« bullarium-franciscanum-2205 »

NICOLAUS &c.

Dilectis Filiis Raymundo Electo Petragoricen.a , & antiquiori Prædicatorum in actu regendi, ac Minorum Ordinum Magistris Parisius Regentibusb in Theologica facultate Sal., & Ap. Ben.

Licet Cantorìac Ecclesiæ Morinen.d, quam quondam Magister Nicolaus dictus de Thesauro Cappellanus Noster Cantor ipsius Ecclesiæ, qui nuper apud Sedem Apostolicam diem clausit extremum, per ejus obitum apud Sedem eamdem vacare noscatur ad præsens; sicque nullus præter Nos Cantorìam conferre possit eamdem, constitutione fel. record. Clementis Papæ e prædecessoris Nostri super Ecclesiis, Personatibus, Dignitatibus, & Beneficiis Ecclesiasticis apud Sedem eamdem vacantibus, per Romanum dumtaxat Pontificem conferendis editâf obsistente; ac nihilominus Cantorìam ipsam infra tempus statutum per moderationem piæ memoriæ Gregorii Papæ Decimi prædecessoris Nostri super hoc adhibitam in Concilio Lugdunen.g donationi Apostolicæ specialiter duximus reservandam, decernentes irritum & inane, si secus de eâdem Cantorìa contigerit attemptari. Nos sperantes, quod de Cantorìa ipsa per vos salubriter, & providè disponatur; & de illâ non minus provideatur Ecclesiæ quam personæ, cui Cantorìam ipsam duxeritis conferendam; Discretioni vestræ, de qua plenam in Domino fiduciam obtinemus, per Apostolica scripta mandamus, quatenus prædictam Cantorìam alicui de Canonicis ejusdem Ecclesiæ, quem ad id idoneum esse putaveritis, scientiâ, vitâ, moribus, & ætate, nihilque sibi obviet de Canonicis Institutis, super quibus vestras intendimus conscientias onerare, auctoritate Nostrâ providere curetis. Non obstantibus Constitutione, ac Reservatione prædictis; vel quòd electio Cantoris ejusdem Ecclesiæ ad Capitulum Ecclesiæ prædictæ dicitur pertinere; seu Indulgentiâh, qua vobis, Filii Magistri, vel Ordinibus vestris ab eâdem Sede dicitur esse concessum, quòd non teneamini vos intromittere de iis, quæ vobis a Sede committuntur eâdem; proviso, quòd ille, cui de Cantorìa ipsâ per vos provideri contigerit, prout ipsius Cantorìæ Cura requirit, ad Ordines se faciat statutis temporibus promoveri, & personaliter resideat in Ecclesiâ supradictâ. Et quia scire cupimus diligentiam, quam in præmissis duxeritis adhibendam; quod super iis feceritis, Nobis per vestras litteras harum seriem continentes Nobis fideliter intimetis. Quòd si non omnes iis exequendis interesse potueritis, duo vestrum ea nihilominus exequantur.

Datum Suriani iv. Idus Julii, Pontificatus Nostri Anno Secundo.