« bullarium-franciscanum-1 »

HONORIUS EPISCOPUS Servus Servorum Dei.

Venerabili Fratri a ‥ Hostiensi Episcopo Apostolicæ Sedis Legato b Salutem, & Apostolicam Benedictionem.

Litteræ tuæ Nobis exhibitæ continebant, quod quamplures Virgines, & aliæ Mulieres, quibus secundum instabilitatem prosperitatis mundanæ prosperum statum in seculo sua videtur nobilitas polliceri, eo, qui, ubi vult, spirat, potante vino compunctionis easdem, & manifestis revelationibus dante illis significationem, ut fugiant a facie arcus, desiderant fugere pompas, & divitias hujus mundi, & fabricari sibi aliqua domicilia, in quibus vivant nihil possidentes sub Cælo, exceptis Domiciliis ipsis, & construendis Oratoriis in eisdem. Cum ad hoc tibi fundi a pluribus Ecclesiæ Romanæ nomine offerantur; quidam volentes sibi reservari correctionem, institutionem, & destitutionem in illis, non verentur salubre illarum propositum impedire; quare tua Fraternitas postulavit, ut super iis paterna providere sollicitudine curaremus. Volentes igitur piis dictarum mulierum desideriis sic favorem Apostolicum impertiri, ut & ipsæ assequantur suæ petitionis effectum; & Diœcesani locorum, & alii, in quorum Parocchiis loca ipsa consistunt, justam non habeant materiam murmurandi; præsentium tibi auctoritate mandamus, quatenus hujusmodi fundos in jus, & proprietatem Ecclesiæ Romanæ nomine ipsius recipias, & Ecclesias construendas in ipsis soli Apostolicæ Sedi subesse decernasc; ita quod nullus Diœcesanus, vel alia Ecclesiastica, Secularisve persona in eis possit sibi jus aliquod vendicare; quandiu quidem fuerint sine possessionibus, decimis, mortuariis, per quæ solet locorum Diœcesanis, & aliis Ecclesiarum Prælatis præjudicium generari. Si verò eas in futurum habere contigerit possessiones, vel alia supradicta, nolumus ipsos Diœcesanos, vel alios hujusmodi exemptionis prætextu jure Canonico defraudari.

Datum Laterani vi. Kalendas Septembris Pontificatus Nostri Anno Tertio.