IRHT

Enquêtes menées sous les derniers capétiens

> Une enquête sur les maîtres des forêts de l’Orléanais

Archives nationales, J742, n°6
1. Enquête sur Taupin, maître de la forêt de Goumez

Ce sunt les nons des sergenz des forez de la baillie d’Orliens.

Enquête

Première peau

[1]

Johain de Compigne est sergent en la forest de Goumez et a letres dou roi a 6 deniers de gages par jour, les quelles letres furent donées audit Johan a Saint Germain en Laye en l’an M.CC.LX.XVIa le semadi d’avant la feste Saint Barnabé.

Requis par qui il ot ladite letre et ledit servise, il dit par le roi qui li dona. Requis de ses compaignons commant il ont servi en leur servise de la forest, ou bien ou mal, il dit que il ont servi bien et leaument, si conme il croit.

Requis de Taupin, son mestre, conmant il a servi, et conmant il s’est maintenu en la forest, il dit que Taupin est son serourge et dit que il ne set com mant il a servi, que il qui parle ne fut ons apellez a conte que Taupin feist ne ne sot esploiz que il levast, et dit que il croit que il retenist aucune foiz de ses esplaiz et que il ne contast pas tout.

[2]

Estiene de Trapes est sergent en ladite forest de Goumez sous Taupin et a letres dou roi a 6 deniers de gages par jour, et li furent donées a Paris en l’an m.cc.lx.xvi, le mecredi aprés Pasques. Requis qui li donna le servise et a quel requeste il li fut donez, il dit que li rois le li donna a la requeste mestre Guillaume de Trapes et a la priere dou baillif d’Orliens, si comme il qui parle dit. Et dit il qui parle que il avoit servi en la davant dite forest 11 anz au gages desus diz avant il eüst la davant dite lettre le roi.

Requis par quel commandement il avoit servi avant la letre donée, il dit par le conmandemant dou baillif et a la priere mestre Guillaume de Trapes.

Requis de ses conpaignons, commant il ont servi en leur servise de la forest, il dit que Terrion s’est bien menez et leaument au servise et a bien servi et dit que Jehan de Conpigne son conpaignon, ou tans que Taupin vendoit les usages de la forest de Goumet, avoit une charrete qui amenait des bois des usages a vendre a Orliens, mes il qui parle ne set se il les achetait ou commant il le prenait, que il qui parle n’en oït ons conte que il feïst, a Taupin ne a autre. Et dit que ledit Johannot de Conpigne a 20 vaches qui sont pessanz es tailles, et dit cil qui parle que il a pris aucunes fois le dites vaches pessant es dites tailles, et livrées audit Taupin son mestre ; et dit que il ne set commant Taupin les li delivrait, que por ce les vaches ne lessaient pas a aler es tailles, et encores i sunt.

Requis de son mestre Taupin conment il a servi et conmant il s’est maintenu en sa baillie, il dit que de son mestre il ne set riens, ne de ses contes, que il n’i fut ons apellez a conte que il feist, ne ne fut ons a ses esplaiz tauser ne lever.

Requis des usages de Goumez que Taupin fist vendre, il dit que Taupin son mestre en fist vendre par Brullart 66 arpanz.

Requis conbien il poaient bien valloir, il dit que il vallaient bien ou mieulz que cil qui sunt ores, qui sunt vendu 32 s. l’arpant.

Requis se il set conbien Taupin en conta au baillif de celle vente, il dit que il non pot ons riens savoir que par Brullart qui li dist que Taupin en avoit rendu 65 l.

[3]

Tierri le Messagier, qui fut messagier madame la reisne mere le roi, et fuz nez de Champbli le haubergier, est sergent de la forest de Goumez en la baillie Taupin, et a 2 peres de letres, unes dou roi Looys a 6 d. de gages, lesquelles li furent données a Fontainebleaut en l’an M. CC. LXV, lendemain de la feste sainte Luce.

Requis a quelle priere il ot le servise et ladite letre, il dit a la priere madame la raisne davant dite, et dit que il servit en la forest de Courci par le don de celle letre, au tans queRobert d’Alençon estoit mestre de la forest de Courtci.

Et l’autre letre est de cetui roi et fut donée au Chastiau Neuf sus Loire, en l’an M. CC. LXXI, le lundi d’aprés la Nativité Nostre Seigneur. Requis par qui il ot celle letre et a quelle priere, il dit que il ne set, que Johan de Barbison la li aporta de la court, senz que ledit Tierri en seüst rien, si com il dit. Et lors il qui parle ala servir en la forest de Goumez et lessa a servir a Courtci. Et dit que il croit que ledit Johan de Barbison le fist remuer de Courtci por metre Nee le Piquart son sergent, si que ledit Tierri ot le servise audit Nee, et Nee ot le servise audit Tierri. Et sert encore cil qui parle a Goumez souz Taupin, et dit cil qui parle que il croit Johan de Barbison aloigna de lui celui qui parle por ce que il trova le filz au Loier de Sevri qui portait en 1 sach 1 chevriau sauvage au dit Barbison.

Requis conmant si compaignon ont servi en ladite forest et conmant il se sont maintenu, il dit par son seremant que il croit que il aient servi bien et leaument, se n’es Johannot de Conpigne qui sollait avoir une charrete a une jumant qui amenait bois chacun jour a vendre a Orliens, et le prenait en la vente Taupin, et ne set cil qui parle que il en paiast riens ne que il en contast ons. Et dit cil qui parle que Johannot de Conpigne a vaches qui vont pestre es talles, et le set bien Taupin.

