« bullarium-franciscanum-4800 »

Venerabilibus fratribus Gregorio Chanadien. et Nicolao Quinqueecclesien. episcopis.

Accedens ad praesentiam nostram dilectus filius Antonius Zagrabiensis ordinis fratrum Minorum provinciae Ungariae iuxta morem dicti ordinis sua nobis gravi admodum et querulosa conquestione monstravit, quod, cum pridem sibi falso et per invidiam coram dilecto filio generali ministro dicti ordinis per dilectum filium Martinum provincialem ministrum ordinis et provinciae praedictorum impositum extitisset, quod ipse Antonius supra se falsas litteras bullatas, ut prima facie apparebat, bulla fel. rec. Innocentii papae praedecessoris nostri et nonnullas alias falsas litteras procuraverat et quod illas vendiderat venerabili fratri nostro episcopo et dilectis filiis capitulo Vesprimien. pro certo pretio per eundem Antonium inde habito et recepto, praefatus Antonius innocentiam suam super illis purgare desiderans, ne veritas occulta remaneret et ne dictus Martinus provincialis minister in sua malitia praevaleret, ad Romanam curiam se contulit, opportunum sibi et statui suo super praemissis adhiberi remedium a nobis cum instantia petiturus. Nos igitur attendentes, quod super contingentibus crimen falsi propter ipsius detestationem criminis cautius et diligentius est agendum, ac volentes super praedictis eidem Antonio ut praefertur impositis veritatem plenius indagari, ... fraternitati vestrae per apostolica scripta committimus et mandamus, quatenus vos vel alter vestrum ad dictam civitatem Vesprimien. vos personaliter conferentes vocatis, qui sunt evocandi, de praedictis eidem Antonio impositis vos diligentius informetis et quaecumque per informationem huiusmodi reperiretis, in scriptis redacta sub vestris inclusa sigillis nobis quantocius destinetis et nihilominus, si per eandem informationem eundem Antonium inveneritis culpabilem in aliquo de praemissis, sufficienti per vos nostro et ecclesiae Romanae nomine ab eodem Antonio de se nostro conspectui praesentando recepta cautione, eundem ex parte nostra peremptorie citare curetis, ut infra certum terminum competentem ... compareat legitime coram nobis facturus et recepturus super praemissis, quod fuerit rationis, nostrisque mandatis et beneplacitis humiliter pariturus etc. Datum Avinione IV nonas martii anno quinto.