« bullarium-franciscanum-3999 »

Dilecto filio Alberto de Sicardis, electo Callen.a

Suscepti cura regiminis assidua etc. Sane dudum contra Sperantiam et quosdam alios tunc nominatim expressos olim comites de monte Feretro, ecclesiae Romanae hostes publicos et rebelles, necnon contra quosvis alios tam clericos et laicos complices, adiutores, valitores, sequaces et fautores eorum, ipsis in hac parte quomodolibet adhaerentes et dantes eisdem contra dictam ecclesiam auxilium, consilium et favorem, certos processus fecimus et sententias duximus proferendas, ac nihilominus, si dicti clerici sententias ipsas per certi temporis spatium in eisdem processibus et sententiis expressum, postquam ipsis publicatae fuissent, sustinerent, eos ex tunc omnibus beneficiis ecclesiasticis (cum cura vel sine cura) et dignitatibus, etiamsi pontificales existerent, auctoritate apostolica sententiando privavimus ipsosque huiusmodi privationis sententiam incurrere voluimus eo ipso. Deinde vero venerabili fratri nostri Amelio episcopo Castren., tunc abbati monasterii sancti Saturnini Tolosan. et marchiae Anconitanae rectori, per nostras inter alia dedimus litteras in mandatis, ut per se vel per alium seu alios contra eosdem clericos, qui post huiusmodi spatium et publicationem processuum et sententiarum praefatorum contrarium facere praesumpserint, quique notorii non existerent, inquisita summarie de plano sine strepitu et figura iudicii veritate, omnes et singulos clericos praelibatos, quos fuisse seu fore tales per inquisitionem huiusmodi reperiret, omnibus beneficiis dignitatibusque supradictis, etiamsi dignitates ipsae pontificales existerent (ut praefertur), a nobis (ut praemittitur) privatos esse publice et solemniter nunciaret. Ad ipsius vero Amelii subsequenter audientiam deducto, quod Petrus tunc episcopus Callen. post spatium et publicationem praedictae sententiae Sperantiae et aliorum olim comitum praefatorum complex, adiutor, valitor, sequax et fautor fuerat ipsisque adhaeserat et eis praestiterat auxilium, consilium vel favorem ad invadendum, occupandum et tenendum tyrannice certas civitates et loca illarum partium tunc nominatim expressa, eidem ecclesiae immediate subiecta, in rebellione publica contra nos et ecclesiam antedictam: idem Amelius contra dictum Petrum, ad hoc et singulos alios actus iudiciarios legitime et peremptorie vocatum, fecit super his diligenter inquiri. Et quia per inquisitionem huiusmodi rite habitam invenit ipsum (post spatium et publicationem praefata) praemissa nequiter patravisse ac fore culpabilem super iis, dictum Petrum auctoritate litterarum earumdem episcopali dignitate et pontificali eo ipso a nobis per processus eosdem esse privatum sententialiter declaravit et solemniter ac publice nuntiavit: et huiusmodi processus ipsius Amelii nulla provocatione suspensus in rem transiit iudicatam.b — Interim autem ante huiusmodi processum dicti Amelii nos ex certis rationabilibus causis provisionem omnium cathedralium ecclesiarum in terris ecclesiae praefatae immediate subiectis consistentium, tunc vacantium et vacaturarum in antea ubicunque et quomodocunque, dispositioni nostrae ac sedis apostolicae usque ad nostrum et ipsius sedis beneplacitum duximus reservandam, decernendo ex tunc irritum et inane, si secus super his per quoscunque, quavis auctoritate, scienter vel ignoranter contingeret attentari. Attendentes igitur, quod nullus praeter nos de ordinatione Callen. ecclesiae ad eamdem ecclesiam Romanam nullo medio pertinentis et in terra dictae Romanae ecclesiae consistentis, per privationem huiusmodi vacantis, se intromittere potest, reservatione ac decreto huiusmodi obsistentibus, de praeficiendo eidem ecclesiae Callen. personam utilem cogitare coepimus diligenter, et post deliberationem, quam cum fratribus nostris super hoc attentam habuimus, demum ad te ordinis fratrum Minorum professorem, in sacerdotio constitutum, cui religionis zelus, vitae ac morum honestas, litterarum scientia et alia virtutum merita, prout ex testimoniis fide dignis accepimus, laudabiliter suffragantur, intuitum direximus mentis nostrae. Quibus omnibus debita meditatione pensatis, de persona tua praefatae Callen. ecclesiae de dictorum fratrum consilio auctoritate apostolica providemus teque ipsi ecclesiae praeficimus in episcopum et pastorem, curam et administrationem eiusdem ecclesiae Callen. tibi tam in spiritualibus quam in temporalibus plenarie committendo etc. Datum Avinione, II idus martii, anno duodecimo.c