Général
-
Jean XXII (1316-1334)
-
Ministris et custodibus provinciarum Mediolanen. et Thusciae concedit facultatem absolvendi subditos, qui contra prohibitionem sedis apostolicae divina celebrabant et communicabant cum rebellibus S. R. E.1
-
1326, maii 16, Avinione.
-
1326
-
Dilectis filiis ‥ ministris provincialibus et ‥ custodibus ordinis fratrum Minorum in provinciis Mediolanensi et Tusciae.
Ordinem vestrum sincera prosequentes in Domino caritate, cuilibet vestrum absolvendi iuxta formam ecclesiae singulos fratres ordinis vestri in sua provincia sive custodia constitutos, qui contra interdictum seu prohibitionem nostram seu apostolicae sedis in aliquibus civitatibus, locis seu terris praedictarum provinciarum vel alicuius earum divina officia celebrarunt aut quomodolibet immiscuerunt se divinis vel aliter cum rebellibus ecclesiae Romanae communicaverunt seu praestituerunt eisdem auxilium, consilium vel favorem, dummodo ad mandata ecclesiae veraciter redierint cum effectu, ab omnibus excommunicationis, suspensionis et interdicti sententiis et poenis aliis, quas ex causis huiusmodi incurrerunt, ac etiam dispensandi cum eis, qui praedictis ligati sententiis (non tamen alias in contemptum clavium) celebrando divina officia huiusmodi vel se eis (ut praemittitur) immiscendo aut suscipiendo ordines irregularitatis maculam contraxerunt: recepto per vos ante omnia ab eorum quolibet iuramento, quod de cetero similia vel aliquod de praemissis aliquatenus non attemptet, ac etiam imposita sibi super hiis poenitentia salutari, plenam et liberam committimus auctoritate praesentium potestatem. Datum Avinione, XVII kalendas iunii, anno decimo.a
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°609., p.301
-
Reg. Vat. t. 81, f. 355 ep. 2454.
1 -
(a) Istam facultatem summus pontifex revocat die 5 ianuarii 1327 (l. c. t. 114, f. 86, ep. 347).