[1]

Aus articles et as requestes baillies de par le roy d'Angleterre duc de Aquitainne respont en en la maniere qui s'ensuit. Et premierement,

I. Au premier article respont l'en ainssi : il plest que de l'aprouvemens et des seremenz des païs soient donnees lettres de çà et de la et se aucun cas veulent dire par especial que li roys face, li roys est touz jourz prest de l'acomplir. Et aussi requiert li roys n.s. le roy d'Angleterre que il acomplisse tout ce que a lui appartie[nt] a faire selonc les païs, et ce qui ha esté fait au contraire face revoquer et remettre a estat dehu.

II. Au segont article qui est general l'en respont ainsi : il desplest au roy se li peys n'est si raisonnablement gouvernez, que justice s'il tiegne et s'i face et se tieuls exces s'i font conme il est contenu ou dit article, et n'est mie sa volonté ne sentence que riens soit ne doye estre fait contre les païs et se riens y avoit esté fait il est touz jourz preiz de le faire adrecier par quoy il soit montré par especial et ha bonne volonté de y mettre touz les remedes que il porra bonnement, a ce que ou peys justice se face et les diz exces cessent, mes quant a present le meilleur remede qui y puisse estre mis est que bons officiaus soient mis d'une partie et d'autre et qui ayment les seigneurs, et quant de endroit li en entent il a pourvooir, et aussi convient il bien que li roys d'Angleterre y pourvoie devers soi, quar il ha entendu par ses genz que mo t des choses contenues ou dit article aviennent pour les desobeissances et rebellions des officiaus du roy d'Angleterre, duc d'Aquitaine, son frère.

III. Au tierz article respont l'en ainsi : l'en mandera voulentiers aus seneschaus que il ne le facent fors que en la meniere que il est respondu ou XX^me article contenu es ordonances qui est soigne par V, c'est a savoir est cas qui appartiennent au roy, des quiex le seneschal l'a acoustumé a soi entremettre, et en la fourme et en la meniere contenue ou dit article.

IIII. Au quart article respont l'en ainsi : il peut estre que puis le temps saint Loys seurprises et nouvelletez hont esté faites d'une partie et d'autre ; si seroit raisons que se elles se adreçoient d'une partie, que aussi se adreçassent d'autre, et pleira bien au roy que la verité soit sehue, et luy sehue soit ramené a estat dehu de ça et de là, et la grace que il ha faite aus autres pers que il porra faire a luy bonnement senz faire a autruy tort fera il volentiers, quar entre les autres l'a il et doit avoir cher conme son chier frere et par trop de raisons que il y ha, mes il n'a point octroié aus autres pers simplement ce que li articles devise.

V. Au quint article qui fait mencion de Saint Sacerdos, ce touche partie et enqueste en ha esté faite, appelez les genz le roy, et pent a la court et les choses ou la dite bastie est appartiennent au roy selonc la fourme des païs, si convient que l'enqueste soit jugee.

VI. Au sisiesme article montreint les lettres et les (sic) fera acomplir si avant conme raison sera.

VII. Au septiesme article ne se peut faire bien response senz oïr ceux qui hont donné l'arrest et les causes qui les hont mehuz.

VIII. A l'uytiesme article respont l'en si conme au pruchein dessus.

IX. Au noviesme article l'en mandera a fin civile aus genz dou Parlement que il facent bon droit et hastif.

X. Au disesme article : de ce pleit en la zourt a Paris et la saura l'en en quel point est la cause, et fera l'en droit et respondra l'en si avant conme raison sera.

XI. A l'onziesme article l'en ne peut pas faire la requeste senz savoir l'estat de la besoigne mes li roys de grace mandera au seneschal que il se seuffre de le molester tant qu'il hait autre mandement, et entre deux l'en porra savoir l'estat de la besoigne et en ordenera l'en plus certainement.

XII. Au douziesme article qui parle de la conté de Fessensac respont l'en ainsi : que sur ce doit estre ordené certeyne chose es pais si plest au roy, que les pais soient vehues et ce que se devra faire sur ce selonc celles soit fait et acompli.

XIII. Au treziesme article l'en mandera aus seneschauz que il ne seuffrent pas la jurisdicion temporelle dou roy et dou duc estre empeschee non dehuement par la jurisdicion espirituelle es cas qui ne appartiennent a l'iglise de droit ou de coustume.

