« bullarium-franciscanum-1213 »

ALEXANDER &c.

Carissimo in Christo filio ‥ Illustri Regi Franciæa Salutem, & Apostolicam Benedictionem.

Veri Solis radius in te vere fulgere conspicitur, qui depulsis penitus pravis actibus in lucis operibus delectaris; qui vitatis omnino noctis tenebris in diei lumine ambulas horrendo vitia, & amplexando virtutes, fugiendo a noxiis, & salutaribus inhærendo. Revera clarent in te firma Fides, & pura devotio erga cælestem Regem, cujus dono Regnum terrenum nosceris obtinere; dum sic ejus beneplacitis te coaptas, quod ad eum dirigens mentem tuam ipsum in tuis actionibus constituis fundamentum, ad illa tuum libitum convertis, & studium, quæ in ejus conspectu sint placita, sibique delectabilem referant suavitatem odoris, in benignitate, clementia, misericordia, & charitatis subsidiis te principaliter exercendo. Sed etsi hæc in persona tua, velut sidera luminosa, resplendeant; est tamen ibi aliud, quod ampliori fulgore rutilat, & sicut luminare majus, & altius profert jubar, inter alia in te lucentia, quasi Solis immittens majestatem, illa videlicet ardens, & lucens charitas, qua personas Religiosas, & Divinis mancipatas servitiis gratiose prosequeris eas tenere diligendo, favore muniendo Regio, multis beneficiis confovendo, amplectendo conversationem ipsarum, & eas in tua familiaritate specialiter retinendo. Inter quas dilectos filios Fratres Prædicatores, & Minores tanquam perfectos Christi servos, cultores Fidei, eruditos, & prudentes, ac providos Consiliarios animarum tuæ mansuetudinis præcipui amoris vinculo astrinxisti. Certe congruit, & expedit, quod Princeps tam Catholicus familiares habeat tam electos; quod in ipsius munda, & nitida Curia viri sine nota, & macula conversentur; quodque domus ejus generali præconio laudata per Orbem etiam ex Ministrorum, & famulorum Domini societate, ac præsentia commendetur. Horum namque Fratrum clari Ordines jam dudum a Sede Apostolica, sicut sacri, & conspicui approbati, velut eminentia candelabra, & duo magna luminaria in Ecclesia Dei lucent; quoniam ab his sanctæ Doctrinæ lumen ubique per Mundum copiose diffunditur; ab his Christi Evangelium ardenter, & efficaciter prædicatur; ab his recta, & sana consilia, & exempla salutaria exhibentur. Convenienter itaque Regia Serenitas in tam proborum Virorum, & Religiosorum tam illustrium consortio jucundatur; quia ex hoc ipsa & merito crescit fama, & Principibus aliis ad honestum, & bonum materia est, & judex. De tanta ergo benevolentia, & gratia, quam eisdem Fratribus sincere ostendis, & exhibes, celsitudinem tuam multipliciter in Domino commendantes dignas tibi gratiarum referimus actiones; recognoscentes Nos fore tibi de hoc specialius obligatos; quia tu es ipsis in necessitate plenum subsidium, contra molestias tutum præsidium, & in adversitate sui status solidum firmamentum. Sane dilectos filios Magistros Johannem, & Petrum Clericos, & Nuncios tuos, quos ad Sedem Apostolicam destinasti, affectuose recepimus; & in his, quæ proposuerunt, & petiverunt ex parte tua pro eisdem Fratribus, benigne ipsos audire curavimus, & efficaciter exaudire. Et ecce Libellum illumb perniciosum, & detestabilem, quem quidam Sacræ Scripturæ intelligentiam se habere fatentes, sed divertentes a tramite recti sensus contra Christi pauperes vitæ suæ subsidia salubriter mendicantes componere præsumpserunt, delatum ad Nos per eosdem Nuncios, tanquam iniquum, scelestum & execrabilem, & instructiones, & documenta in eo tradita, utpote prava, falsa, & nefaria, de Fratrum nostrorum consilio, auctoritate Apostolica, præsente magna Fidelium multitudine, reprobanda duximus, & in perpetuum condemnanda, districte præcipientes, ut quicumque libellum ipsum habuerit, eum infra octo dies, ex quo hujusmodi nostram reprobationem, & condemnationem sciverit, prorsus destruere, & abolere procuret; & in illos, qui hujus nostri præcepti fuerint contemptores, excommunicationis sententiam promulgantes; firmiter in virtute obedientiæ prohibendo, ne quisquam prædictum libellum ore Apostolico jam damnatum approbare, vel quomodolibet defensare præsumat; & si præsumpserit, tanquam contumax, inobediens, & rebellis Romanæ Ecclesiæ ab omnibus Fidelibus habeaturc; sicut hæc omnia in literis nostris de prædicta reprobatione, ac condemnatione confectis, quas tibi transmittimus, plenius continenturd. Ideoque Magnificentiam tuam omni, qua possumus, affectione rogamus, quatenus memoratos Fratres consueta benignitate, ac gratia prosequaris, eos tanquam probatos, & acceptos Christi Ministros habeas attentius commendatos, & ab injuriis, & molestiis protegas, & præserves; ita quod tuo securi munimine quietam, & gratam impendere Domino valeant servitutem.

Datum Anagniæ xvi. Kal. Novembris, Pontificatus Nostri Anno Secundo.