[1]

C'est li proces et l'enqueste faite par Symon de la Sale, clerc, et Guillaume Grenoulie, prevost de Sens et donné inquisiteurs de par la court nostre seigneur le roy seur les griés et seur les oustrages qui s'ensuient, faiz à l'abbé de Potières et a ses moinnes, si comme il disoient, et au baillif de Chaumont en tant comme il touche nostre seigneur le roy, en la meson dudit abbé a Vausoué, du baillif, des prevos et de la conmunauté de Muyssi. Fait en l'an de grace Mid. CC. IIII^XX et huit.

Ce sont les griés, vilenies, oustrages, forces, violences, injures, despiz et damages grans et vilains faiz a l'abbé de Potieres et a ses moinnes et a ses genz, que il a denoncié et fait a savoir au roy et a sa court, et requis que il plaise au roy que il les face adrecier et amender selonc ce que le fet de ivre a l'onneur de Dieu et de sainte Eglise et du roy, conme idiz abbés et ses biens, especialment sa meson de Vausouef et les apartenances soient et ont esté de lonc tans de la garde le roy par raison de Champangne.

Premierement que Guillaume Putvilain, baillif de Muixi, menaça ledit abbé et dit qu'il li abatroit sadite meson seur sa teste, et que il sauroit se sa teste estoit aussit dure conme les pierre, et pluseurs autres menaces a desclarier en lieu et en tans. Item que empres cesdites menaces le prevost de Muixi, l'evesque de Langres, le queun de ladite vile de Muixi, de honmes, de fanmes et de clercs, et de pluseurs autres genz estranges, a desclarier en lieu et en tans se il le convient, vindrent, du conmandement au baillif, o armes, conme gent de guerre, a lances, a glaives, a arbalestes, Vausouef, ou lidiz abbés estoit, tout apensez et de certaine science de mal faire.

3. Item que il crierent conmunement : A la mort, a la mort, au murtrier. Et vilainement et ostragieusement ladite meson brisierent et entrerent ens, et brisierent la prison de ladite meson et en trairent 4 maufecteurs et les delivrerent.

4. Item il percierent les murs de ladite meson a martiaus ou a autres instrumenz que il avoient aporté de certain propos et ladite meson et l'eglise d'icelle meson, le pressouer, les vessiaus derompirent et abatirent en tout ou en grant partie.

5. Item que il destruisirent et emporterent et ravirent touz les biens dudit abbé qui estoient en la meson et en l'eglise desus dites et les seaus dudit abbé, son argent, ses chevaus, ses liz, ses vestemenz et les aournemenz de ladite eglise et touz les autres biens que il peürent trouver a ravir, si que il demoura poi ou noiant pour lesdites forces.

6. Item que il essaierent et s'efforcierent pluseurs foiz laidement et vilainnement a ocirre et murtrir ledit abbé et ses moinnes qui estoient aveuc lui et ses mesgnies joute l'autel de ladite eglise, et pluseurs d'iceus navrerent et 1 de ses moinnes, et pluseurs autres griés, vilenies et injures firent audit abbé et a ses genz et pluseurs damages oudit lieu, et es apartenances et en pluseurs autres lieus a armes.

7. Item que il firent les injures, forces, violences et damages desus diz, si conme desus est dit, present 1 sergiant le roy qui iqui estoit de par les genz le roy pour garder ladite meson et les biens d'icelle et les apartenances, et qui bien leur deffendi et denea pluseurs foiz de par le roy, et de rien n'en obeîrent, ainz li coururent sus ; et le chacierent et s'enfoui en l'eglise aveuc ledit abbé.

8. Item que poi empres ces choses desus dites ainsit faites li sergiant de Muixi pristrent frere Symon leur convert et le lieutenant dudit abbé, et le trainerent par les piez par les rues et a la parfin il le mistrent en vilenne prison et en cruel, et le ondrent tant conme il leur plut, ja soit ce que lidiz abbés, ses moinnes et ses convers soient exans.

9. Item que, poi avant le fait devant dit, il brisierent a armes la vile dudit abbé, de Vausouef, et firent vendengier ses vignes a force et o armès et emporter ses blez et pluseurs autres damages li firent.

