Général
-
Jean XXII (1316-1334)
-
Petro de Via domino Calvineti indulget, ut possit construere monasterium Clarissarum in loco de Granayraco.1
-
1326, iunii 20, Avinione.
-
1326
-
Dilecto filio nobili viro Petro de Via, domino Calvineti sancti Flori dioecesis.a
In iis, quae animarum salutem respiciunt, libenter apostolici favoris praesidium impertimur. Exhibita siquidem nobis tua petitio continebat, quod quondam Eustachius de Bellomarchesio, dominus tunc Calvineti sancti Flori dioecesis, ordinavit in suo ultimo testamento, monasterium sororum Minorissarum ordinis sanctae Clarae usque ad numerum duodecim in loco suo de Granayraco prope Petruciam Ruthenen. dioecesis sub certis modis et conditionibus, contentis et expressis in testamento praedicto, construi et fundari, legando sororibus ipsis centum libras Turonen. parvorum annui et perpetui redditus pro victu et necessariis earumdem et quingentas libras eiusdem monetae semel solvendas pro constructione monasterii antedicti, quodque tu, ad quem dictus locus de Granayraco cum alia terra, quam dictus Eustachius in illis partibus dum viveret obtinebat, noscitur pertinere, cupiens terrena in coelestia et transitoria in aeterna felici commercio commutare, intendis iuxta ordinationem testatoris eiusdem dictum monasterium construere et dotare. Nos igitur tuis supplicationibus inclinati, ut praefatum monasterium cum oratorio, coemeterio et aliis necessariis officinis, iuxta ipsius testatoris desiderium atque tuum, construere et dotare valeas in dicto loco, sine iuris praeiudicio alieni, tibi auctoritate praesentium liberam concedimus facultatem, iure tamen patronatus in eo tibi et haeredibus tuis in perpetuum reservato. Nulli ergo etc. Datum Avinione, XII kal. iulii, anno decimo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°617., pp.-304
-
Reg. Vat. t. 81, ep. 1796, apud Wadd. l. c. n. 56.
1 -
(a) De illo Petro de Via, qui nepos erat Ioan. XXII, agi videtur.