« bullarium-franciscanum-4983 »

Venerabili fratri episcopo Vicentin. et dilectis filiis s. Firmi minoris et s. Mariae in organo monasteriorum Veronen. abbatibus.

Pastoralis officii etc. Sane petitio pro parte dilectarum in Christo filiarum abbatissae et conventus monasterii sanctae Mariae de Campo-Martio prope Veronam ordinis sanctae Clarae nobis nuper exhibita continebat, quod dudum venerabilis frater noster Ioannes Bononien. tunc Veronen. episcopus (considerans, quod monasterium sanctae Mariae Magdalenae Veronen. ordinis sancti Benedicti quasi ex toto collapsum et desolatum multisque magnis debitis oneratum eiusque possessiones et bona in magna parte dilapidata et alienata ac sub usurarum voragine obligata erant et reliquae ipsius possessiones incultae iacebant ac domus et aedificia ipsius reparatione maxima indigebant, et quod quinque sorores dicti monasterii sanctae Mariae Magdalenae, quae dumtaxat in eo absque abbatissa diutius remanserant, inhonestam et lascivam vitam ducebant et extra monasterium ipsum indecenter pro libito vagabantur, quodque tam ipsae moniales quam aliae personae ipsius monasterii ex eiusdem monasterii redditibus non poterant commode sustentari) ex praemissis et multis aliis rationabilibus causis motus, habito pluries super hoc tractatu cum dilectis filiis capitulo Veronen. et nonnullis aliis praelatis et personis ecclesiasticis, saecularibus et regularibus, civitatis Veronen., cum consensu dictorum capituli praefatum monasterium s. Mariae Magdalenae dicto monasterio de Campo-Martio (non obstante, quod diversorum essent ordinum) auctoritate ordinaria in perpetuum annexuit et univit, ordinans inter cetera, quod in dicto monasterio sanctae Mariae Magdalenae certus esse deberet monialium numerus per abbatissam dicti monasterii de Campo-Martio eligendarum seu praesentandarum eidem episcopo et per ipsum episcopum instituendarum ibidem, et de ipso numero monialium in dicto monasterio sanctae Mariae Magdalenae sic institutarum una, quae reliquis et ipsi monasterio praeesse deberet, quae vicaria nuncuparetur, per dictam abbatissam eligi et per episcopum Veronen., qui esset pro tempore, confirmari deberet; et quod ipsa vicaria et moniales, quae in dicto monasterio forent per eumdem episcopum, qui foret pro tempore, approbatae, deberent in eodem monasterio perpetuo residere nec clausuras dicti monasterii exire et vivere secundum regulam et ordinem sanctae Clarae praedictos; et quod nihilominus monasterium ipsum sanctae Mariae Magdalenae ac vicaria et moniales ac saeculares et aliae personae, quae in eo pro tempore degerent, cum omnibus bonis et iuribus ipsius monasterii sub iurisdictione ipsius episcopi et successorum suorum perpetuo remanerent; sibique etiam et successoribus suis reservavit omnem iurisdictionem, auctoritatem et potestatem, obedientiam, subiectionem, reverentiam, destitutionem, correctionem, visitationem, reformationem, censuram ecclesiasticam, poenitentias et sacramentorum omnium spectantium et pertinentium ad ipsum episcopum exhibitiones nec non synodum seu synodocio nomine quod debetur, contributionem caritativi subsidii et aliorum onerum, quartam decimationum, funeralium et mortuorum, quae occurrerent in futurum, et censuum eidem episcopo debitorum ac omnia alia et singula iura, quae ad ipsum episcopum et eius episcopatum in dicto monasterio sanctae Mariae Magdalenae ante unionem huiusmodi quomodolibet pertinebant: volens et protestans, quod per unionem huiusmodi nullum praeiudicium fieret episcopatui Veronen. nec per eam de ipsius episcopatus iuribus intelligeretur aliquid abdicatum. Quae omnia abbatissa et conventus ipsius monasterii de Campo-Martio supradictae ratificaverunt et per eorum syndicum iuramento firmarunt, prout in publicis instrumentis inde confectis dicitur plenius contineri.

Quare pro parte ipsarum abbatissae et conventus monasterii de Campo-Martio nobis fuit humiliter supplicatum, ut dictam unionem auctoritate apostolica confirmare nec non, cum ipsae et monasterium earum praefatum de Campo-Martio sub cura fratrum ordinis Minorum regantur et ab omni dominio, iurisdictione et potestate episcopi Veronen., qui est pro tempore, et quorumlibet aliorum ordinariorum iudicum sit prorsus exemptum, et indecens ac minus expediens videatur, quod dictum monasterium sanctae Mariae Magdalenae tamquam membrum a suo capite discrepans alteri sit subiectum, providere super hoc de benignitate apostolica dignaremur.

Nos igitur, qui monasteriorum praefatorum statum salubrem et personarum in eis degentium quietem paternis desideriis affectamus, quia de praemissis certam notitiam non habemus, dictarum abbatissae et conventus monasterii de Campo-Martio in hac parte supplicationibus inclinati, discretioni vestrae, de qua in his et aliis gerimus in Domino fiduciam specialem, per apostolica scripta committimus et mandamus, quatenus ..., si est ita, unionem praefatam auctoritate nostra confirmare omnemque defectum, si quis in ea intervenerit, de potestatis nostrae plenitudine supplere curetis; et insuper, ut praefatum monasterium sanctae Mariae Magdalenae suo capiti sit conforme et moniales, quae in eo pro tempore fuerint, cum abbatissa et sororibus dicti monasterii de Campo-Martio in semitas mandatorum Domini paribus gressibus ambulent ac uno eodemque regimine gubernatae quietum possint Altissimo reddere famulatum, monasterium ipsum sanctae Mariae Magdalenae et personas quaslibet, quae degunt et degent perpetuis temporibus in eodem, ab omni iurisdictione, dominio et potestate episcopi Veronen., qui est pro tempore, et quorumlibet aliorum ordinariorum iudicum totaliter eximatis, ipsasque monasterium et personas debere perpetuo gaudere omnibus privilegiis, immunitatibus, libertatibus et exemptionibus, quibus monasterium de Campo-Martio et abbatissa eius ac sorores pro tempore gaudent et quomodolibet potiuntur (non obstantibus quibuscumque constitutionibus apostolicis vel aliis aut statutis vel consuetudinibus monasteriorum et ordinum praefatorum nec non ordinationibus et reservationibus et protestationibus supradictis per eumdem episcopum in unione praefata appositis, ut praefertur, nec non quibuscumque approbationibus, promissionibus, poenis, obligationibus seu etiam iuramentis abbatissae et conventus monasterii sanctae Mariae de Campo-Martio praefatarum sub quacumque forma vel expressione verborum conceptis), auctoritate praemissa decernatis ipsasque abbatissam et conventum seu moniales et personas, quae in dicto monasterio sanctae Mariae Magdalenae pro tempore fuerint, ab observantiam ordinamentorum, statutorum, approbationum et iuramenti praefatorum in perpetuum non teneri eadem auctoritate etiam declaretis. Datum Avinione XV kalendas iulii anno decimo.