« bullarium-franciscanum-3711 »

Dilecto filio Guillelmoa electo Alben.

Sedula nos pastoralis officii cura sollicitat etc. Dudum siquidem ecclesiae Alben. (pro eo, quod nos venerabilem fratrem nostrum Raymundum Theatin. olim Alben. episcopum, tunc et nunc in illis partibus commorantem, a vinculo, quo tenebatur eidem ecclesiae Alben., cui praeerat, absolventes, ad Theatin. ecclesiam tunc vacantem duximus transferendum) pastoris regimine destituta, nos volentes eidem Alben. ecclesiae paterna sollicitudine praecavere, ne dicta Alben. ecclesia dispendia prolixae vacationis incurreret (cum nullus praeter nos hac vice de ipsius Alben. ecclesiae ordinatione se intromittere potuerit, pro eo quod nos dudum circa promotionis nostrae principium ad apicem apostolicae dignitatis provisiones omnium ecclesiarum, etiam cathedralium, tunc apud sedem apostolicam vacantium, et quas per translationem episcoporum et electorum, quam per nos de ipsis extra Romanam curiam existentibus fieri contingeret, vacare contingeret in futurum, dispositioni nostrae et sedis eiusdem duximus specialiter reservandas, decernentes etc.), post deliberationem, quam cum fratribus nostris ad deputandum eidem ecclesiae Alben. personam utilem ac etiam fructuosam, cuius industria probitatis in suis valeret iuribus adaugeri ac etiam defensari, habuimus diligentem, ad te ordinis fratrum Minorum, ordinem ipsum expresse professum, in sacerdotio constitutum, cui de litterarum scientia, vitae munditia, honestate morum et vitae et aliis virtutum meritis fide digna testimonia suffragantur, direximus aciem nostrae mentis. Quibus omnibus diligenti meditatione pensatis, de persona tua, nobis et eisdem fratribus ob huiusmodi tuorum exigentiam meritorum accepta, de ipsorum fratrum consilio eidem Alben. ecclesiae providemus teque ipsi Alben. ecclesiae in episcopum praeficimus et pastorem, curam et administrationem ipsius tibi in spiritualibus et temporalibus plenarie committendo etc. Datum Avinione, V idus februarii, anno quinto.b