Général
-
Alexandre IV (1254-1261)
-
Ut Monasterii Capellanus eas absolvere valeat ab excommunicatione, si quam ob manuum violentam injectionem incurrent, nisi &c. (Ex Reges. Vatic. epist. 223. apud Waddingum in Reges. Pontif. num. 26.)
-
Anno 1257. die 23. Martii.
-
1257
-
ALEXANDER &c.
Dilectis in Christo filiabus ‥ Abbatissæ, & Conventui Monasterii S. Agnetis Asten.a ad Romanam Ecclesiam nullo medio pertinen. Ordinis S. Damiani Salutem, & Apostol. Benedictionem.
Desideriis vestris in iis affectu benevolo libenter annuimus, per quæ vestri status tranquillitas procuretur. Sane fuit Nobis pro parte vestra humiliter supplicatum, ut, si contingeret interdum aliquas vestri Monasterii Moniales in se ipsas manus injicere violentas, providere talibus paterna sollicitudine curaremus. Nos itaque vestris supplicationibus inclinati, auctoritate vobis præsentium indulgemus, ut, si Monasterium ipsum ad Romanam Ecclesiam, prout asseritis, nullo medio pertinet, Capellanus ipsius Monasterii Presbyter, qui pro tempore fuerit in eodem, possit easdem Moniales auctoritate nostra a sententia excommunicationis, si quam per hoc incurrunt, absolvere; nisi adeo fuerit gravis, & enormis excessus, quod super eo sit Sedes Apostolica merito consulenda; præsentibus post quinquennium minime valituris. Nulli ergo omnino hominum liceat hanc paginam nostræ concessionis infringere &c. Si quis autem &c.
Datum Laterani x. Kalendas Aprilis, Pontificatus Nostri Anno Tertiob.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CCCXIV., pp.207-208
-
(a) S. Agnetis Asten.: Cujus Monasterii mentio facta est ad Bullam Innocentii IV. Religionis vestræ meretur &c. anno 1244. die 6. Maji editam; vel alterius Clarissarum hujus Civitatis Monasterii sub tit. S. Seraphiæ.
-
(b) Aliud privilegium huic Monasterio concessit Alexander, ut legata de male ablatis, quorum veri possessores ignorarentur, recipere valeret, quod confirmavit Nicolaus IV. anno 1288. ex Waddingo ad eum annum n. 44.