10. Item, conme il eussent entendu que les genz le roy devoient venir a ladite vile de Muixi pour venger ledit fait et punir et prendre lesdiz maufecteurs, il garnirent le chastiau de Muici contre les genz le roy nobles et non nobles et de armes. Et amena Bernardins, li maires de Chastellion, les genz de Chastellion a armes audit chasteau de Muixi et les i tint en garnison contre les genz le roy et rompirent les pons dudit chastel et couperent les arbres environ) que les genz du roy n'i peusent entrer ne avenir, et pluseurs autres griés, vilenies et injures ont il fait audit abbé et a ses genz... Pourcoi requiert lidiz abbés et s'anploie en denonçant que il plaise a la court que elle face savoir et enquerre des faiz desusdiz briement ; meismement conme lidiz abbés n'ait plus autre meson ou il puissa habiter ne receullir ne recevoir ses biens sëûrement, ne n'a de coi vivre pour le ravissement desus dit, se li roys n'i met briement conseil.

Item des choses dessus dites offre a prouver le baillif de Chaumont ce qui li en touche et a son office en apartient et especialment que les forfaiz desusdiz furent faiz pendant plaiz ou ajournement devant le roy ou son commandement, entre ledit abbé d'une part et l'evesque de Lengres et ses genz de l'autre, pour raison de l'euvre de ladite meson de Vausouef et retient ledit abbé que le recort dudit baillif qui a veu le lieu et la forfaiture dudit lieu li vaille ce qu'il li pourra et devra valoir.

[2^e peau] Ce sont les reponses et les deffenses a l'evesque de Langres, a son baillif, a son prevost et a la communeté de Muyssi ; en tant comme il touche a chacun d'aus, contre les articles proposees de par li abbés de Potieres et de par le baillif de Chaumont en tant comme il touche a chacun d'aus.

Au premier article et a touz les autres responnent li baillif, le prevost et la conmuneté de Muxy et nient toutes les choses contenues en iceus, ce excepté de li baillif de Muyssi connoist bien que 1 sergiant nostre seigneur le roy, qui a non Jehan Li Enfes, vint audit baillif le diemenche apres la S. Remi garniz des lettres pendans du baillif de Chaumont, et li requist et quemanda de par nostre seigneur le roy qu'il baillast des genz de Muyssi pour aler avec lui a Vausouef pour querre prisonniers que li abbé de Potieres tenoit en sa prison, que il ne vouloit ne rendre ne recroire audit sergiant, ne obeïr a lui si conme il disoit. Et lors lidiz bailli commanda au prevost de Muyssi qu'il baillast des genz de Muyssi audit sergiant pour mener aveuc lui a Vausoué.

Et dit encore lidit baillif que il conmanda au prevost que il deffendist a ceus qui iroient aveuc ledit sergiant a Vausoué que il se gardassent de mespenre. Et dit bien ledit baillis au sergiant que il ne menast pas la gent l'evesque au lieu dont lidiz evesque ne sa gent deüssent avoir painne.

Item que ceste mesme chose reconnoist bien lidiz prevost et dit que il meïsmes, du conmandement du baillif, bailla audit sergiant les genz dudit evesque, et qu'i leur conmanda bien qu'il se gardassent de mespenre.

Item requenoist bien la quemuneté des genz de Muyssi que du conmandement au prevost et au sergiant devant diz, pluseurs d'aus alerent a Vausouef aveuc ledit sergiant, et que celui sergiant aloit criant parmi la vile : Venez tretuit après moi de par le roy. Et quant il furent au Vausouf li sergiant brisa la porte de la meson de Vausoué et conmanda a ladite quemune que il entrassent leans aveuc lui et aidassent a querir les prisons, et il si firent. Et quant il les eurent trouvez, il les ramenerent a Muyssi. Et toutes les choses continues es autres articles lesdiz baillif, prevost et la quemuneté de Muyssi leur mettent en ni, en tant conme il touche a chacun d'aus ...

Item a l'article uquel il est contenu que li chasteau de Muyssi fust garniz contre la gent le roy, dit lidiz evesques qu'il a bien proposé devant le roy et encore propose qu'il conmanda a faire la garnison de Muyssi en tel maniere que maufecteurs ne feïssent damage, mes il conmanda especialment a son baillif et enpres li envoia ses lettres, que se les genz le roy i venoient, fussent grant ou petit, a pié ou a cheval, que on leur delivrast le chastel, et leur lessast l'en faire leur volonté. Et de ce fait il est excusé devant le roy souffisaument. Et a ce que lidiz baillis de Chaumont dit que la garnison du chastel fu faite contre lui especialment, il n'en est a oü, pour ce qu'il n'i vint ne n'envoia, ne ne si fu pas deuee le chastiau.

