Général
-
Urbain IV (1261-1264)
-
Bona hæreticorum, credentium, fautorum, & receptatorum ab Inquisitore Romanæ Ecclesiæ collata, & per ipsos credentes, fautores &c. a Communi Reatino redemta mandat revocari, & pro Romana Ecclesia conservari. (Ex Regesto Pontif. in Archivo Vatic. to. 2. p. 21. an. 1.)
-
Anno 1262. die 21. Julii.
-
1262
-
URBANUS &c.
Ad nostram noveris audientiam pervenisse, quod dilectus filius Frater G.c Ordinis Minorum Inquisitor hæreticæ pravitatis in Romana Provincia contra nonnullos Cives Reatin. hæreticorum credentesd, fautores, & receptatores Apostolica auctoritate procedens, tertiam partem bonorum mobilium, & immobilium credentium, fautorum, & receptatorum ipsorum Romanæ Ecclesiæ, seu nostræ Cameræ sententialiter applicavit. Sed dicti credentes, fautores, & receptatores consuetis eorum versutiis inhærentes bona hujusmodi a dilectis filiis ‥ Potestatee, & Communi Reatin. per se, vel per alios pro certo pretio licet modico emere in Ecclesiæ prædictæ præjudicium procurarunt. Ideoque Fraternitati tuæ per Apostolica scripta in virtute obedientiæ districte præcipiendo mandamus; quatenus hujusmodi emptiones, & venditiones auctoritate nostra penitus revocans, & rescindens, ac decernens nullius existere firmitatis, tertiam partem bonorum ipsorum tam mobilium, quam immobilium, ubicumque, & apud quoscumque illa inveneris, nostro, & prædictæ Ecclesiæ nomine recipere, ac fideliter conservare procures; invocato ad hoc, si necesse fuerit, auxilio brachii sæcularis; Contradictores per censuram Ecclesiasticam appellatione postposita compescendo.
Datum Viterbii xii. Kalen. Augusti, Pontificatus Nostri Anno Primo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°XXXVIII., pp.448-449
-
(a) Ven. Fratri ‥: Thomæ, qui ab anno 1252. usque ad annum 1265. Cathedram Reatinam moderatus est ex Italia Sac. Ughelli to. 1.
-
(b) Episcopo Reatino: Olim Sabinorum, nunc Umbriæ Civitatis in ditione Pontificia ad lacum Velinum, ac in finibus Regni Neapolitani, inter Narniam, & Aquilam fere mediæ, 15. mill. pas. utrinque distantis, ab urbe vero Roma 40. mill.
-
(c) Frater G.: Forsan Gentilis ex epist. 571. Alexandri IV. Litteras vestras &c.
-
(d) Credentes: De his, qui fuerint, dictum est in primo hujus Operis tomo.
-
(e) Potestate: Seu Prætore, atque Rectore, qui erat Offreducius de Miranda excommunicationis sententia percussus ex epist. 54. Dilectus filius nobilis &c. anno sequenti die 11. Aprilis data.