a ce nous ont meue et meuvent, voulons et ordonnons de notre certaine science et par bon advis que noz debtes, noz laiz et ordonnances contenues en ce present testament et en noz codicilles se aucuns en faisons, premierement et avant toute euvre payez, acquitez et acompliz entierement tout le demourant de noz diz biens meubles soyent joyaulx ou autres quelzconques en quelque lieu qu’ilz soyent ou puissent estre trouvez jusques a la somme de cent mille frans soyent et demeurent en la main de noz diz excecuteurs pour estre par eulx aumosnez, distribuez et convertiz a faire chanter messes, donnez bureaux, souliers et deniers a pouvres souffreteux, a pouvres maisons Dieu, maladeries et hospitaulx, a pouvres gentilz femmes mariees, a pouvres mesnagiers et filles a marier et autres piteux usaiges, aux pouvres de terres et pays que nous tenons et tendrons lors que nous trespasserons de ce siecle a l’un plus a l’autre moins selon ce que bon semblera a noz diz excecuteurs pour le salut et remede de l’ame de nous et de ce faire et acomplir chargons leurs consciences. Item, nous voulons et ordonnons que de notre present testament et de noz codicilles s’il advient que aucuns en facions sur l’ordonnance de notre darreniere voulenté les gens de la court de parlement ayent la prevencion et cognoissance seulx et pour le tout et non autres et en soubzmettons la cognoissance a eulx et a la dicte court voulans et ordonnans que apres notre deces notre dit testament et codicilles ou codicille soyent mis en leurs mains pour avoir la cognoissance de touz debaz et proces qui a cause de ce se pourroyent mouvoir et pour estre par eulx commis telles personnes dudit parlement comme ilz verront qu’il sera bon a faire pour veoir l’estat et oyr le compte de notre dicte excecucion et estre par eulx pourveu en tout comme au cas appartendra. Et supplions a mondit seigneur tant et si tres humblement comme nous povons que noz diz excecuteurs et le fait de l’excecucion de notre present testament et de noz codicilles s’aucuns en faisons, il lui plaise de sa benigne grace avoir pour especialment recommandez et prandre en sa sauvegarde et especial protection et yceulz noz testamens et codicilles avoir agreable et confermer ; et se a noz diz excecuteurs estoit fait ou donné par quelque personne que ce feust aucun empeschement ou destourbier ou fait de notre dicte excecucion, il lui plaise le faire oster et mectre au neant en telle maniere que noz diz testament et codicilles puissent briefment estre acompliz selon notre entencion. Et aussi prions tres affectueusement et de cuer a noz tres chiers et tres amez oncles cousin et frere, les ducs de Berry, de Bourgoingne et de Bourbon et Loys, duc en Baviere que semblablement vueillent avoir le fait de notre dicte excecucion pour recommande et estre protecteur et deffendeur d’icelli et faire cesser a leur povoir touz empeschemens qui en ce seroient donnez a noz diz excecuteurs lesquieulz nous leur prions semblablement qu’ilz vueillent benignement oyr et les aidier et conforter touteffoiz que pour ce ilz se trairont par devers eulx. Pour touz lesquelz laiz et autres choses cy dessuz escriptes et devisees en ce present testament et ordonnance de notre darreniere voulenté et en noz codicilles s’il advient que aucuns en facions mectre a excecucion deue loyaulment et briefment si comme nous le desirons de tout notre cuer, nous eslisons et nommons, faisons, ordonnons et establissons par vraye confiance noz excecuteurs les personnes qui s’ensuivent, c’est assavoir messire Arnault de Corbie, chevalier, chancellier de France, messire Jehan de Montagu, arcevesque de Senz, conseillier de mon dit seigneur et president en sa chambre des comptes, messire Jehan Dieudonné, evesque de Senliz, notre conseillier, messire Michiel de Crene, evesque d’Aucerre, conseillier et confesseur de mon dit seigneur, messire Jehan, sire de Montagu conseillier et grant maistre d’ostel de mondit seigneur, messire Yon, sire de Garencieres, chambellan de mon dit seigneur et grant maistre de notre hostel, messire Guillaume Martel, sire de Bacqueville, chambellan de mondit seigneur, messire Jehan, sire de Roussay, chambellan de mondit seigneur et notre conseillier, Jehan de la Haye, dit Piquet, conseillier de mondit seigneur, maistre Pierre de Lesclat, maistre des requestes de l’ostel de mondit seigneur et notre conseillier, maistre Estienne de Bray, conseillier et maistre des comptes de mondit seigneur et de nous, Hemon Raguier, tresorier des guerres de mondit seigneur et notre conseillier, et maistre Jehan Salaut, secretaire de mondit seigneur et notre conseillier et premier secretaire. Et pour ce que si comme nous pensons bien touz les dessuz nommez ne pourroient pas tousiours estre presens ne vacquer et entendre au fait de notre dicte excecucion et a l’acomplissement de noz diz testament et codicilles pour pluseurs empeschemens qu’ilz pourroient avoir, il nous plaist, voulons et ordennons que les quatre ou les trois d’iceulz puissent entreprandre, poursuir et demener le fait de notre dicte excecucion et ycelle et toutes les choses contenues en noz diz testament et codicilles et toutes les deppendences d’icelles enteriner et acomplir. Et de ce faire leur donnons auctorité et plain povoir pourveu que l’un desdiz quatre ou trois qui ainsi vacqueront audit fait soit tousiours ledit grant maistre d’ostel de monseigneur ou le dit sire de Bacqueville, le dit sire de Roussay ou le dit Piquet. Et prions et requerons si affectueusement et de cuer comme plus povons a touz noz diz excecuteurs ensemble et a chacun par soy que charitablement vueillent prendre et accepter en eulx la charge de notre dicte excecucion, et pour l’amour de nous ycelle excecuter, acomplir et mener affin ainsi qu’ilz vouldroyent pour eulx estre fait pour le salut de leurs ames en telle maniere que ilz en doyent et puissent de Dieu recevoir guerdon et que l’ame de nous en puisse plus briefment aler en la benoite gloire de Paradis laquelle notre Seigneur Jhesus Crist qui vit et regne sanz fin nous vueille octroyer par sa doulce misericorde, Amen. En tesmoing desquelles choses nous avons fait mectre notre propre seel en cest present notre testament et darreniere voulenté. Donné a Meleun le cinquiesme jour d’avril l’an de grace mil quatre cens et sept avant Pasques.
Informations
Document
Murielle
Gaude-Ferragu
(Université de Paris-13 Sorbonne-Paris-Cité), dans
Actes des femmes de pouvoir
label.quote.actes-des-femmes-de-pouvoir