Des choses desusdites offrent lidiz evesques, son baillif, son prevost et la quemuneté de Muyssi a prouver ce qu'il leur en souffira.

[3^e peau] Ce sont les tesmoings amenez de par l'abbé de Potieres et de par le baillif de Chaumont contre le bailli de Muyssi les prevos et la communeté d'ice meisme lieu, l'an de grace mil. C C. IIII^XX et VIII, a prouver lesgriés contenuz es articles desusdiz, et l'estimation des damages.

I. Estienne Champenois...

...Dit... que environ a 1 an, 1 jour duquel il ne li souvient, il ala a Chastellion sur Sainne. Et dit... que il requist au baillif de Muyssi qui lors estoit au lieu desus dit qu'il li recreüst ou feïst recroire 1 cheval qui estoit a 1 sergiant l'abbé de Potieres. Et apres mout de paroles lidit baillis dit a celui qui parle : Se je meïsmes l'avoie juré, cil de Muyssi abatront audit abbé sa meson de Vausouef, et sara lidiz abbés se sa testa sera plus dure que la pierre de la meson. Requis qui i fu present, il dit : Jehan de Saint Bourc, et pluseurs autres desquiex il ne li remembre...

II. Jehan de Saint Bourc...

...Dit... que environ a 1 an, 1 jour de coi il ne li souvient oï... que Estienne li Champenois... requist au baillif de Muyssi que il li feïst recreance d'un cheval qui estoit a 1 sergiant l'abbé de Potieres... et apres mout de paroles oï que ledit baillis audit Estienne : Se je l'avoie juré, les genz de Muyssi abatront audit abbé sa meson de Vausouef et sara sa teste se elle sera plus sure que la pierre de la meson. Req. du lieu, il dit que ce fu a Chastellion sus Sainne. Reg. des presenz, il dit : lidiz Estienne Champenois et pluseurs autres dont il ne li souvient.

... Vraies... excepté qu'il ne set se ce fu du conmandement au baillif. Reg. conment il le set, il dit par ce qu'il i fu present et le vit. Reg. du tens et du jour : le diemenche apres la S. Remi...

III. Jehannot dit Li Devinez...dit... que environ le conmencement de septembre nouvellement passé le baillif de Chaumont establi celui qui parle sergiant nostre seigneur le roy pour garder de par le roy les mesons de Vausouef, les biens et les apartenances d'icelle, laquele est en la garde nostre seigneur le roy. Et conmanda lidiz baillis au prevost de La Ferté que il feïst une lettre souz son seel audit sergiant qu'il eüst povoir de ce faire, quar lidiz baillis n'avoit pas Jehan son clerc aveuc lui ne son seel. Et dit cil qui parle que le dieminche apres la Saint Remi darriennement passee li prevost de Muyssi et la conmuneté de la vile vinrent a Vausouef a armes conme gent de guerre, a lances, a glaives, a arbalaistes, a pié et a cheval, et vindrent a la meson de Vausouef dudit abbé, et crierent : A la mort, a la mort. Et dit celui qui parle qu'il estoit en ladite meson de Vausouef aveuc ledit abbé, que quant il les oï venir il ala au devant, a la porte et leur dit : Seigneurs, je sui cit sergiant establi de par nostre seigneur le roy pour garder ceste meson et les biens et le apartenances d'icelle. Je vous deffent de par nostre seigneur le roy que vous ceans n'entrez, ne ne faciez force ne violance. Et dit... que, pour deffense qu'il leur feïst, il ne lessierent pas a brisier la porte, ainçois entrerent seur sa deffense en ladite meson et percierent les murs de ladite meson et abatirent les tours de ladite meson et tresbucherent et descouvrirent la meson et derompirent et abatirent et la chapelle de ladite meson, et brisierent huis et fenestres et tables et tretiaus, et decoperent les vessiaus, cuves et tonniaus et affondrerent les vins et enporterent les biens et les chatels dudit abbé qui estoient en ladite meson, son argent, ses chevaus, ses vestemenz de sa chapelle et les aournemenz et tous les autres biens et les garnisons de l'ostel, et effondrerent les coustes et prinrent les tayes, et enportoient le blé dedens, pois et feves et ce qu'il trouvoient. Et dit encore... qu'il s'afforcierent pluseurs foiz ledement et vilainnement a murtrir et occire ledit abbé et sa mesgniee qui estoient aveuc lui. Req. conment il set les choses desus dites, il dit qu'il le set parce qu'il le vit conme cil qui estoit present en ladite meson aveuc ledit abbé. Reg. des estans, il dit : ledit abbé, Guillaume de Vausouef, Michiau de Vausouef, et le chapelain dudit abbé et pluseurs de la mesniee de ladite meson...

