Général
-
Martin IV (1281-1285)
-
Gerardo monacho quondam abbati monasterii Sancti Germani de Pratis Parisiensis ad Romanam ecclesiam nullo medio pertinentis Ordinis Sancti Benedicti
-
XII kalendas februarii, anno primo
-
-
Orvieto
-
Mandement (littere cum filo canapis)
-
[Registre de la chancellerie apostolique] Reg. Vat. Martini IV (n° 41) an. 1, ep. 99, fol. 26b. In ep. 100 episcopus Meldensis et mag. Gilo notarius apost., archidiaconus de Pontivo in eccles. Ambianensi, et praepositus eccl. S. Audomari Morinens. dioec. ut conservatores ordinantur. Ad Gerardum de Moreto capellanum papae, quondam abbatem S. Germani, Martinus IV etiam xiij kal. April. an. 1 direxit epistolam (Reg. Vat. Martini IV an. 1, ep. 108), ubi praeterea litterae circa idem negotium ad praedictos exsecutores.
-
Ici reprise de Henri Denifle, Émile Châtelain, Chartularium Universitatis Parisiensis. I. Ab anno MCC usque ad annum MCCLXXXVI, Paris : Delalain, 1889, n. 509, p. 593 [en ligne].
-
?
-
?
-
Martinus IV Gerardo, quondam abbati S. Germani de Pratis, qui olim pro bono pacis in gratiam Universitatis Parisiensis regimini abbatiae cessit, bona et jura omnia ei collata confirmat.
-
Gerardo monacho quondam abbati monasterii Sancti Germani de Pratis Parisiensis ad Romanam ecclesiam nullo medio pertinentis Ordinis Sancti Benedicti.
In executione regiminis monasterii Sancti Germani de Pratis Parisiens. ad Romanam ecclesiam nullo medio pertinentis, Ordinis Sancti Benedicti, sic virtus Domini tibi astitisse dinoscitur ut apud nos et quamplures seu multos alios fama tua clara et laudabilis habeatur. Olim siquidem inter te et nonnullos monachos predicti monasterii communiter ex parte una, et universitatem magistrorum ac scolarium Parisiens. ex altera, occasione quorumdam fundamentorum latitudinis amplioris, que tu, dum adhuc esses abbas monasterii memorati, ejusque monachi non longe a septis ipsius in via seu secus viam qua itur ad prata scolarium Parisiens. mandavistis et fecistis construi viam ipsam plus solito coartando, gravis et dispendiose nimis discensionis materia suscitata et enormibus ac periculosis et detestandis exinde subsecutis excessibus, in quorumdam de Universitate predicta personas, ausu dampnabili perpetratis : nos tunc in minori officio constituti et in illis partibus legationis fungentes officio, cum ex parte ipsius Universitatis ac alias etiam publicus super hiis clamor validus ad nostram audientiam pervenisset, ad inquirendum de supradictis excessibus exolvendo nostri partes officii duximus procedendum, hujusmodi quidem nostro pendente processu, tu contemptis comodis propriis et honoris postposito tui statu, pro bono pacis et ejusdem tranquillitate monasterii ac etiam Universitatis reverentia supradicte, sponte in nostris manibus abbatie ipsius monasterii cedere curavisti, nosque hujusmodi tuam cessionem duximus admittendam. Ac tandem tuam tam humilem et spontaneam cessionem, tueque devotionis affectum, quam erga Romanam gessisti ecclesiam, benigne considerationis indagine metientes, pensantes quoque quod tu laudabiliter dicto monasterio prefuisti, bona ejus temporalia multipliciter augmentando, et propter hoc dignum extimantes et consonum rationi ut tibi de premissis bonis decentis et honorabilis provisionis gratia conferretur, tibi pro persona tua tuaque familia competenti de voluntate communi consensu unanimi ac instantibus precibus totius conventus monasterii prelibati singulariter expressis ab omnibus de ipso conventu a nobis propter hoc specialiter convocato in nostra presentia tunc in eodem monasterio constitutis, premissorum bonorum nichilominus sufficientia diligenter inspecta, de Brolii Pareti et Euranville villis ejusdem monasterii cum domibus, grangiis, juribus et pertinentiis suis (septuaginta et tribus libris parisiens., quas idem conventus in ipsa villa de Euranville percipit annuatim, exceptis), necnon de quadam domo de Yssiaco ad dictum monasterium pertinente cum omnibus que infra clausuram ipsius domus consistunt, ac de quibusdam redditibus centum librarum parisiens., que ab hominibus ville de Antogniaco Parisiens. diocesis ex certa causa annis