« bullarium-franciscanum-1690 »

URBANUS &c.

Venerabilibus Fratribusa ‥ Ferrarien., &b ‥ Tervisin. Episcopis Salutem, & Apostolicam Benedict.

Dilecti filii Renaldus, Bernardinus, Gualterius, & Robbaconte Renaldini, Raynerius, & Gabriel Rusticini, & Arigus Raynerii Cives, & Mercatores Senen. nostri, & Ecclesiæ Romanæ devoti Nobis significare curarunt, quod licet ipsi, & quidam ex eis suo, & sociorum suorum nomine Venerabilibus Fratribus nostris ‥ Patriarchæ Aquilegen.c, & nonnullis Suffraganeis ipsius, ac Abbatibus, Prioribus, Conventibus, & Capitulis, Communitatibus, Comitibus, Baronibus, ac quibusdam aliis Clericis, & Laicis Civitatis, & Diœcesis, ac Provinciæ Aquilegien.d quasdam pecuniarum summas mutuarint certis eis locis, & terminis persolvendas, eisdem Comitibus, Baronibus, Communitatibus, & Laicis se submittentibus super hoc jurisdictioni Ecclesiastici Judicis, nec non Patriarchæ, Suffraganeis, Abbatibus, Prioribus, Conventibus, Capitulis, Clericis, & aliis omnibus supradictis Constitutioni de duabus dietis editæ in Concilio Generali, & multis, & diversis exceptionibus, ac quibusdam aliis renuntiantibus; prout in Instrumentis, & litteris inde confectis expresse, & plenius dicitur contineri; nondum tamen est eis de hujusmodi pecuniarum summis satisfactum; quamquam solutionum termini sint elapsi; propter quod damna gravia, & expensas se asserunt incurrisse. Quocirca mandamus, quatenus vos, vel alter vestrum per vos, vel alium, seu alios hujusmodi debitores eorum, veritate cognita de præmissis, quod de dictis pecuniarum summis, in quibus tenentur eisdem, cum justis, & moderatis expensis, ac debita restauratione damnorum, usuris omnino cessantibus, debitam eis satisfactionem infra tres menses post monitionem vestram; prout exigunt litterarum, & instrumentorum ipsorum justi, & rationabiles tenores, impendant; ex parte nostra monere, & inducere studeatis. Quod si infra tempus hujusmodi vestris non acquieverint monitis, & inductionibus in hac parte; vos ex tunc in ipsorum debitorum, & majorum de Conventibus, Capitulis, & Communitatibus præfatis personas excommunicationis; in Conventus vero, Capitula, & Communitates, quæ contumaciter monitis vestris duxerint resistendum, vos, vel alter vestrum per vos, vel per alium, seu alios interdicti sententias promulgetis; & faciatis excommunicatos hujusmodi ab aliis arctius evitari. Si vero per mensem easdem sententias sustinuerint animo indurato, eas usque ad satisfactionem condignam, ubi, & quando expedire videritis, pulsatis campanis, & candelis accensis faciatis solemniter publicari; non obstantibus, si dictis Patriarchæ, Suffraganeis, & aliis quibuscumque a Sede Apostolica sit indultum, quod excommunicari, suspendi, vel interdici, seu extra suam Provinciam, vel Diœcesim, aut alia certa loca ad judicium evocari non possint per litteras Apostolicas non facientes plenam, & expressam, ac de verbo ad verbum de Indulto hujusmodi mentionem; ac prædicta Constitutione de duabus dietis edita in Concilio Generalie; dummodo ultra tertiam, vel quartam aliquis extra suam Diœcesim auctoritate præsentium ad judicium non trahatur; & illa, quam fel. recor. Innocentius Papa f prædecessor noster edidisse dinoscitur de aliquibus per generalem Clausulam Quidam alii ultra quatuor ad judicium non trahendis; sive qualibet alia indulgentia prædictæ Sedis, per quam effectus præsentium impediri valeat, vel differri. Proviso, ut quoad Pontificali dignitate præditos in processu, si quis fuerit contra eos habendus, gradus, & modestia juxta Constitutionem fel. record. Alexandri Papæ g prædecessoris nostri omnino servetur; seu excommunicationis sententia in Cives Senenses ex certis causis generaliter promulgata; vel aliqua inhibitione per Nos facta, ne ipsis Civibus de suis debitis debeat responderih; maxime cum quantum ad supradictos Mercatores sententiam, & inhibitionem hujusmodi duxerimus relaxandas.

Datum apud Urbemveterem Idibus Januarii, Pontificatus nostri Anno III.