Général
-
Alexandre IV (1254-1261)
-
Mandat inquiri super Monasterio Græcorum de Tribus pueris, & si oportuerit, reformetur in Ordine Floren ‥ (Ex Archivo Vatic. in Pontif. Reges. epist. 428. an. 2.)
-
Anno 1256. die 11. Octobris.
-
1256
-
ALEXANDER &c.
Venerabili Fratri ...a Episcopo Bisinianen.b , & dilectis filiis Archidiacono Squillacen.c , ac Magistro Amato Canonico Cusentinod Salutem, & Apostolicam Benedictionem.
Sua Nobis dilecti filii ...e Abbas, & Conventus Monasterii Floren.f petitione monstrarunt, quod cum Nos intellecto, quod Monasterium Græcorum de Tribus Puerisg Gerentin. Diocesish prope idem Monasterium Floren. situm in spiritualibus, & temporalibus graviter collapsum erat, dilecto filio ‥i Electo Cusentin., ejusque Collegæ injunxerimus viva voce, ut ad prædictum Monasterium Græcorum personaliter accedentes illud de Floren. Ordine reformarent; propter malitiam temporis in hujusmodi negotio nullus habitus est processus; sicque idem Monasterium Græcorum remanet deformatum. Nos itaque volentes super hoc salubre remedium adhibere discretioni vestræ per Apostolica scripta mandamus, quatenus ad prædictum Monasterium Græcorum personaliter accedentes illud, si quod de ipsius reformatione proponitur, veritate fulcitur, de prædicto Ordine auctoritate nostra per vos, vel alios reformetis; salvo jure Diocesani Episcopij in iis, quæ Floren. Ordini non obviant, institutis. Contradictores per censuram Ecclesiasticam appellatione postposita compescendo. Quod si non omnes iis exequendis interesse potueritis, tu, Frater Episcope, ea nihilominus exequaris.
Datum Anagniæ v. Idus Octobris, Pontificatus Nostri Anno Secundo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CCXLII., p.163
-
(a) Ven. Fratri ....: Raynucio O. M., de quo extat epistola 591. Innocentii IV. Cum sicut intelleximus &c. in primo hujus Operis tomo p. 767. (c)
-
(b) Episcopo Bisinianen.: In Calabria, ut in no. (b) ad prædictam epistolam 591.
-
(c) Squillacen.: Al. Scyllacen. vulgo Squillaci urbis magnæ Græciæ al. Brutiorum nunc ulterioris Calabriæ sub Archiepiscopo Rhegino in ora Jonii maris.
-
(d) Cusentino: Urbis ejusdem Calabriæ Archiepiscopali dignitate fulgentis, & ex præcipuis Regni Neapolitani 12. mill. a mari Tyrrheno distantis.
-
(e) Dilecti Filii ...: Orlandus ex Ughello to. 9. Ital. Sac. in Strongylen. Episc. n. 3.
-
(f) Monasterii Floren.: In Calabria citeriori a Joachino Curatii Abbate Ord. Cisterc. circa ann. 1190. fundati ex Manriquio in Annal. Cistercien. to. 3. ad eum ann. cap. 6. n. 1. & seqq.
-
(g) De tribus pueris: Ordinis Basilian.
-
(h) Gerentin dioc.: Al. Geruntin urbis Calabriæ sub Archiepiscopo S. Severinæ jam pridem eversæ, cujus sedes translata est, vel unita Cariatensi Ecclesiæ.
-
(i) Dilecto Filio....: Bartholomæo Pignatello Neapolit. anno 1254. sub Innocentio IV. promoto ex Ughello to. 9. Ital. Sac. n. 15. al. 18.
-
(j) Diocesani Episcopi: Nempe Geruntini.