« bullarium-franciscanum-1266 »

ALEXANDER &c.

Dilectis filiis ....a de Fabrianob Camerinen Diœcesis Salutem, & Apostolicam Benedictionem.

Nulla dubietas Christifidelibus imminet, quin dilecti filii Fratres de Ordine Minorum pro innocentis suæ vitæ meritis occurrant gratissimi Divinæ oculis Majestatis: maxime cum ipsorum studentium sub extrema paupertate vivere, ac virtutum cultui desudare ad hoc frequenter aspiret affectio; ut per eorum ministerium salus proveniat animarum. Hæc siquidem præclara merita vos, prout mirantes accepimus, & referimus cum dolore, attendere dedignantes dictos Fratres multis gravatis injuriis; & ipsorum quietem, ac pacem, Divino timore postposito, damnabiliter impeditis ad illius excessum malitiæ nequiter prorumpendo, quod eos, ac ipsorum Ordinem in læsione famæ non minus graviter offendistis, quam si de ipsorum cordibus vitæ spiracula auferretis; præsertim cum dedecoris, vel improperii sarcina damno præponderet cuicumque; & minor perditione famæ omnis gravitas reputetur. Ad hæc licet dicti Fratres malum in bono vincere satagentes a vobis humili supplicatione petiverint, ut ab ipsorum molestiis Divinæ pietatis intuitu cessaretis; vos tamen quasi ducatis pro solatio haberi de offensa Christi notabiles, & ministrorum ejus reputari nefarios contemptores, piis dictorum Fratrum votis noluistis annuere; sed adjecistis ipsos per vos, & alios gravius solito perturbare, prohibentes eosdem in Ecclesia vestra proponere verbum Dei; & ceteros Clericos Castri vestri, ut hoc ipsum in suis Ecclesiis faciant, inducentes; quin immo & indulgentias Fratribus eisdem favorabiliter ab Apostolica Sede concessas temerarie, ut fertur; contemnitis comminantes, quod sicut nec pro jam concessis, ita nec pro imposterum concedendis ab ipsorum Fratrum vexatione proponitis resilire. Cum itaque nil sit magis menti nostræ contrarium, vel oppositum voluntati, quam quod omnium Conditor, & Redemptor in membris ejus, & præcipue in eisdem Fratribus, qui sunt ipsius speciales Nuncii, & præcones, pati contumeliam videatur; discretioni vestræ (si tamen in vobis habetur aliqua, qui contra Fratres ipsos tam enormiter, atque impie processistis) per Apostolica scripta in virtute obedientiæ, ac etiam sub excommunicationis pœna districte præcipiendo mandamus, quatenus sicut Divinam, & nostram offensam devitari cupitis, a qualibet prædictorum Fratrum injuria, & molestatione cessetis; dantes nihilominus operam efficacem, ut hoc ipsum faciant alii Clerici, qui vestra procurante nequitia facti sunt eisdem Fratribus inimici. Studeatis etiam Deum, & personam nostram in Fratribus ipsis ita mente vigili assidue venerari, quod & præcedens culpa vestra in oblivionem veniat; & debitæ vobis maledictionis meritum in benedictionis gratiam convertatur. Alioquin per privationem officii, & beneficii vobis scire dabitur, quam detestabilis apud Nos dictorum Fratrum persecutio censeatur; quorum evangelizantium pacem, evangelizantium bona manus mundissimas, & etiam pedes innoxios, si esset in vobis spiritus consilii, & timoris Domini, piis aliquando deberetis affectibus osculari; maxime cum Fratrum ipsorum semita quasi lux splendens procedat; & crescat usque ad perfectum diem sub cultu devotissimo Divini nominis, & continuo studio pœnitentiæ salutaris.

Datum Laterani xi. Kalendas Martii, Pontificatus Nostri Anno Tertio.