« bullarium-franciscanum-4513 »

Venerabilibus fratribus archiepiscopis et episcopis ac dilectis filiis electis, abbatibus ceterisque personis ecclesiasticis, regularibus, religiosis et saecularibus, ac universis Christi fidelibus in Tartarorum imperiis et partibus Orientalibus et Aquilonaribus constitutis.

Supra gregem Dominicum tamquam pastor universalis disponente Domino constituti de subditorum salute profundis meditationibus cogitamus, inter quas illa sollicitudo quotidiana nos angit praecipue, ut per vestrae cooperationis ministerium puritas catholicae fidei, sine qua nemo potest salvus fieri, colatur et observetur ubique, ad divini nominis laudem et gloriam fideliumque animarum salutem semper felicia suscipiens incrementa. Et si splendorem huiusmodi fidei orthodoxae in illis mundi regionibus, in quibus plenarie ipsius cultus viget, resplendere cupimus, cuiusvis obfuscationis erroneae caligine profugata, summis tamen desideriis peroptamus, ut in vobis inter nationes exteras constitutis non extinguatur eiusdem lucerna fidei, sed vehementius accendatur, ut, quanto maioribus pressuris et tribulationibus vos contingit subiici propter eam, tanto, si constantes et perseverantes in ea fideliter fueritis, ampliora et uberiora merita vobis exinde proveniant apud Deum. Ideoque universitatem vestram rogamus, monemus et hortamur attente in domino Iesu Christo, quatenus spem vestram figentes in Domino, qui non permittet vos tentari supra id, quod potestis, sed faciet etiam cum tentatione proventum, pro fide ipsa, quae vos cum operibus bonis ad aeternae quietis perducet beatitudinem, stetis viriliter et eam firmiter et tenaciter observetis; vosque, fratres archiepiscopi et episcopi ac filii electi, abbates et alii religiosi ac clerici saeculares, quibus ex officio vel alias praedicare congruit verbum Dei, circa dilatationem eiusdem fidei verbis et exemplis salutaribus fideliter et sedule tamquam operarii veri et idonei laboretis, metentes messis manipulos in agro Domini, quos in eius horrea reportetis cum gaudio, vocem illam dulcissimam: « Euge serve bone et fidelis, quia in pauca fuisti fidelis, supra multa te constituam, intra in gaudium Domini tui » post huius vitae miserabilis transitum audituri. Ut autem fides eadem catholica, quam nos et ecclesia Romana cum universo coetu christianorum fidelium profitemur, praedicamus et tenemus firmiter, vobis clarius et apertius innotescat atque illam sequi, profiteri, tenere, praedicare ac evangelizare firmius valeatis, eam tenore praesentium providimus ut sequitur explicandam. Credimus sanctam Trinitatem, Patrem et Filium et Spiritum Sanctum etc. Datum Avinione XVI kal. septembris anno sexto.