« bullarium-franciscanum-45 »

GREGORIUS &c.

Universis Fratribus de Pœnitentia per Italiam constitutis Salutem, & Apostolicam Benedictionem.

Detestanda humani generis hostis invidia tanto pertinacius persequitur servos Christi, & armans suos satellites contra ipsos, ab ejus servitio dolosis illos adinventionibus nititur amovere, quanto perspicacius intuetur ipsos, hujus Mundi vanitatibus derelictis, adhuc existentes in corpore in terrenis jam mente in cælestibus habitare; ac abnegantes secularia desideria propter Deum jam frui non perituris, sed æternis deliciis, & gaudiis sempiternis: Unde secundum Evangelicam veritatem, cum immundus Spiritus exiret ab homine, ipsum in exeundo plus solito discerpebat; & exeuntem Dei Populum de Ægypto non prius Ægyptii persequi desierunt, quam omnes nutu divino uno genere mortis extincti dignum suis actionibus meruerunt interitum invenire. Ipsum omnium Redemptorem, cum etiam post Baptismi lavacrum in deserto quadraginta diebus, & totidem noctibus jejunasset, idem malignus Spiritus aggredi non expavit. Propter quod quicumque ad Dei servitutem accedit, juxta sententiam veram Sapientis, in justitia, & timore debet ad tentationem animum præparare. Sanè felicis recordationis Honoriusa Papa Prædecessor noster attendens, vos fructus pœnitentiæ facientes, ab hujus sæculi filiis angustiis inexquisitis affligi, per hoc fovendos esse; laudabili actione Religionem vestram amplexans in visceribus Jesu Christi prosecutus est gratia speciali, mandans universis Archiepiscopis per Italiam constitutis, ut vos servaret a Juramentis, quæ Civitatum, & Locorum Rectores super eorum sequela extorquere a vobis illicitè contendebant; defendentes vos, nè officia publica recipere, vel nova exactionum vel alterius gravaminis subire onera contingeret vos compelli. Sed filii tenebrarum, qui humana sapientes tenebras lucem, & lucem tenebras ponere didicerunt, per malignæ interpretationis calumniam, sic vestram indulgentiam vacuant, ut gravioribus injuriis affligamini nunc, quam prius, cum non eratis tali privilegio communiti. Nam cum dicti Rectores a vobis non possint super sequela exigere juramentum, innumeros quasi casus excogitant, quibus vos jurare compellant, graviora onera vobis, quam aliis suis Civibus imponentes. Nec fructus bonorum vestrorum vos permittunt pauperibus erogare, licet debitis oneribus, quæ subire tenemini, nihil deperire contingat; alias vos plus debito, & amplius solito molestantes. Undè nobis humiliter supplicastis, ut vobis indulgere misericorditer dignaremur, nè aliquod juramentum, nisi forsan pacis, & fidei, calumniæ, vel Testimonii facere teneamini; & nè plusquam vestri Cives impositione onerum aggravari possitis; & ut fructus bonorum vestrorum causa pietatis impendere valeatis personis, quibus expedire videritis, elargiri; & ut injuriam non patiamini propter vestrorum Civium debita, vel delicta, nec teneamini, cum super his culpabiles non sitis, debita solvere aliorum. Nos igitur attendentes, vos viam perfectionis ingressos tanto a Sectatoribus hujus Mundi vehementius impugnari, quanto magis iidem dissimiles vestris actibus comprobantur, ac per hoc, ut veritatis integritas obumbraretur, sinistræ interpretationis calumniam machinari: Universitati vestræ, de quorum religione plenè confidimus, licentiam super prædictis omnibus, auctoritate præsentium indulgemus, & concedimus postulata; districtiùs injungentes, ut concessa vobis gratia sic uti laudabiliter studeatis, nè ab aliquo vestro convertatur forsitan in abusum; quia privilegio vobis concesso contingeret vos privari, si ejus inveniremini abusores. Nulli ergo omnino hominum liceat hanc paginam nostræ Concessionis infringere, vel ei ausu temerario contraire. Si quis autem hoc attentare præsumpserit, indignationem Omnipotentis Dei, & Beatorum Apostolorum Petri, & Pauli se noverit incursurum.b

Datum Laterani tertio Kalend. Aprilis Pontificatus Nostri Anno Secundo.c