Excellentissimo ac serenissimo principi domino suo karissimo domino Philippo, provisione divina regi Francorum illustrissimo, servus suus Guido Caprarii, miles ejusdem, senescallus Petragoricensis et Caturcensis, se totum ad pedes regie majestatis ad ejusdem precepta paratum. Noverit regia celsitudo me litteras regias recepisse una cum quibusdam supplicationibus, clausis sub sigillo regio, dudum directas domino Guiscardo de Marziaco, militi, dudum senescallo Petragoricensi, predecessori meo, quarum litterarum regiarum tenor sequitur sub hiis verbis :

Ph. Dei gratia Francorum rex, senescallo Petragoricensi salutem. Mandamus vobis quatinus hominibus de honore Altimontis super contentis in eorum supplicationibus quas cum presentibus sub sigillo nostro vobis mittimus interclusas, vocatis quorum interest, facientes justicie complementum super quodam novo servitutis genere eis ut dicitur imposito per nostros servientes et bajulos dicti loci, quod vocatur albergium, de quo valde se conqueruntur gravatos et nobiscum componentur. Sciatis quid hoc est et si super hoc ad comodum nostrum possitis componere absque prejudicio alieno compositionem admittat eandem et nobis quid inde feceritis rescribatis. Datum apud Pontisaram sabbato post Magdalenam.

Item tenor dictarum supplicationum talis est :

Regie majestati significant supplicando B. Gelat, Hugo La Cerra, pro se et aliis hominibus de honore Alti Montis quod bajuli Alti Montis dictos homines de novo quam plurimum molestant levando servitutem indebitam que albergium vocatur ab eisdem pro libito voluntatis, ita quod semel in anno veniunt dicti bajuli ad hospitia hominum predictorum cum tali comitiva sicut eis placet contra voluntatem et prohibitionem hominum predictorum, propter quod albergium bailivia predicta non venditur in majori summa. Quare supplicant dicti homines dari in mandatis senescallo Petragoricensi ut sine cause cognicione dictos homines non permittat vexari per dictos bajulos vel saltim mandari quod se informet de valore albergii predicti cum certam summam pecunie sint parati dare annuatim pro evitando labore suo pro dicto albergio et quod refferat quod invenerit ad proximum Parlamentum.

Item significant dicti homines quod per 30 annos et amplius predicti homines habuerunt consules ut ceteri homines patrie pro denariis per eos debitis taxandis et levandis, nuper dominus Geraldus de Sabanaco, locum tenens dicti domini senescalli, in plena assisia sine cause cognitione inhibuit dictis hominibus ne ex nunc aliquis ex eis uteretur officium consulatus tenere.

Facta igitur diligenti inquisitione de mandato domini Geraldi de Sabanaco, legum doctoris, tunc judicis et locum tenentis predicti predecessoris mei, de modo et forma perceptionis et etiam de valore albergii de quo fit mentio in mandato regio supradicto et post. modum de mandato meo, de valore et modo perceptionis feni et gallinarum de quibus fit mensio in mandato regio supradicto, ipsisque inquisitionibus visis et diligenter inspectis, ac etiam super eis diligenti deliberatione et tractatu prehabitis cum meis judicibus et procuratore et thesaurariis regiis in dicta senescallia et pluribus aliis peritis, comperto quod a viginti quinque annis citra genus hujusmodi servitutis predictorum albergii, feni et gallinarum fuerat impositum hominibus antedictis et quod predicte res valebant aut valere poterant comuni estimatione annuatim duodecim libras tur parvorum et non ultra, comperto etiam per facti experientiam quod dicta ballivia Altimontis et honoris ejusdem alias vocati d'Antejac per remissionem seu sufferentiam exactionis hujusmodi minus non est vendita anno presenti, tandem homines predicti honoris obtulerunt se daturos predicte regie majestati per modum compositionis ducentas quadraginta libras tur. parvulorum pro remissione albergii, feni, gallinarumque premissorum, ad hec ut tam ipsi homines quam eorum successores a predictis servitutibus seu exactionibus per dictam majestatem regiam perpetuo sint liberi et immunes. Ego autem credens utile et expediens regie majestati recipere compositionem predictam, de consilio et assensu judicum, procuratoris et thesaurariorum predictorum, Hugoni Martini et Guillelmo Ragamberti, sindicis et procuratoribus hominum predicti honoris Alti Montis, alias vocati d'Antejacpro se et nomine quo supra humiliter supplicantibus dictam oblationem recipi et admitti pro dicta libertate et inmunitate dictis hominibus per dictam majestatem regiam, ut dictum est, perpetuo concedenda, predictam compositionem a dictis sindicis et procuratoribus admisi et recepi, sub modo et forma superius comprehensis, nec non et libertatem et inmunitatem prestationis servitutum predictarum, nomine quo supra, eisdem hominibus et eorum successoribus duxi perpetuo concedendam et etiam nomine regie celsitudinis feci eis pactum de non petendo aliquid ex nunc a predictis hominibus seu eorum successoribus occasione feni, gallinarum et albergii premissorum, retenta celsitudinis regie in omnibus voluntate, et premissa significo et rescribo, precipiat mihi, servo suo, serenitas regia sue beneplacita voluntatis. Datum in Monte Dome, die sabbati ante festum Penthecostes, anno Domini millesimo ducentesimo nonagesimo octavo.