« bullarium-franciscanum-3904 »

Dilecto filio Nicolao de Machilona electo Scarpaten.

Summi dispositione rectoris etc. Ecclesia siquidem Scarpaten.a per obitum bon. mem. Nicolai episcopi Scarpaten., qui nuper in terra Venetiarum Castellan. dioecesis diem clausit extremum, pastoris solatio destituta, nos huiusmodi vacatione ipsius ecclesiae fide dignis relatibus intellecta, cupientes eidem ecclesiae nostrae operationis ministerio secundum cor nostrum idoneam approbatamque praesidere personam, provisionem eiusdem ecclesiae ordinationi et dispositioni nostrae et sedis apostolicae ea vice duximus reservandam specialiter etc., decernentes etc.; ac deinde de ipsius ecclesiae ordinatione celeri, de qua nullus praeter nos (post reservationem et decretum praedicta) se intromittere potuit, sollicite cogitantes et ad provisionem ipsius prosperam et felicem, ne longae vacationis subiaceret incommodis, paternae sollicitudinis studio intendentes, post deliberationem, quam de praeficiendo eidem ecclesiae personam idoneam, per quam posset praeservari a noxiis ac in suis manuteneri iuribus et etiam adaugeri, cum fratribus nostris habuimus vigilantem, demum ad te ordinis fratrum Minorum professorem, in sacerdotio constitutum, quem nobis et eisdem fratribus de litterarum scientia, honestate morum, vitae munditia, prudentia spiritualium, temporalium providentia fide digna testimonia commendarunt, quique scies et poteris dictam ecclesiam utiliter regere et salubriter gubernare, direximus oculos mentis nostrae. Quibus omnibus debita consideratione pensatis, de persona tua, nobis et eisdem fratribus ob exigentiam huiusmodi meritorum tuorum accepta, de ipsorum fratrum consilio eidem ecclesiae Scarpaten. auctoritate apostolica providemus teque illi praeficimus in episcopum et pastorem, curam et administrationem ipsius tibi tam in spiritualibus quam in temporalibus plenarie committendo etc. Datum Avinione, VII kalendas iunii, anno decimo.b