« bullarium-franciscanum-4709 »

Dilecto filio Bertrando Escharpiti electo Adiacen.

Militanti ecclesiae etc. Dudum siquidem, scilicet idibus februarii pontificatus nostri anno secundo, provisiones omnium ecclesiarum episcopalium in Pisana provincia consistentium, tunc vacantium et usque ad biennium ex tunc in antea computandum vacaturarum, ordinationi et dispositioni nostrae ac sedis apostolicae specialiter duximus reservandas etc. Postmodum vero ecclesia Adiacen. in praefata provincia consistente per obitum bonae memoriae Manfredia episcopi Adiacen., qui nuper in partibus illis diem clausit extremum, pastoris solatio destituta, nos vacatione huiusmodi fide dignis relatibus intellecta ad provisionem ipsius ecclesiae celerem et felicem ... intendentes, post deliberationem, quam cum fratribus nostris habuimus diligentem, demum ad te ordinis fratrum Minorum professorem, in sacerdotio constitutum, cui de religionis zelo, litterarum scientia, elegantia morum, vitae munditia aliisque multiplicium virtutum meritis apud nos fide digna testimonia perhibentur, direximis oculos mentis nostrae. Quibus omnibus debita meditatione pensatis de persona tua ipsi Adiacen. ecclesiae de praedictorum fratrum consilio auctoritate apostolica providemus teque illi praeficimus in episcopum et pastorem, curam et administrationem ipsius tibi tam in spiritualibus quam in temporalibus plenarie committendo etc. Datum apud Villam novam Avinionen. dioecesis XII kalendas iulii anno quarto.

In eumdem modum archiepiscopo Pisan., capitulo et vassallis ecclesiae Adiacen., clero ac populo civ. et dioec. Adiacen.