« bullarium-franciscanum-3687 »

a) Dilectis filiis ‥ priori Praedicatorum et ‥ guardiano Minorum fratrum ordinum Lucan.a

Intelleximus nuper relatione fideli, quod quondam Fulchus Rustici civis Lucanus, volens suae providere saluti, sibi pauperes Christi in certis bonis valoris trigintamillium librarum monetae Lucensis et ultra in suo testamento haeredes instituit. Cum igitur bonorum indistincte legatorum dispositio ad nos et apostolicam sedem pertinere noscatur, volumus et discretioni vestrae per apostolica scripta mandamus, quatenus vos vel alter vestrum per vos vel alium seu alios praedicta bona, in quibuscumque consistant, per detentores eorum nostro et eiusdem sedis nomine vobis faciatis integraliter assignari ..., rescripturi nobis per patentes litteras vestras vel instrumentum publicum harum seriem continentes, quidquid in praemissis duxeritis faciendum. Datum Avinione, VIII kalendas iunii, anno quarto.

b) Eisdem.

Ad nostri apostolatus auditum relatio fidedigna perduxit, quod quondam Labrus Volpelli civis Lucanus, dum adhuc viveret, volens suae providere saluti et de diversis pecuniarum summis ad ecclesiam Romanam spectantibus, quas iniuste receperat, debitam satisfactionem impendere, omnia bona sua eiusdem ecclesiae camerae in sua ultima voluntate pro huiusmodi satisfactione legavit. Quare discretioni vestrae per apostolica scripta mandamus quatenus .... praedicta bona a quibusvis tam clericis quam laicis, ad quos illa quomodolibet pervenissent, eiusdem ecclesiae nomine petere, exigere et ad manus vestras recipere cum integritate curetis etc. Datum ut supra.

c) Eisdem.

Fidedigna nuper assertione percepimus, quod Gerus de Fondora civis Lucanus, dum adhuc viveret, sexmillia florenorum auri ecclesiae Romanae in suo ultimo testamento legavit. Cum igitur de huiusmodi florenorum summa ipsius ecclesiae camerae nondum fuerit satisfactum, nos, volentes super hoc servare cameram praefatam indemnem, discretioni vestrae per apostolica scripta mandamus, quatenus .... praedicta sexmillia florenorum ab haeredibus vel executoribus testatoris eiusdem aut aliis quibuscunque, ad quos bona testatoris pervenissent eiusdem, petere, exigere ac recipere nostro et eiusdem ecclesiae nomine cum integritate curetis etc. Datum ut supra.