« bullarium-franciscanum-903 »

INNOCENTIUS &c.

Dilectis Filiis Ministro a , & Fratribus Administrationis Sancti Francisci b Ordinis Minorum Salutem & Apostolicam Benedictionem.

Oblata Nobis ex parte vestra petitio continebat, quod Venerabilis Frater noster Spoletanus Episcopusc vobis Ecclesiam Sancti Andreæd de Ispello Spoletanæ Diœcesis cum domibus, ædificiis, casalenis, & horto juxta ipsam positis, Capituli Spoletani, & Clericorum ipsius Ecclesiæ accedente ad hoc consensu, piè contulit; prout spectabat ad ipsum; ceteris possessionibus ejusdem Ecclesiæ substentationi Clericorum ipsorum reservatis, & post decessum, vel cessionem eorum per ejusdem Episcopi, vel Successorum ejus providentiam disponendis; prout in Litteris, & Instrumentis publicis inde confectis plenius continetur. Vestris itaque precibus inclinati collationem hujusmodi ratam habentes, & gratam ipsa auctoritate Apostolica confirmamus, & præsentis scripti patrocinio communimus; tenores Litterarum, & Instrumentorum hujusmodi præsentibus de verbo ad verbum inseri facientes, qui tales sunt:

“Bartholomæuse Dei gratia Spoletanus Episcopus, dilectis sibi in Christo Ministro Ministrationis S. Francisci Ordinis Minorum, & aliis Fratribus ejusdem Ordinis Salutem in Domino Jesu Christo. Ut Ordinis vestri generosa plantatio apud Castrum de Espellof nostræ Diœcesis fructus animarum pariat salutares; cum in eodem Castro nondum habueritis locum aptum, Nos de consensu nostri Capituli Ecclesiam Sancti Andreæ Castri præfati cum domibus, ædificiis, casalenis, & horto in circuitu ipsius positis vobis, & vestro Ordini damus, & concedimus; ut ibi libere ac in perpetuum, sicut & in aliis locis vestri Ordinis in nostra Diæcesi positis Domino famulantes Deo dignas laudes, & pro nobis, & aliis Christifidelibus vivis, & defunctis pias orationes offeratis Domino Jesu Christo; maxime cum ad hoc Clericorum ejusdem Ecclesiæ consensus accedat; sicut apparere noscitur per publicum Istrumentum. Salvis tamen, & reservatis per omnia possessionibus aliis Ecclesiæ memoratæ Clericis, qui fuerint instituti in ea; & quibus prædictæ possessiones per nos, & Successores nostros in posterum conferentur. Reservata etiam cura animarum Parochianorum Ecclesiæ supradictæ nostro mandato; quousque de ea aliud duxerimus disponendum. In cujus rei memoriam præsentium tenorem nostri sigilli munimine fecimus roborari, sub anno Domini millesimo ducentesimo quinquagesimo quarto, tempore Domini Innocentii Papæ Quarti, Pontificatus ejus Anno Undecimo. Ego Joannes Prior consensi, & subscripsi. Ego Andreas Prior Sanctorum Apostolorum Canonicus Spoletanus consensi, & subscripsi. Ego Presbyter Leonardus consensi, & subscripsi. Ego Presbyter Matthæus consensi, & subscripsi. Ego Ægidius Canonicus consensi, & subscripsi. Ego Presbyter Matthæus consensi, & subscripsi. Joannes Petri Canonicus subscripsit. Ego Savinus Canonicus consensi, & subscripsi. Ego Presbyter Jacobus consensi, & subscripsi. Ego Raynaldus Prior Sancti Felicis de Narco Canonicus Spoletanus consensi, & subscripsi.

“In nomine Domini Nostri Salvatoris Jesu Christi anno ab ejusdem Nativitate millesimo ducentesimo quinquagesimo tertio, tempore Domini Innocentii Papæ Quarti mense Septembris die undecimo intrantis Indictione undecima, Magister Simon Vercellensis, Franciscus de Assisio, & Jacobus de Aspello Clerici Ecclesiæ Sancti Andreæ de Aspello propria eorum voluntate, nec vi, nec dolo ducti, coram me Jacobo Notario, & Testibus subscriptis de his rogatis supposuerunt se, & eorum voluntates ordinationi, dispositioni, provisioni, atque mandatis Domini B. Episcopi Spoletani super concessione, collatione, & traditione Ecclesiæ Sancti Andreæ de Aspello, & ædificiorum, & pertinentiarum ejus, & Horto in circuitu faciendo, vel faciendis Fratribus Minoribus, vel personis idoneis pro eisdem, promittentes gratum, & ratum habere, & contra non venire per se, & successores ipsorum, quidquid prædictus Episcopus super præmissis ordinaverit, statuerit, disposuerit, providebit, atque mandabit de prædictis Ecclesia, muris, ædificiis, circuitu ejus, & Horto; reservatis sibi specialiter, & expressè, ac principaliter omnibus possessionibus Ecclesiæ supradictæ, & fructibus ipsarum possessionum, & arborum; ita tamen quod caveatur eisdem Clericis, & Successoribus ipsorum per literas Apostolicas, quod in dictis possessionibus, redditibus, & juribus nullum præjudicium generetur; & quod ipsi a cura animarum Parochianorum dictæ Ecclesiæ penitus absolvantur. Actum Assisii in Hospitio dicti Magistri Simonis coram Domino Petro Lupo de Urbe, Guillelmo ejus famulo, Lucarello Domini Transarici, & Ægidio Petri de Aspello, testibus rogatis hujus rei. Ego Jacobus Thomæ Sanctæ Romanæ Ecclesiæ Notarius, & Ordinarius Judex interfui supradictis, & ea rogatus scripsi, & publicavi.”

Nulli ergo omnino hominum liceat, hanc paginam nostræ confirmationis infringere, vel ei ausu &c.

Datum Laterani iii. Idus Martii, Pontificatus Nostri Anno Undecimo.