« bullarium-franciscanum-4308 »

Ministro ceterisque fratribus ordinis Minorum provinciae sancti Angeli.

Ad nostram pridem veniens praesentiam dilectus filius Geraldus ordinis vestri generalis minister, nobis zelum sincerae devotionis et fidei, quibus erga nos et Romanam ecclesiam praefulgere tamquam filii benedictionis et gratiae noscimini, eas piis et laudandis operibus in apertum producentes continue, verbotenus exponere procuravit. Quibus nos laeto animo, cum filii sapientes patrem laetificent, intellectis, sinceritatem vestram exinde multipliciter in Domino commendantes et ei, qui rectum vobis spiritum et in eo recta dedit sapere, in humilitate spiritus labiorum vinculum exsolventes, vestram prudentiam in Domino exhortamur, quatinus, ut in sancta professione vestra proficientes de bono semper in melius coronam illam assequi promereamini, quam in bono perseverantibus repromittit veritas, in coeptis huiusmodi persistatis, pro nobis, ut onus apostolicae servitutis desuper nobis impositum ad divini laudem nominis ac nostrae totiusque gregis Dominici curae nostrae commissi salutem animarum utilius et salubrius supportemus, necnon et pro pace ac unitate prosperoque statu ecclesiae sanctae Dei apud divinam clementiam multiplicare devotarum precum et orationum suffragia non cessantes. Ceterum, quia salutem vestram desideranter appetimus, nos devotae supplicationi eiusdem generalis ministri benignius inclinati, tibi, fili minister, quod fratres ordinis praedicti tuae curae commissos, qui poenas et sententias a canonibus [in] septimo libro decretalium, quae Clementinae nuncupantur vulgariter, situatis promulgatas (non ex contemptu tamen) incurrerunt hactenus, semel tantum ab eisdem poenis et sententiis iuxta formam ecclesiae absolvendi ac dispensandi cum ipsis super irregularitate, si quam ligati dictis poenis et sententiis celebrando divina vel immiscendo se illis (claves non contempnendo ecclesiae) contraxerunt, eisque poenitentiam propterea iniungendi, de qua saluti animarum ipsorum expedire videris, plenam concedimus tenore praesentium facultatem.

In eundem modum ministro ceterisque fratribus provinciae Terrae laboris, ... Pennensis, ... Apuliae, ... Tusciae, ... Bononiensis, ... Mediolani, custodi ceterisque fratribus provinciae sancti Francisci,a custodi Romano ceterisque fratribus provinciae Romanae. Datum Avinione, V kalendas ianuarii, anno decimo septimo.