Général
-
Alexandre IV (1254-1261)
-
Indulgentias unius anni, & 40. dierum impertitur Fratribus Min. annuatim ad Capitulum Generale accedentibus. (Ex Autographo Conv. S. Franc. Civit. Bononien.)
-
Anno 1257. die 25. Februarii.
-
1257
-
ALEXANDER &c.
Dilectis filiis ... Ministroa , & Fratribus Minoribus Salutem, & Apostol. Benedictionem.
Licet corporalium laborum incommoda, quæ propter Christum ab ejus Fidelibus perferuntur, accommoda reddere debet certa fiducia spiritualium præmiorum; & in eis odor lucri pium desiderium excitare: ut tamen delectabilia fiant, & per hoc amplius ad promerenda sempiterna gaudia fructuosa, devotas personas hujusmodi laborum fascibus oneratas, sæpe muneribus spiritualium gratiarum indulgentiis videlicet, & remissionibus de concessa Nobis in Beato Petro auctoritatis plenitudine recreamus; ut in studiis suis indefessa perseverantia consistentes æternæ salutis bravium per instantiam fortitudinis comprehendere mereantur. Cum igitur de diversis, ac remotis Mundi partibus Fratres vestri Ordinis ad Generale Capitulumb accedendo diversas experiantur angustias, plurimosque labores; Nos ad eos facile perferendos, ipsorumque Fratrum humeros volentes fieri adjectione alicujus præmii fortiores, universis personis dicti Ordinis, & aliisc vere pœnitentibus, & confessis ad Generale Capitulum ipsius Ordinis, quod pro tempore celebrabitur, accedentibus annuatim, de Omnipotentis Dei misericordia, & Beatorum Petri, & Pauli Apostolorum ejus auctoritate confisi unum annum & quadraginta dies de injunctis sibi pœnitentiis misericorditer relaxamusd.
Datum, ut supra.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CCC., p.198
-
(a) Ministro: Nempe Generali S. Bonaventuræ hoc anno die 2. Februarii Romæ in Comitiis generalibus, cum ipse Parisiis esset, electo juxta nostram sententiam, quæ alias contra Waddingum validis rationibus ostendetur.
-
(b) Generale Capitulum: Quod ex Regulæ Minorum cap. 8. cogi debebat in festo Pentecostes semel in tribus annis, vel ad alium terminum majorem, vel minorem, sicut a Generali Ministro fuerit ordinatum: ut hoc anno factum est, quo non Pentecostes tempore, sed in festo Purificationis B. M. Virginis.
-
(c) Et aliis: Non solum Fratribus Ordinis, sed etiam iis, qui quibusdam ex causis propriis, vel ipsorum Fratrum causa ad dictum Capitulum adibant, Indulgentia laxabatur.
-
(d) Relaxamus: Quam Indulgentiam postmodum ejus successores continuarunt, ac interdum ampliarunt.