« bullarium-franciscanum-3209 »

BONIFACIUS &c.

Venerabili Fratri Henricoa Episcopo Lucanob Salutem, & Apostolicam Ben.

Romani Pontificis, quem Pastor ille cælestis, & Episcopus animarum, qui recte universa disponit, potestatis sibi plenitudine tradita, Ecclesiis prætulit universis, plena vigiliis sollicitudo requirit, ut circa cujuslibet statum Ecclesiæ sic vigilanter excogitet, sic prospiciat diligenter, ut per ejus providentiam circumspectam, prout locorum, & temporum qualitas exigit, Ecclesiis singulis Pastor accedat idoneus, & Rector providus deputetur; Sicque Ecclesiæ ipse, superni favoris auxilio suffragante, votivæ prosperitatis successibus gratulentur. Sane dudum Ecclesiâ Lucanâ per obitum bonæ memoriæ Paganellic Lucani Episcopi, Pastoris solatio destitutâ, Nos provisionem ipsius Ecclesiæ ea vice dispositioni nostræ, & Sedis Apostolicæ duximus reservandam, decernentes irritum, & inane, si secus a quoquam scienter, vel ignoranter in hac parte contingeret attentari. Sed postmodum dilectis filiis Archidiacono, & Capitulo dictæ Ecclesiæ Raynerium de Monte magno ejusdem Ecclesiæ Canonicum in Lucanum Episcopum de facto contra reservationem hujusmodi eligentibus, dictoque Raynerio hujusmodi electioni de se factæ, utpote de facto præsumptæ, consentire nolente; Nos de ipsius Ecclesiæ Lucanæ ordinatione celeri, ne diu viduitatis subjaceret incommodis, sollicite cogitantes, & cupientes illum eidem Ecclesiæ per nostræ providentiæ studium præsidere, de quo etiam haberemus notitiam, quòd ipsum clara meritorum suorum insignia redimirent, nec dubia esset ipsius caritas erga plebem suo regimini commendandandam, & in cujus fide fida recumberet securitas subditorum, ad personam tuam generis nobilitate conspicuamd, litterarum scientiae, munditia vitæ, Religionis observantia, ac honestate morum, & aliis virtutibus decoratam direximus aciem nostræ mentis, teque Ordinis Fratrum Minorum professum de Fratrum nostrorum consilio, & Apostolicæ plenitudine potestatis eidem Ecclesiæ Lucanæ præfecimus in Episcopum, & Pastorem, curam, & administrationem ipsius tibi plenam in spiritualibus, & temporalibus committendo, tibique postmodum fecimus per Venerabilem Fratrem nostrum N.f Ostien. & Velletren. Episcopum munus consecrationis impendi, firmam spem, fiduciamque tenentes, quòd eadem Ecclesia per tuæ circumspectionis industriam præservabitur a noxiis, & adversis, & grata, Deo auctore, spiritualiter, & temporaliter suscipiet incrementa. Reverenter itaque suscipe jugum Domini, & tua ejus oneri humiliter colla submitte, & curam, & administrationem ejusdem Ecclesiæ Lucanæ prudenter exequi studeas, & gregis tibi commissi custodiam prosequi diligenter, solerter, & constanter, oppositurus te murum pro Domo Domini ascendentibus ex adverso, ut laudabili de grege ipso coram Deo reddita ratione, Regnum ejus ab origine Mundi paratum cum electis acquirere valeas lætabundus in dilecta Domini tabernacula moraturus. Datum Anagniæ Kalendis Augusti, Pontificatus nostri Anno Sexto.