XIIII. Au quatorziesme article li roys ne mettra ne ne tiendra notaires ne sergenz pour faire offices plus que il ne les tient ou les met es terres des autres barons especialment prucheins.

XV. Au quinziesme article les enquestes de quoi il fait mencion sont faites pour savoir les seurprises, lesquelles doivent estre ramenees a estat selonc les pais, si samble que il soit besoinz que il preigne fin, especialment quar les deux roys hont jurees les pais.

XVI. Au seziesme article li roys saura l'estat des enquestes avec ses genz dou Parlement et sera oïz li roys d'Angleterre ou il devra estre oïz gardee touz jourz la fourme des pais.

XVII. Au dis et septiesme article. Cet article ne se peut octroier senz pechié et senz faire grant tort aus subgiez et ce que foiz se passa heüst esté rappelé se il heüst esté poursuivi, et ainsi li fu il autre foiz respondu a Poitiers ou il en fist semblable requeste.

XVIII. Au dis et uytiesme article qui parle des trespas et desobeissences, respont l'en einsi : il faut savoir avant quex sunt les trespas et les desobeissences et elles sehues porra miels li roys respondre sur la grace qui est demandee de par le roy d'Angleterre, duc d'Aquitainne, son frere.

XIX. Au dis et noviesme article qui parle des ordenances que il appelent arrest respont l'en en la meniere que il fu yer. respondu en la presence des deux roys.

XX. Au vintiesme article les requestes et responses autrefoiz faites semble que il soient recapitulees en ces articles balliés de nouvel et es ordenances que il appelent arrest, si baudra l'en lettres de ce qui leur est otroié par les nouvelles personnes.

XXI. Au vint et unaisme article qui parle de Bernart Tranquelion, respont l'en que li arreiz qui est donnez contre le dit Bernart n'est pas mont prejudiciables au dit roy d'Angleterre quar li arreiz n'est autres mes que une condampnacion qui avoit esté faite par les seneschaus de Thoulouse contre le dit Bernart pour raison de contumaces est mise en souspans, et fait l'en enquerre sur le principal, c'est a savoir sur les rebellions et desobeissences que l'en dit que le dit Bernart ha faites contre le roy et ses genz, non pour tant se le dit roy d'Angleterre duc de Aquitainne cuide que la chose li touche, et que elle li puisse estre an rien prejudiciable, au roy plest que le dit roy son frere hait grace de dire contre l'arrest.

[3^o peau] XXII. Au vint et deuxesme article qui parle ancores dou dit Bernart respont l'en que avant doit l'en savoir les excés et desobeissences que grace se face, et aussi le proffit de ceste grace ne seroit pas a monseigneur d'Angleterre son frere mes a autrui, et li roys li otroieroit plus tost graces dont le proffit fust sien que graces dont le proffit fust a autrui.

XXIII. Au vint et troisiesme article qui parle de la dame de Thiran, li roys ha entendu par ses genz que celle dame ha esté mont malmenee par les officials dou roy d'Angleterre et mise a povreté, et toutes les causes contenues en l'article hont esté suffisanment examinees par la court, si seroit grant pechié de donner grace contre personne si fort greves, dont voudroit bien li roys que le roy d'Angleterre son frere ordonnast conmant ses officiauls lessassent en pais vivre la dite povre dame.

XXIIII. Au vint et quatriesme article qui parle de Pierre et Bertrant Caillaut respont l'en que ce ne sunt mie personnes dignes de avoir grace, et se monseigneur d'Angleterre les cognoissoit bien, il ne demanderoit ja grace pour eux.

Facat est collatio.

[au dos] :

Ph. etc. Quod nobis dilecto et fideli E. rege Anglie et Aquitanie duce, fratre nostro carissimo, existentibus Ambianis anno Domini M^o CCC^o vicesimo, julii octava die, cum idem frater noster requestas fecerit nobis plures, nos volentes condescendere votis et annuere supplicationibus suis quantumvis nostrum conspicuit et contremuit ac possimus sine juris alterius lesione ordinantes, volumus et nobis placet quod super ratificacionibus, approbacionibus et juramentis.