Général
-
Alexandre IV (1254-1261)
-
Ut Monasterium S. Firmi Majoris Veronen. Civitatis Fratribus Min. assignet, in possessionem inducat, inductosque defendat. (Ex Ughello tom. 5. Ital. Sac. in Episc. Veronen. num. 89. al. 90.)
-
Anno 1257. die 25. Februarii.
-
1257
-
ALEXANDER &c.
Dilecto filio ... Electo Veronen.a Salutem, & Apostol. Benedictionem.
Sinceræ devotionis affectus, quem ad dilectos filios Fratres Minores inter alios Religiosos specialiter, ipsorumque Ordinem gerimus, Nos inducit, ut præcipua eos interdum benevolentiæ, ac favoris gratia prosequamur. Cum itaque dilecti filii Fratres ipsius Ordinis apud Veronen. Civitatem morantesb minus commode, sicut ex ipsorum significatione accepimus, sint in loco, ubi consistunt ad præsens; Nos super hoc tranquillitati, & consolationi ipsorum providere volentes discretionem tuam rogamus, & hortamur attente, per Apostolica scripta firmiter præcipiendo mandantes, quatenus Monasterium, & Ecclesiam S. Firmi majorisc Civitatis prædictæ, in quo pauci Monachi Ordinis Sancti Benedicti morari dicuntur, cum domibus, horto, & aliis apenditiis suis, jam dictis Monachis in aliis Monasteriis tuæ Civitatis, & Diœcesis sui Ordinis collocatis, præfatis Fratribus ad opus eorum auctoritate nostra libere concedere, ac assignare procures; ipsos, vel aliquem alium eorum nomine in corporalem ipsius possessionem inducens, & defendens inductos. Contradictores quoslibet, & rebelles, monitione præmissa, per censuram Ecclesiasticam, sublato appellationis obstaculo, compescendo. Alioquin dilecto filio Electo Ravennat.d Apostolicæ Sedis Legato litteris nostris injungimuse, ut ipse super hoc mandatum Apostolicum exequatur.
Datum Laterani v. Kalendas Martii, Pontificatus Nostri Anno Tertio.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CCXCVIII., p.197
-
(a) Electo Veronen.: Gerardo Cassadocha anno superiori assumpto, annoque 1262. defuncto ex Ughello tom. 5. Ital. Sacræ num. 89. in Episc. Veronen.
-
(b) Apud Veronen. Civitatem morantes: Anno enim 1230. Raynerus Zeno N. V. Prætor construi fecit Ecclesiam S. Francisco dicatam in suburbio ea ex parte, quam Civitellam al. Cittadella vulgo vocant; ut indicat lapidea inscriptio ad Januam Cœnobii veteris locata teste Moscardo lib. 7. Hist. Veronen., & cit. Ughello; pauloque post ex proximis Civitatibus Fratres Minores evocarunt ad eam excolendam adjecto parvo, & pro qualitate temporum Cœnobio; de quo agit Waddingus in Annal. Min. ad annum 1232. n. 43.
-
(c) Monasterium, et Ecclesiam S. Firmi majoris: Quam aberrans Waddingus citatus ait concessam anno 1261., & quam una cum Monasterio concesserat permutandam Innocentius IV. per litteras: Cum sicut ex parte &c. Episcopo Veronensi anno 1249. die 10. Maji directas.
-
(d) Electo Ravennat.: Philippo Fontanæ Ferrariensi, qui hoc tempore in expeditione erat contra Ezelinum Tyrannum, Patavio jam anno superiori recepto per ipsum Legatum.
-
(e) Litteris nostris iniungimus: Quæ litteræ proxime subduntur. Etenim Ughellus supra laudatus affirmat, Pontificem pro hac re nedum Electo Ravennat., verum etiam Episcopo Tarvisino litteras dedisse: nihilominus repugnantibus Monachis nonnisi sub Clemente V. auxilio Henrici VII. Imp. quietam, ac pacificam possessionem Fratres adeptos esse anno 1312., quod & fatetur Waddingus loco supracitato, & ad ann. 1261. num. 22., in possessione tamen hujus loci Fratres extitisse fidem astruunt litteræ Clementis IV. Licet is, de cujus munere venit &c. anno 1265. die 20. Augusti datis, & infra suo loco legendis.