IV. Guillaume de Vausouef... dit... que le diemenche de apres la Saint Remi derriennement passee, empres diner, li prevost de la conmuneté de la ville de Muyssi, bien jusques a 500 que honmes que fames ou environ, viendrent a armes conme gent de guerre a lances, a glaives, a arbalestes, a pié et a cheval, et crierent : A la mort, a la mort en la maison dudit abbé de Vausouef. Et dit ... que Jehannot dit li Devinez, sergianz establiz de par nostre seigneur le roy a garder ladite meson deffendi pluseurs foiz de par nostre seigneur le roy au prevost et a la quemuneté desus dite que il en ladite meson n'entrassent ne n'i feïssent forces ne violances, quar il i estoit establiz de par le roy pour garder la. Et seur la desfense desusdite il entrerent ens et brisierent la porte, derompirent les murs et percierent et trebuchierent les tours et brisierent les huis et les fenestres et decoperent les vessiaus, cuves et tonniaus qui estoient en 1 celier et effondrerent les tonniaus plainsde vins, et effondrerent les coustes et lessierent aler la pluvee parmi la meson et emporterent les biens de ladite meson, tout ce qu'il porent trouver et enmenerent 3 chevaus et prindrent et emporterent les vestemenz et les paremenz de la chapelle et enporterent blé, pois et feves estaizes desdites coustes et la garnison de l'ostel, poz et payelles et autres choses, mes il ne set pas bien le pris ne l'estimation des biens. Et dit encore... que il s'efforcierent pluseurs foiz de murtrir et de ledir ledit abbé. Req. conment il set les choses dususdites, il dit par ce quar il le vit et estoit present aveuc ledit abbé en ladite meson. Req. de ceus qui i estoient presenz : Michalet de Vausouef et Jehan le Devinez et li abbé et sa mesgnee...

[4^e peau] V. Mahiet de Vausouef... dit...

... vraies... parce que il les vit et fut present, excepté que il ne set se ce fu du conmandement du baillif.

id. Req. du tans, il dit : environ la S. Remi. Reg. du jour, il dit : le diemenche apres ensivant. Req. de ceus qui i furent presenz, il dit : lidiz abbés et ses chapelains, sa mesgnee, Jehan le Devinez et Guillaume de Vausouef...

VI. Andruiet le filz au Malon... dit...

cf V

... vraies, excepté du quint article qu'il ne set pas bien quels biens il emporterent ne l'estimation ne le pris d'iceus. R. conment il set ces choses, il dit parce qu'il le vit et fu present. Req. du tans : environ la S. Remi darriennement pasee. Req. du jour : le diemenche apres ensivant. Req. des estans : lidiz abbés et ses chapelains et sa mesgniee, Jehan le Devinez et Guillaume de Vausouef et celui qui parle...

VII. Jehannot Larnier de Vausouef. cf. VI

VIII. Gautier Li Charbonniers. Id.

IX. Renier Pain Chaut. Id.

X. Mouet le filz Jehan Le Molon, honme de Saint Pere de Potieres. Id.

XI. Jehan Li Chapuis, honme de Saint Pere de Potieres. Id.

XII. Henri Li Charretons. Id.

XIII. Perrot Li Fors. Id.

XIV. Thybaut de Vausouef, honme de Saint Pere de Potieres. Id.

XV. Jaquet Li Picars. Id.

XVI. Marguerite de la Ferté, fame de Saint Pere de Potieres. Id.

[5^e peau] XVII. Emengiart de Gyé, fame de Saint Pere... Id.

