« bullarium-franciscanum-3715 »

Dilectis in Christo filiabus abbatissae et conventui monasterii sororum inclusarum sancti Corporis Christi Neapolitan. ordinis sanctae Clarae.

Eximiae devotionis sinceritas, quam carissima in Christo filia nostra Sanctia, regina Siciliae illustris, ad nos et apostolicam sedem gerit, sic eam per sublimia merita nostris et eiusdem sedis conspectibus dignam reddunt, ut petitionibus suis, quantum cum Deo possumus, favorabiliter annuamus. Ipsius itaque reginae supplicationibus inclinati illamque vobis intendentes gratiam liberaliter impertiri, per quam, sicut pie cupitis, sublatis impedimentis quibuslibet, possitis eo devotius quo quietius sub regularis obedientiae debito virtutum Domino famulari, ut nulli personae, quibuscumque statu seu praeeminentia fulgeat vel cuiusvis etiam dignitatis et conditionis existat, intra septa monasterii vestri, cuius ipsa regina fundatrix existit, seu eiusdem monasterii et fratrum Minorum locum, qui pro vestra et ipsius monasterii gubernatione commorantur ibidem, liceat imposterum habitare neque domum sive quamlibet aliam mansionem inibi facere seu etiam construere causa morandi, vobis auctoritate praesentium indulgemus. Nulli ergo etc. Datum Avinione, VI kalendas martii, anno quinto.