« bullarium-franciscanum-904 »

INNOCENTIUS &c.

Venerabili Fratri Johanni de Dist a Episcopo Lubicensi b Salutem, & Apostolicam Benedictionem.

Licet ex illo generali privilegio, quo Beato Petro, & per eum Dominus Ecclesiæ Romanæ indulsit, Episcoporum translatio ad Romanum Pontificem de jure pertineat; nec sit absque ipsius licentia facienda; hoc tamen tunc demum fieri debet, cum urgens necessitas, & evidens utilitas id exposcunt. Sane Nos intellecto, quod Venerabilis Frater nosterc … Archiepiscopus Prusciæ, cui Episcopatum Lubicen. tunc Pastoris solatio destitutum pro sustentatione sua jamdudum commendasse dicimurd, in loco idoneo, ubi residere, ac de proventibus Archiepiscopalibus commode sustentari potest, erexerat Sedem suame; & considerato per hoc prudenter, quod locorum sollicitudines sunt certis imponendæ personis; & locis personarum ministeria providenda, ut ex personarum industria locorum crescat utilitas; & ex opportunitate locorum personis succrescat facultas uberior se in iis, quæ Dei sunt, utilius exercendi; nuper dilecto Filio Nostro P.f Sancti Georgii ad Velum aureum Diacono Cardinali nostras direximus litterasg continentes, ut commendationem hujusmodi, seu concessionem factam ipsi Archiepiscopo revocans te tunc Episcopum Sambiensem, de cujus vitæ integritate, dono scientiæ, ac honestate morum indubitatam fiduciam gerimus, absolveret a vinculo, quo tenebaris Ecclesiæ Sambiensis; ac auctoritate nostra præficeret Lubicensi Ecclesiæ in Episcopum, & Pastorem, plena tibi spiritualium, & temporalium ejusdem administratione commissa, & concessa nihilominus te ad ipsam Lubicensem Ecclesiam licentia transferendi; ac faceret tibi per se, vel alium a Capitulo, & Clero Civitatis & Diœcesis Lubicen. obedientiam, & reverentiam debitam exhiberi; Contradictores per censuram Ecclesiasticam appellatione postposita compescendo. Cum autem idem Cardinalis hujusmodi auctoritate mandati commendationem ipsam, & quamlibet concessionem factam ipsi Archiepiscopo revocans, & te absolvens a vinculo ejusdem Ecclesiæ Sambiensis præfecerit te in Pastorem, & Episcopum ejusdem Ecclesiæ Lubicensish; prout in ipsius Cardinalis litterisi super hoc confectis plenius continetur. Nos tuis supplicationibus inclinati, quod ab eodem Cardinali super hoc factum est, gratum, & ratum habentes id auctoritate Apostolica confirmamus, & præsentis scripti patrocinio communimus; supplentes de plenitudine potestatis defectum, si quis extitit in hac parte; ac tenorem litterarum ipsarum præsentibus de verbo ad verbum inseri facientes, qui talis est:

“Venerabili in Christo Patri, Fratri Johanni de Diest Ordinis Minorum Dei gratia Episcopo Sambiensi Petrus miseratione Divina Sancti Georgii ad Velum aureum Diaconus Cardinalis salutem in Domino. Precibus magnifici Principis Domini Willelmi Regis Romanorumj illustris Sedis Apostolicæ providentia condescendens, ac intendens consideratione ipsius se vobis exhibere munificam, direxit nobis litteras in hunc modum.

Innocentius Episcopus Servus Servorum Dei dilecto Filio Petro Sancti Georgii ad velum aureum Diacono Cardinali Salutem, & Apostolicam Benedictionem. Cum Venerabilis Frater noster &c. k

“Nos igitur hujusmodi auctoritate mandati commendationem, seu concessionem de dicto Episcopatu factam, eidem Archiepiscopo revocantes, absolvimus vos a vinculo, quo tenemini Ecclesiæ Sambiensi, & præficimus Lubicen. Ecclesiæ in Episcopum, & Pastorem, plenam vobis spiritualium, & temporalium administrationem ipsius Lubicensis Ecclesiæ committentes, transferendi Nos ad eam vobis nihilominus licentiam concedendo. In cujus rei testimonium præsentes litteras fecimus sigilli nostri munimine roborari. Datum Romæ vii. Idus Martii Anno Domini mccliv.”

Nulli ergo omnino hominum liceat hanc paginam nostræ confirmationis infringere, vel ei ausu &c.

Datum Laterani xv. Kalendas Aprilis, Pontificatus Nostri Anno Undecimo.