« bullarium-franciscanum-2282 »

MARTINUS &c.

Eisdem.

Dudum Monasterio Monialium S. Petri de Brugolaa ad Romanam Ecclesiam nullo medio, ut dicitur, pertinente, Ordinis S. Benedicti Mediolanen. Diœcesis Abbatissæ regimine destituto dilectæ in Christo Filiæ … Priorissa, & Conventus, ac dilectus Filius Gasparus Conversus ipsius Monasterii, ad quos communiter de antiquâ, & approbatâ, & hactenus pacificè observatâ consuetudine electio Abbatissæ ejusdem Monasterii pertinere dicitur, vocatis omnibus, qui voluerunt, debuerunt, & potuerunt commodè interesse, die ad hoc præfixâ pro futuræ Abbatissæ substitutione, prout moris est, convenientes in unum, & tandem per viam scrutinii procedere ad electionem hujusmodi eligentes, dilectas in Christo Filias Mariam Priorissam, & Renayam ac Pasiam ejusdem Monasterii Moniales suorum scrutatrices votorum concorditer elegerunt, quæ sua, & singularum de ipso Conventu, ac dicti Conversi vota secretò, & singillatim perscrutatæ, illa illicò dictis Conventui, & Converso publicarunt: Et tandem comperto, quòd omnes Moniales ipsius Monasterii, ac dictus Conversus, factâ collatione zeli ad zelum, meriti ad meritum, & numeri ad numerum, in Sophiam de Casateb dicti Monasterii Monialem, eâ exceptâ, quæ in quandam aliam ipsius Monasterii Monialem consenserat, vota sua direxerant; prædicta Benaya Monialis de mandato ipsarum Conventus, ac dicti Conversi, suo, & earumdem scrutatricum suarum nomine præfatam Sophiam in Abbatissam ejusdem Monasterii postulando elegit, quæ quidem Sophia postmodum electioni hujusmodi de se factæ dicitur consensisse. Cumque postmodum prædictæ Priorissa & Conventus, ac idem Conversus propter paupertatem &c.c

Datum apud Urbemveterem vi. Idus Januarii, Pontificatus Nostri Anno Secundo.