Requis de Taupin son mestre, se il set que il ait riens forfet en la forest, et se il a bien servi, il dit par son serement que Taupin son mestre a souffert la meson de l’oste au Nonains a user a 3 charrestes et elles ne doivent user que a 2 charretes, l’une a ragiaus, l’autre a ramasons, et toutes 3 amenaient ragiaus, et dit que quant il le li monstraient, il et ses conpaignons, que Taupin les coitait et les menaceait. Et dit cil qui parle que quant Taupin vendait les usages de Goumez, que il deffendait a celui qui parle et a Estiene de Trapes que il n’alassent en autre leu, que se il mesprenait, que il se passerait bien vers le roi et dit cil qui parle que les charretes de l’ostel aus nonaims il prist pluseurs fois, tant que Taupin l’en blasma et li dist que il s’en soffrist.

[4]

Brullart, vendeur des usages desus diz, dit par son seremant que Taupin fist vendre lesdiz usages.

Requis dou nombre des arpanz venduz, il dit que il n’en set pas le nombre, mes il qui parle dit que il rendit a Taupin de celle vente 65 l. a 2 paiemenz, et touz couz paiez.

Requis conbien Taupin en conta au baillif il dit que il ne set, que il ne fut pas au conte.

Requis se li usage qui furent leur vendu vallent bien autant l’arpant conme cez qui sunt ores vendu, il dit oïl, mieulz, les ques usages sont ores venduz 32 s. l’arpant. Et por ce que l’en ne savoit la summe des arpanz, nos les feismes mesurer, presanz les sergenz de celui bois, de celle vente, et en fut trové par mesure 66 arpanz, lesques valurent au feur ou l’en vent ores les autres usages 132 l. de tornois.

[5]

Le prieur de Saint Ladre d’Orliens dit en parolle de provoire que Taupin prist ses charretes et disait que elle avoit fet mot grant domache es tailles des bois le roi d’aler par mi. Le prieur demanda jour de veuee et ala le prieur au jour de la veuee, et vit le prieur que sa charrete n’avoit riens mesfet, et demanda ledit prieur au Taupin sa charrete a recroire et Taupin la li recrut a grant paine, et li mist jour a ses jourz, et avant que li jour fussent, Taupin vint en la meson audit prieur, et li dit que il avoit robe achetée, et que le prieur li feist avoir une panne, et ne venist pas ledit prieur au jourz que Taupin li avoit mis. Ledit prieur fist avoir une pane a Taupin, qui cousta au prieur 18 solz, si conme le prieur dit. Et dit ledit prieur que l’autre année d’aprés, ledit Taupin demanda audit prieur une autre panne, et le prieur la li fist avoir, et cousta celle panne au prieur 18 s., si que Taupin a eu dou prieur par 2 foiz 2 pannes qui cousteront au prieur de Saint Ladre 36 s.

Et dit ledit prieur que 1 bon home povre portait 1 fessiau de bois et que Taupin le trova entre la maladerie d’Orliens et Orliens, la ou il est deffendu audit Taupin et as autres sergens que il n’i praignent nul ne n’arestent, que cil d’Orliens ont ontb chartre de don de roi que nus ne soit pris ne aresté en celui leu ou Taupin areta le povre home portant bois. Ledit Taupin rua le povre home a terre souz son fessiau, et au relever que le povre home fist, Taupin trest la pee et en feri le povre home, si conme il le mehaigna d’un des doiz et encores est mehaignez, si conme nos avons veü. Et ce fet Taupin requist audit prieur que il feist soffrir le povre home et finat a lui por Taupin. Le prieur fist soffrir le povre home jusques a ores, mes il ne se vieult plus soffrir. Que il n’a pas 8 jourz que le povre home en vint a nous se plaindre, et ce savons par ce que nos avons veu le povre home mehaigné et que bones genz le nos ont dit, que il est voirs. Et dit ledit prieur que leur meson a esté mout grevée et chargée de Taupin, et leur a fet mot d’annuiz dont il y est honte dou dire.

Taupin a en cest an trouvé 2 povres homes qui venaient dou bois senz ce que il portassent rien. Taupin lessc salua et quant il les ot saluez, Taupin retorna arriers s’espée en sa 1. main et les atourna tex que il a convenu que il aient esté roisnez, et sont si povre que il sont en l’aumosne, ou il gisent, et les avons veuz, et croit l’en mieulz que il se murent que il garissent.

[6]

Ce sunt le griés que les genz de l’abbaïe Saint Yvertre d’Orliens dient par leur seremanz que Taupin leur a fez. Il dient que Taupin prist 14 chevaus de leur grange de Romeilli, sanz resson et senz ce que il fussen defaillant de fere ce que il deüssent. Et tint ledit Taupin les davant diz chevaus en prison ou cueur de semailles par 7 jourz ou plus et ensuit leur semaille demora et passa la seson, et demora le blé semé as chans et tout dacouvert, dont il dient que il ont eu de domache de que a la value de 20 l. de tornois.

Apparat critique

a Sic, pour MCCLXXVIII.

b Sic, pour Ms. sont.

c Sic, pour A vérifier.

Comment citer cette notice

Xavier Hélary. "Une enquête sur les maîtres des forêts de l’Orléanais (Archives nationales, J742, n°6)", dans Enquêtes menées sous les derniers Capétiens, Xavier Hélary, Benjamin Suc, éds, Orléans : Institut de Recherche et d'Histoire des Textes, 2006. (Ædilis, Publications scientifiques, 4). [En ligne] http://www.cn-telma.fr/enquetes/orleanaisenquete1/ .

Mentions légales | Colophon | Contacts | Haut de page