« bullarium-franciscanum-4984 »

Dilecto filio Hugoni de Scuria electo Colocen.

Summi dispositione rectoris etc. Dudum siquidem bonae memoriae Gregorio archiepiscopo Colocen. regimini Colocen. ecclesiae praesidente nos ... provisionem eisdem ecclesiae, cum vacaret, ordinationi et dispositioni nostrae duximus ea vice specialiter reservandam etc. Postmodum vero praefata Colocen. ecclesia per obitum eiusdem Gregorii, qui extra Romanam curiam diem clausit extremum, pastoris solatio destituta, nos vacatione huiusmodi fide dignis relatibus intellecta ad provisionem ipsius ecclesiae celerem et felicem ... intendentes, post deliberationem, quam de praeficiendo eidem ecclesiae personam utilem ac etiam fructuosam cum fratribus nostris habuimus diligentem, demum ad te ordinis fratrum Minorum professorem, in sacerdotio constitutum, litterarum scientia praeditum, religionis zelo conspicuum, vitae ac morum honestate decorum, in spiritualibus providum et in temporalibus circumspectum aliisque multiplicium virtutum meritis insignitum, convertimus oculos nostrae mentis. Quibus omnibus attenta meditatione pensatis de persona tua eidem Colocensi ecclesiae de dictorum fratrum nostrorum consilio auctoritate apostolica providemus teque illi praeficimus in archiepiscopum et pastorem, curam et administrationem ipsius tibi tam in spiritualibus quam in temporalibus plenarie committendo etc. Datum Avinione XII kalendas iulii anno decimo.

In eumdem modum capitulo ecclesiae Colocen. ac populo civitatis et dioecesis Colocen.