singulis dicto monasterio solvebantur, auctoritate legationis nostre providimus a te quoad vixeris possidendis. Universis ergo et singulis de predicto conventu super hoc specialiter requisitis, ac provisionem hujusmodi ratam habentibus et acceptam, nos nichilominus irritum decernimus et inane, si secus de villis et aliis supradictis vel aliquo seu aliquibus eorundem contra prefatam provisionem nostram contingeret attemptari, prout in patentibus litteris nostris confectis exinde, ac sigillo quo utebamur tempore legationis premisse signatis plenius continetur. Ad hoc dilectis filiis .. Carnotens. et .. Meledunens. in ecclesia Senonensi archidiaconis per alias nostras litteras auctoritate predicta mandavimus, ut ipsi vel alter eorum te vel procuratorem tuum tuo nomine in corporalem possessionem villarum, domorum, grangiarum, jurium, pertinentiarum et aliorum premissorum inducerent et tuerentur inductum, facientes tibi vel dicto procuratori pro te de villarum, domorum, grangiarum et aliorum predictorum fructibus, redditibus, juribus, proventibus et obventionibus universis integre responderi, contradictores per censuram ecclesiasticam compescendo. Verum quia processu temporis, dum adhuc premisse legationis officio fungeremur, intelleximus quod postquam tu in premissorum possessionem hujusmodi mandati nostri auctoritate inductus fuisti, nonnulli de conventu predicto se hujusmodi provisioni nostre, cui prius consenserant, opponebant pro sue libito voluntatis, nos volentes et talium temeritatem compescere ac provisionem eandem robur obtinere perpetue firmitatis, in contradictores et rebelles excommunicationis sententiam promulgavimus dictisque archidiaconis per alias adhuc nostras litteras auctoritate premissa dedimus in mandatis ut ipsi vel alter eorum eandem excommunicationis sententiam in predicto monasterio solemniter publicarent, qui super hoc mandatum nostrum exequi studuerunt. Quare humiliter petebas a nobis ut, cum post hec omnia ex dispensatione divina culmen ascenderimus apostolice dignitatis et in plenitudinem simus potestatis assumpti, opportunum firmumque robur provisioni predicte adicere dignaremur. Cum itaque premissa omnia memorie habeamus, nec illud oblivioni commiserimus quod tu sicut premittitur sepedictum monasterium dum abbas ejus existeres augmentasti laudabiliter in premissis, quodque pro bono dumtaxat pacis et concordie ac reverentia Universitatis ejusdem sponte cessisti predicte regimini abbatie, te ad hoc quodammodo ingerendo, nos digne tuis devotis inclinati precibus provisionem eandem et quicquid nos ipsi dumtaxat circa eam tempore dicte legationis nostre fecimus et in premissis nostris litteris continetur, non obstantibus quibuscumque appellationibus ab eadem provisione ad sedem apostolicam interjectis, et omnibus aliis propositionibus ac allegationibus per procuratorem .. abbatis dicti monasterii coram nobis factis seu quibusvis contrariis constitutionibus, statutis, seu consuetudinibus juramento, confirmatione apostolica, seu quacumque firmitate vallatis auctoritate apostolica ex certa scientia de nostre potestatis plenitudine approbamus, rata et firma habemus et haberi volumus et etiam confirmamus, ac presentis scripti patrocinio communimus. Decernentes nichilominus irritum et inane, si secus super premissis vel aliquo premissorum fuerit attemptatum. Tenores autem tam dictarum nostrarum quam ipsius conventus consensum super hoc exhibitum continentium litterarum de verbo ad verbum presentibus fecimus annotari, qui tales sunt. Sequuntur tres epistolae Simonis cardinalis legati et una Simonis prioris S. Germani an. 1278. Cf. supra n° 484. Nulli ergo, etc., nostre approbationis, confirmationis et constitutionis, etc. Si quis autem, etc.
Dat. apud Urbem Veterem XII kalendas Februarii, anno primo. -
1. ?
-
2. ?
-
3. ?
Informations
Acte
aposcripta
admin
(IRHT), dans
APOSCRIPTA database
APOSCRIPTA database – Lettres des papes, dir. J. Théry, CIHAM/UMR 5648, éd. électronique TELMA (IRHT), Orléans, 2017 [en ligne], acte n. 164561 (aposcripta-16995), http://telma.irht.cnrs.fr/chartes/aposcripta/notice/164561 (mise à jour : 20/09/2021).