Général
-
Clément V (1305-1314)
-
Mandat infradictis, ut fratrem Boncortese al. Bonagratiam de Pergamo ad domum Vallis caprariae ord. Min. se conferre ibique tamquam inclusum remanere iubeant.1
-
1312, iulii 31, Grauselli.
-
1312
-
Dilectis filiis ‥ custodi et ‥ guardiano fratrum ordinis Minorum ac ‥ vicario in spiritualibus ven. fratris nostri [Castoni] archiepiscopi Mediolanen.
Cum nostrae intentionis existat, quod dilectus filius frater Boncortese dictus Bonagratia de Pergamoa ordinis vestri, qui conventui tuo Mediolanen., fili guardiane, dicitur assignatus, ad locum de Monte caprariob Convenarumc dioecesis ex certis causisd ibi moraturus accedat, volumus et discretioni vestrae mandamus, quatenus vos vel duo aut unus vestrum dicto fratri Boncortese ex parte nostra in virtute obedientiae districte mandare curetis, ut hinc ad kalendas novembris proxime venturas ad dictum locum se conferat, de ipso nullatenus recessurus absque nostra vel apostolicae sedis licentia speciali. Volumus autem, quod mandatum huiusmodi sic accelerare curetis, quod idem frater Boncortese commode usque ad kalendas easdem ad locum accedere valeat supradictum. Quidquid autem super praemissis duxeritis faciendum, nobis per vestras patentes litteras harum seriem continentes studeatis fideliter intimare. Datum in prioratu de Grausello prope Malausanam Vasionen. dioecesis, II kalendas augusti, pontificatus nostri anno septimo.e
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°204., pp.-90
-
Reg. Vat. t. 59, f. 242, ep. 94 de curia (n. 8849).
1 -
(a) Cfr. supra n. 158 not. 1 (pag. 65 not. 7 vers. fin.).
-
(b) Recte: Valle capraria (Valcabrère) in custodia Auxitan. provinciae Aquitaniae.
-
(c) Cominges in Guasconia.
-
(d) Qui in causa et iurgio paupertatis in ordine Min. servandae contra Ubertinum de Casali nimis ardenter et erga ipsam sedem apostolicam minus reverenter se gerebat.
-
(e) Quibus litteris receptis praedictus vicarius generalis archiepiscopi Mediolan. praedicto fratri Bonagratiae, qui ad instantiam Guilelmi (de Longis) de Pergamo, s. Nicolai in carcere Tull. diac. card., a ministro generali ord. Min. ad civitatem Pergami, ut pacem in ipsa civitate tractaret et fieri procuraret, missus erat, praecepit, quod ad dictum locum de Monte caprario dioec. Convenarum se conferret ibidem moraturus secundum formam ipsarum litterarum. Is vero, cum huiusmodi locus de Monte caprario non esset in dioec. Convenarum (sed de Valle capraria), habuit consilium a fr. Vitali (de Furno) tunc locum tenente et vicem gerente ministri generalis, quid esset agendum. Eius voluntas fuit, ut non contenderet, sed iret ad conventum fratrum Minorum, qui est in Valle capraria iuxta civitatem Convenarum. Et sic idem fr. Bonagratia accessit ad dictum locum et ibidem moram traxit, quamdiu Clemens V vixit. Quo mortuo de sui superioris voluntate recessit et venit Tolosam, ubi scriptum quoddam hac de re exaravit, quod adhuc in archivo Vatic. inter instrumenta miscellanea asservatur. Cfr. Ehrle l. c. t. III, p. 33-41, et supra n. 158 not. 1 (p. 65 not. 7 versus finem).