« bullarium-franciscanum-1785 »

CLEMENS &c.

Venerabili Fratri … Episcopo, & dilecto Filio … Decano Virdunen.a Salutem, & Apost. Bened.

Exhibita Nobis ex parte vestra petitio continebat, quod felicis recordationis Urbanus Papa b prædecessor noster … Præposito Ecclesiæ Montis Falconis suis dedit litteris in mandatis, ut Magistrum Nicolaum de Duno Canonicum ipsius Ecclesiæ Montisfalconis in Virdunen. Ecclesia recipi faciens per se, vel per alium in Canonicum & in Fratrem, ei de Præbenda, si qua in eadem Virdunen. Ecclesia tunc vacabat, vel quamprimum ad id se offerret oportunitas, provideret: Contradictores auctoritate Apostolica appellatione postposita compescendo. Decrevit etiam idem Prædecessor irritum & inane, siquid super hoc contra mandatum hujusmodi contingeret attentari; quarum auctoritate dictus Magister Nicolaus in eadem Virdunen. Ecclesia receptus extitit in Canonicum & in Fratrem. Postmodum vero dictus Prædecessor Canonicatum ejusdem Ecclesiæ Virdunen. cum plenitudine juris Canonici, ac nihilominus Præbendam nulli alii de jure debitam, siqua in eadem Virdunen. Ecclesia tunc vacabat, Jacobo Clerico nato Ulrici dicti Advocati de Bellejo Militis Virdunen. Diœcesis auctoritate Apostolica contulit, investiens Stephanum Decanum Tullensemc ejusdem Jacobi nomine de eisdem. Alioquin quintam Præbendam in eadem Ecclesia proximo vacaturam conferendam dicto Jacobo donationi Apostolicæ reservavit, decernens irritum & inane, si secus de Præbenda ipsa a quoquam existeret attentatum. Non obstante, si aliqua auctoritate Sedis Apostolicæ, seu Legatorum ipsius, vel motu proprio capituli ejusdem Virdunen. Ecclesiæ in ea in Canonicos essent recepti, vel, ut reciperentur, instarent; aut si dictus Prædecessor pro aliis in dicta Ecclesia direxerat scripta sua, quibus omnibus prædictus Prædecessor eumdem Jacobum in hujusmodi Quintæ Præbendæ assecutione præferri voluit, sed quoad alias præbendas per hoc nullum præjudicium generari. Demum autem dicto Magistro Nicolao intendente Canonicatum, quem in dicta Virdunen. Ecclesia obtinebat, libere resignare, dictus Prædecessor ‥ Abbati Sancti Pauli Virdunen. Præmonstraten. Ordinis per suas mandavit litteras, ut ab eodem Nicolao libera prædicti Canonicatus resignatione recepta, Canonicatum ipsum Guillelmo Rectori Ecclesiæ Sancti Andreæ prædictæ Diœcesis conferre, & assignare curaret, faciens nihilominus eum in locum ipsius Nicolai ibidem in Canonicum recipi, & in Fratrem, ac de Præbenda, quæ dicto Nicolao fuisset debita, si Canonicus in eadem Virdunen. Ecclesia remansisset, si in eadem Ecclesia tunc vacabat, vel quamprimum ad id se offerret oportunitas, dicto Guillelmo per se, vel per alium provideret, ipsum in eorumdem Canonicatus, & Præbendæ possessionem inducens, vel induci faciens, & defendens inductum: Contradictores eâdem auctoritate appellatione postposita compescendo; sicque dictus Abbas ab eodem Magistro Nicolao ejusdem Canonicatus libera resignatione recepta, ipsum dicto Guillelmo contulit; ipsumque in præfata Virdunen. Ecclesia recipi fecit in Canonicum, & in Fratrem auctoritate hujusmodi litterarum. Denique Nicolao de Abbatia tunc Canonico præfatæ Ecclesiæ Virdunen. significante dicto Prædecessori, quod ipse locum, & Præbendam, quos in eâdem Ecclesia obtinebat, erat libere resignare paratus; dictus Prædecessor Venerabili Fratri nostro … Episcopo Autisiodoren.d suis dedit litteris in mandatis, ut ab eodem Nicolao de Abbatia ejusdem loci, & Præbendæ resignatione recepta, eos Jacobo de Bormonte Cappellano Nobilis Mulieris … Comitissæ Barri Ducise conferre, & assignare curaret, faciens ipsum in eâdem Ecclesia recipi in Canonicum, & in Fratrem; non obstante, si aliqui ejusdem Sedis, vel alia quavis auctoritate essent in prædicta Virdunen. Ecclesia recepti; vel, ut reciperentur, insisterent; quibus præfatus Prædecessor quoad alias Præbendas per hoc nullum voluit præjudicium generari: Contradictores præfata auctoritate appellatione postposita compescendo. Sicque dictus