« bullarium-franciscanum-3714 »

Dilectis in Christo filiabus abbatissae et sororibus monasterii sancti Corporis Christi Neapolitan. ordinis s. Clarae tam praesentibus quam futuris.

Speciosus forma etc. Sane carissima in Christo filia nostra Sanctia, regina Siciliae illustris, omnipotenti Deo piae mentis offerre cupiens gratissimum holocaustum, ob ipsius reverentiam et gloriosissimae beatae Mariae Virginis matris eius in civitate Neapolitana monasterium vestrum ordinis sanctae Clarae, quod « sancti Corporis Christi » est vocabulo insignitum et in quo virgineus chorus sororum dicti ordinis in copioso numero gratum praebet Altissimo famulatum, pia devotione construxit et ei competentes dotes etiam assignavit et ampliores dotes ad plenam sufficientiam earumdem sororum et certi numeri fratrum ordinis Minorum, per quos ad praesens ibidem in divinis officiis deservitur et deservietur imposterum, disposuit assignare, carissimi in Christo filii nostri Roberti regis Siciliae illustris viri sui in constructione et dotatione huiusmodi expresso accedente consensu. Ut in dicto monasterio perpetuis futuris temporibus religio vigeat Deo grata, eadem regina quamdam piam et providam ordinationem de eiusdem regis consensu fecisse noscitur in dicto monasterio perpetuo observandam, prout praemissa omnia et singula in instrumento publico inde confecto, sigillo dictorum regis et reginae munito, cuius tenorem inspici et examinari fecimus diligenter de verbo ad verbum et praesentibus inseri fecimus, plenius continetur. Nos igitur eiusdem reginae supplicationibus inclinati, quae super constructione, dotatione et ordinatione praedictis facta sunt, rata habentes et grata, illa auctoritate apostolica ex certa scientia confirmamus et praesentis scripti patrocinio communimus. Tenor autem dicti instrumenti per omnia talis est.a Nulli ergo etc. Datum Avinione, XIV kal. martii, anno quinto.