XVIII. Jehannete de Vausouef, fame de Saint Pere... Id.

XIX. Roberte de No. Id.

XX. Jaquete de Vausouef, fame de Saint Pere... Id.

XXI. Guillemette de Vausouef, fame de Saint Pere... Id.

XXII. Monnet de Vausouef, hons de Saint Pere... Id.

XXIII. Gautier, le filz au Joy, hons de Saint Pere, dit... qu'il n'en set riens fors tant que le diemenche apres la Saint Remi derriennement passee, dit celui qui parle que il estoit a Muissi apres diner, et dit que il oï que le baillif de Muyssi Conmanda au prevost Mignart de Muissi que il feïst crier que il ne demourast nul en la vile qui n'alast a armes a Vausouef, et dit que empres ce conmandement il oï que l sergiant de Muyssi qui est apelé Pau de Rat criet de par le baillif et de par le prevost de Muyssi que il ne demourast nul en la ville qui n'alast a Vausouef a armes pour destruire la meson de Vausouef. Req. des presens, il dit : le baillif, le prevost et les sergianz et pluseurs autres dont il ne li remembre.

[6^e peau] XXIV. Guillaume du Chastelet... dit... que il n'en set rien, fors que tant il set bien que la meson d'abbé de Potieres, de Vausouef, est en la garde nostre seigneur le roy par raison de Champangne. Req. conment il le set, il dit par ce qu'il a toujours veü il meismes, au tans que il estoit baillif de Chaumont, et a mis sergiant pour garder le lieu, et en sont tenuz a paier li abbés et li couvent chacun an 1 muy d'avoine au roy pour Champangne, et il meismes le recevoit et en contoit en ses contes quant il estoit baillif...

XXV. Jaques de Tremelay... dit qu'il n'en set riens, fors que tant qu'il set bien que la meson de Vausouef est en la garde de nostre seigneur le roy. Req. conment il le set, il dit par ce que il a toujours veu que ladite meson a toujours este gardee par les sergianz des seigneurs de Champangne et il meismes au tans que il iert prevost de La Ferté i mist Symon de Loncchamp pour garder ledit leu et en vit recevoir chacun an 1 muy d'avoine par raison de la garde.

XXVI. Jehan Pincet... set bien que la meson de Vausouef est en la garde nostre seigneur le roy par raison de Champangne. Req. conment il le set, il dit par ce que il a veu sergiant de par les seigneurs de Champangne qui gardoit ladite meson par l'espace de 20 ans, c'est a savoir Jehan Le Minget et Symonnet de Lonc champ et Jehan le Devinez.

XXVII. Gefroy de Generoles... set bien que li baillis de Chaumont establi Jehan li Devinet sergiant de par le roy pour garder la meson de Vausouef, les biens et les apartenances. Req. du tans que il fu establiz, il dit au conmencement du mois de septembre derriennement passé. Req. du lieu, il a dit : a Vausouef.

XXVIII. Jehan, clercs le baillif de Chaumont... set bien que bien que li baillif de Chaumont establi Jehan le Devinet sergiant de par le roy pour garder la meson de Vausouef, les biens et les apartenances. Reg. du tans, il dit : environ la premiere semaine de septembre. Req. des presenz : le prevost de La Ferté, Jake de Geveroles et pluseurs autres dont il ne li remembre...

[7^e peau] Ce sont li tesmoing amenez a prouver la garnison du chastiau de Muissi contre la gent le roy et amenez de par le baillif de Chaumont.

