Général
-
Alexandre IV (1254-1261)
-
Ut per censuras Eccles. cogant Magistratus ad exequendas sententias ab ipsis contra hæreticos, fautores, suspectos &c. latas. (Ex Archivo Assisiati Conventus S. Francisci apud Pegnam ad calcem Directorii Inquisit., & ex Archivo Aracælit. n. 35. apud Waddingum in Annal. Minor. ad hunc annum n. 1., ac in Bullario Romano tom. 1. Bul. 17. al. tom. 3. Bul. 51.)
-
Anno 1260. die 20. Januarii.
-
1260
-
ALEXANDER &c.
Dilectis filiis ... Fratribus de Ord. Min. Inquisitoribus hæret. pravitatis in Provincia B. Francisci Sal., & Ap. Ben.
Ad audientiam nostram pervenit, quod Potestates, Rectores, Judices, Antiani, Officiales, Consilia, & Communitates quorumdam Castrorum, Locorum, & Civitatum Provinciæ Beati Francisci, in qua Inquisitio contra hæreticos vobis a Sede Apostolica est commissa, circa executiones sententiarum, quas contra notatos, & suspectos de hæretica pravitate, credentes, fautores, & receptatores eorum profertis, a vobis super hoc requisiti se interdum reddunt difficiles, & etiam negligentes: Nos itaque volentes, quod negotium Inquisitionis hujusmodi salutarem consequatur effectum, circa ea intendimus animo vigilanti, per quæ, submotis quibuscumque obstaculis, prædictum negotium Deo propitio de bono in melius dirigatur. Quocirca Universitati vestræ per Apostolica scripta mandamus, quatenus Potestates, Rectores, Judices, Antianos, Officiales, quocumque nomine censeantur, Consilia, & Communitates prædicta, quod hujusmodi sententias a vobis latas, & ferendas, etiam, sublato cujuslibet dilationis, & difficultatis obstaculo, executioni demandent, monitione præmissa, per Excommunicationis in personas Potestatum, Rectorum, Judicum, Antianorum, Officialium, & Consiliariorum, ac privationis ab officiis; & in Civitates, & Castra, & Loca hujusmodi Interdicti sententias, appellatione remota, cogatis; non obstante aliqua indulgentia Sedis Apostolicæ, de qua, ejusque tenore oporteat in nostris litteris plenam, & expressam mentionem fieri; & per quam effectus præsentium impediri valeat, vel differri.
Datum Anagniæ xiii. Kal. Februarii, Pontificatus Nostri Anno Sextoa.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°DXXVII., pp.380-381
-
(a) Testatur supracitatus Pegna se hujus Pontificis vidisse aliud rescriptum ejusdem tenoris Datum Laterani Idibus Decembris Pontificatus Anno Sexto, quod est in fine hujus anni; & ut videtur, Inquisitoribus alterius Provinciæ.