Episcopus ab eodem Nicolao de Abbatia prædictorum loci & Præbendæ libera resignatione recepta, locum & Præbendam eosdem præfato Jacobo de Bormonte contulit; ipsumque in præfata Virdunen. Ecclesia recipi fecit auctoritate hujusmodi litterarum in Canonicum & in Fratrem. Ad hæc quondam Juliano Archidiacono Meten.f apud eamdem Sedem viam universæ carnis ingresso, ac per ejus mortem vacantibus Canonicatu & Præbenda, quos in prædicta Virdunen. Ecclesia, cujus erat Canonicus, dum viveret, obtinebat; dictus Prædecessor Canoninicatum & Præbendam eosdem Apostolicæ donationi reservans decrevit irritum & inane, si secus de illis Apostolica quavis auctoritate a quoquam contingeret attentari, injuncto prædicto Abbati, ac tibi filii Decane, & ‥ Guardiano FF. Minorum Virdunen.g per suas litterash, ut prædictos Canonicatum & Præbendam Jacobo de Claustroi Presbytero per vos, vel per alium, aut alios conferre & assignare curaretis; ipsumque faceretis illorum pacifica possessione gaudere, facientes eum nihilominus in prælibata Virdunen. Ecclesia recipi in Canonicum, & in Fratrem admitti; non obstante, si aliqui Apostolica, vel alia quavis auctoritate essent in Ecclesia prædicta Virdunen. recepti, vel ut reciperentur, instarent; seu si pro aliis sub quacumque forma forent inibi Apostolica scripta directa, quibus dictus Prædecessor quoad alias Præbendas per hoc nullum voluit præjudicium generari: Contradictores auctoritate præfata appellatione postposita compescendo. Verum Abbas, & Guardianus prædicti, ac tu, fili Decane, Canonicatum & Præbendam eosdem Jacobo de Claustro contulistis eidem, facientes eum in prædicta Virdunen. Ecclesia in Canonicum recipi & in Fratrem auctoritate hujusmodi litterarum. Sanè post vacationem prædictarum duarum Præbendarum, quæ fuerunt ipsius Nicolai de Abbatia, & ejusdem Juliani Archidiaconi, vacaverunt tres aliæ Præbendæ in prædicta Ecclesia Virdunen.: Porro dictus Jacobus de Billejo asserens, quod idem Prædecessor quintam Præbendam in dicta Virdunen. Ecclesia vacaturam conferendam sibi donationi Apostolicæ reservarat, decernens irritum & inane, si secus de illa contigeret attentari; Præbendam, quæ per mortem Goberti Canonici dictæ Virdunen. Ecclesiæ in ea vacavit; quamque Quintam sibi postulat assignari. Prædictus verò Guillelmus ex adverso proponit, quod licet dictus Prædecessor hujusmodi Præbendam quintam conferendam dicto Jacobo de Billejo donationi Apostolicæ reservarit, prout superius est expressum; tamen prædictæ Præbendæ, quarum altera per resignationem dicti Nicolai de Abbatia, & alia per obitum dicti Juliani Archidiaconi in memorata Virdunen. Ecclesia vacaverunt; quasque dictus Prædecessor aliis contulerat, non debeant aliquatenus in hujusmodi Quinario numero computari; propter quod prædicta Præbenda, quæ fuit ipsius Goberti, non quinta, sed tertia potius est censenda; & sic Præbenda ipsa debebatur dicto Guillelmo, qui ad locum prædicti Nicolai de Duno, quem nullus de expectantibus in receptione, ac litterarum præsentatione præcedebat, receptus fuit in Ecclesia sæpedicta. Quia vero Jacobus de Billejo, & Guillelmus prædicti, videlicet uterque ipsorum ad præfatam Præbendam, quæ fuit ipsius Goberti, se petunt admitti; Nobis humiliter supplicastis, ut ad tollendam omnis quæstionis materiam declararemus, ad quem ipsorum Præbenda pertineat supradicta. Nos itaque attendentes, quod prædictus Prædecessor Quintam Præbendam vacaturam in sæpedicta Ecclesia conferendam dicto Jacobo de Billejo, prout continetur superius, donationi Apostolicæ reservavit; & ipsum cæteris præferri voluit in eadem; decrevitque irritum & inane, si secus de ipsa a quoquam contigeret attentari; decernimus, præmissis veris existentibus, quod prædicta Præbenda, quæ fuit ipsius Goberti; quæque Quinta est, sicut proponitur, dicto Jacobo debeatur de jure; cum præfatæ Præbendæ, quas prædictus Prædecessor aliis contulit, debeant in hujusmodi Quinario numero computari.

Datum Perusii vi. Idus Octobris, Pontificatus Nostri Anno Primo.