I Mesire Erars d'Arcies, chevalier... dit... que li prevos de Muyssi vint querre celui qui parle pour venir a Muyssi en garnison de par l'evesque de Langres, et que il amenast aveuc lui ce que il pourroit trouver de genz deffensables. Et dit encore... que lendemain a matin il vint a Muissi et parla au baillif et li demanda pourcoi en l'avoit demandé, et lidiz baillis de Muyssi li dist que l'en l'avoit mandé pour estre en garnison et pour garder le chastiau de Muyssi quar on li avoit donné a entendre que li baillis de Chaumont devoit venir a Muyssi a armes. Et dit cil qui parle que l'en avoit ront aucun des pons de la vile et copé des arbres d'environ les pons. Reg. du tans, il dit que ce fu environ la Saint Nicholas d'iver darriennement passée. Du jour il ne li souvient. Req. des presenz, il dit : monseigneur Ponin de Cortenay, monseigneur Ponz de Mandeville et mons. Henri de Saint Cerque, chevaliers, et Bernart de Chastelion et pluseurs autres. Et dit encore... qu'il oï lire au clerc au baillif de Muyssi unes lettres que mesire de Langres avoit envoiees, esqueles il estoit contenu que les genz l'evesque ne courussent pas seur les genz le roy. Et dit... qu'i fu ordoné que se nus i venoit de par le roy, que on le lessast entrer au chastel, et se li baillis de Chaumont i venoit, ne autres de par le seigneur de Champangne, que l'en ne le lessast pas entrer ou chastiau...

[8^e peau] II. Milet d'Arcies, escuier... dit... que en cest yver nouvellement passé, environ la Saint Andrui, du jour il ne li souvient, quar il fu mandé de par l'evesque de Langres pour venir en garnison au chastiau de Muyssi, at quant il i fu venuz, il fu conmandé, en la presence de celui qui parle, de par le baillif de Muyssi, que nul n'entrast audit chastel se il ne venoit de par le roy ; et se il venoit de par le roy et il en feïst foy, que l'en li lessast entrer et faire sa volenté. Reg. des presenz il dit : mesire Poinces de Mondevile, Poincez de Pisi, Guyot le Fournier, Guillaume de Loysi, escuiers, et pluseurs autres...

III. Reniers de Vourpollieres, escuiers, cf II.

IV. Enris de Noiers, escuiers... comme mesire Erars d'Arcies, son seigneur.

V. Mesire Poinces de Mondevile, chevaliers... dit... que en cest yver nouvellement passé, du jour il ne li souvient, cil qui parle vint en garnison au chastiau de Muyssi pour mons. Jehan d'Arcies, chevalier, aveuc Milet d'Arcies, escuier. Et dit quant il fu venuz au baillif de Muyssi : Sire, je sui ci venuz pour monseigneur Jehan d'Arcies en garnison, que vous plest il que je face ? Et lors lidit baillif li quemanda que il alast a la porte de Auberive garder, et se les genz le roy de France i venoient que il les lessast passer et entrer oudit chastel, et se la gent de Champangne i venoit, que il ne les lessast pas passer. Reg. des presenz, il dit : ledit mons. Erart et ledit Milet et pluseurs autres.

VI. Evrart de Esquilly, escuier... cf I, fors tant que il n'oï pas dire, puis que les lettres dudit evesque furent aportees que l'en conmandast que, se li baillis de Chaumont venoit que on ne l'i lessast pas entrer. Et croit bien cil qui parle que se lidit baillif de Chaumont i fust venuz ou non dou seigneur de Champangne, que il n'i feüst ja entrer...

VII. Guyot Li Fourniers, escuiers... dit... que en ceste annee presente, ou tans d'iver, du jour il ne li souvient, que il fu a Muyssi et oï que li baillis de Muyssi li conmanda, et a ceus qui avec lui estoient, en garnison oudit chastiau de par le roy, que on li ouvrist les portes ; et se nus i venoit qui se avouast de par ceus de Champangne, que on ne les lessast pas entrer. Reg. des presenz, il dit : mesire Erart d'Arcies, Milet d'Arcies, escuier et pluseurs autres.

VIII. Gefroy d'Urvile, escuiers, cf. VII.

IX. Mathieus de Loches, escuiers, id.

[9^e peau] Intendit.

Entent a prouver li baillis, li prevost et la conmuneté de Muyssi encontre l'abbé de Potieres et le baillif de Chaumont que Jehan Li Enfes, sergiant le roy en la baillie de Chaumont, requist audit baillif et prevost de Muyssi et conmanda de par le roy qu'i leur baillassent des genz de Muyssi pour aidier a amener genz de Muyssi que li abbés de Potieres avoit pris, ou conduit dudit sergiant...

Item que ledit Jehan iert garniz des lettres de sa serganterie scellees du seau au baillif de Chaumont.

Item que ledit Jehan Li Enfes disoit et crioit a haute voiz par la ville de Muissi : Venez tuit apres moi a Vausouef.

