« bullarium-franciscanum-4307 »

Dilectis filiis ministro generali et fratribus ordinis Minorum.

Merita vestrae religionis, in qua virtutum Domino militatis, exposcunt, ut apostolica sedes benigno vos favore confoveat et opportunis gratiis prosequatur. Cum itaque, sicut nobis pro parte carissimi in Christo filii nostri Eduardi regis Angliae illustris et dilecti filii nobilis viri Ioannis comitis Cornubiae fratris eius oblatae petitionis series continebat, idem rex ... pro ampliatione divini cultus ad Dei laudem et gloriam ac pro ipsorum nec non et clarae memoriae Eduardi regis Angliae, patris ipsorum, et progenitorum suorum animarum salute quemdam locum in regno Angliae, videlicet villam de Maydenstana Cantuarien. dioecesis situatum, cum eiusdem aedificiis et pertinentiis ordini vestro ac vobis duxerit concedendum, vosque locum ipsum absque permissione sedis apostolicae recipere ac ecclesias seu oratoria, domos et officinas necessarias (constitutione fel. rec. Bonifatii papae VIII praedecessoris nostri de locis huiusmodi de novo non recipiendis absque dictae sedis licentia obsistente) construere nequeatis: nos eorundem regis et comitis supplicationibus inclinati, vobis recipiendi locum huiusmodi, sine iuris parochialis ecclesiae et cuiuslibet alterius praeiudicio alieni, dummodo dicta villa ad sustentationem duodecim fratrum ipsius ordinis fore sufficiens dignoscatur, ac construendi et habendi ibidem ecclesiam seu oratorium ac domos et officinas, ut in dicto loco fratres vestri ordinis perpetuo commorentur, praedicta et qualibet alia constitutione contraria non obstante, tenore praesentium indulgemus; volumus autem, ut, postquam dicti fratres in loco praefato extiterint deputati, praedictus locus privilegiis et libertatibus ordini praedicto concessis, sicut alia loca dicti ordinis, libere gaudere valeat et quiete. Nulli ergo etc. Datum Avinione, XVII kalendas Ianuarii, anno decimo septimo.