Item, que quant cil de Muissi furent a Vausouef, ledit Jehan leur conmanda qu'il entrassent dedenz la meson l'abbé de Vausouef, et que il queïssent les prisons et les preïssent, quelque part qu'i les trouvassent.

[10^e peau] Ce sont li tesmoing amenez de par le baillif les prevost de Muyssi et la conmuneté de la vile de Muyssi a prouver les articles faiz contre l'abbé de Potieres et le baillif de Chaumont en tant conme il li touche.

I. Pierres Restorez...

... Dit ... que Jehan Li Enfes, serginaz le roy, requist au baillif et au prevost de Muyssi et conmanda de par le roy que il leur baillassent des genz de Muyssi pour aider a amener genz de Muyssi que li abbés de Potieres avoit pris, ou conduit dudit sergiant, si conme il disoit, et les tenoit en prison en sa meson a Vausouef. Reg. conment il set ces choses, il dit par ce qu'il fu present. Req. du lieu, il dit : sus le pont de la meson au baillif de Muyssi. Req. du jour, il dit : le diemenche d'apres la Saint Remi.

II Renaut Minars de Muyssi...

... fu present et oï la requeste et le conmandement dudit Jehan, qu'il fesoit conme sergiant le roy. Reg. du lieu, il dit ; desus le pont de l'ostel au baillif. Reg. du jour, cf. I.

III. Jakin le lombart, cf I

IV Mesire Jake de Leu, cler, chanoine de Muyssi

... Dit... que il vit, environ la Saint Remi passer derriennement, Jehan l'Enfent qui avoit aportees une lettres esquels il estoit contenu que lidiz baillis de Chaumont establissoit lediz Jehan sergiant, mes il n'estoit pas certain se ce estoit le seel au baillif quar il ne le connoissoit pas. Et dit que il vit porter audit Jehan un baton paint conme a sergiant.

V. Jakin le Lombars. cf. IV.

VI. Oudinet de Muci, escuiers...

... Dit... que il a veü user ledit Jehan de Office de sergiant, et que il meïsmes a gagié celui qui parle, conme sergiant le roy...

VII. Jehan dit Put Vilain... dit... que il a veu ledit Jehan user pluseurs foiz de l'office de sergiant.

VIII. Jehan Louys de Muyssi, clerc...

... Dit... que 1 jour dont il ne li souvient, environ la Saint Remi nouvellement passee il oï que Jehan Li Enfes disoit et crioit a haute voiz : Venez, venez apres moi a Vausouef. Et oï cil qui parle que le prevost de Muissi disoit : Je vous conmant sur la hart que vous aliez aveuc Jehan l'Enfant a Vausouef. ...

IX. Jehan Li Escorchiez, de Granci...

... cf VIII, excepté qu'il n'oï pas que le prevost de Muyssi conmandast que les genz de Muyssi alassent aveuc celui Jehan L'Enfent.

X. Durant Destremain de Muissi, cf VIII

XI. Nicholas de Charre...

... vraies. Et oï ... que quant cil de Muyssi furent a Vausouef, que ledit Jehan Li Enfes leur conmanda que il entrissient dedens la meson de Vausouef et qu'il querissent les prisons et les preïssent en quelque lieu qu'i les trouvassent. Reg. du tans : environ la Saint Remi. Du jour : il ne li souvient...

XII. Gervaise Li Seurres, cf XI.

XIII. Colars Pece, id.

XIV. Nicholas de La Ferté, clers

... vraies. Req. conment il le set, il dit par ce que, empres le fet de Vausouef li prevost de La Ferté li conmanda qu'il meïst en prison ledit Jehan pour le fet de Vausouef et lidit Nicholas l'i mist et li osta ses lestres seellees du seau au baillif esqueles il li estoit contenu que lidiz baillif l'establissoit sergiant nostre seigneur le roy. Et dit que ce fu enprés la Saint Remi, i jour dont il ne li souvient...

Et fait protestation li baillis de Chaumont et li abbés de Potieres, chacun en tant conme il leur touche, que les choses desus dites proposees dudit baillif, du prevost et de la conmune de Muyssi ne li tournent en prejudice fors tant conme reson touche.

Au dos, minute de l'arrêt du Parlement condamnant le bailli et le prevôt de Mussy à 1000 l. d'amende au roi et 500 l. de dommages envers l'abbé.