Primierement conme li dis rois d'Engletere, conte de Pontif et de Moustroil, teignie sa conté du roy de France, son seigneur et son pere, en conté et en baronie, en la quele il a tote justice haute et basse, et conissance de touz cas apartenanz a justice, les gens nostre seigneur le roy sont entré et entrent touz les jours en la dite conté non deüement et serjantent en pluseurs cas apartenanz au dit conte et a sa conissance el prejudice et el damage du dit conte. Por quoi il supplie a nostre seigneur le roy que il lui plaise a mander au baillif d'Amiens, a ses provos et a ses serjans que il ne entrent en la dite conté por serjanter ne esploiter en nul cas quel que il soit, se n'est en defaute de droit et par appel de mauvais jugement, et a baillier ses lettres au dit conte, contenans que il lui a cele grace otries en la maniere dessus dite, et que il voet que les gens de Pontif ne obeïssent a eus en autres cas que es cas dessus dit. Et en ceste maniere l'otria nostre seigneur le roy a mon sire Guion, oncle le roy d'Engletere qui ore est, el tans que il tenoit la conté de Pontif.

Item conme pluseurs abbeies, priories et maisons de religion fondees des anciseurs de Pontif se soient desavouees de la garde du dit conté de Pontif et avouees du roy contre tout droit et raison et par la colour de ce desaveu il ont empesché tote la justice que le dit conte et si anciseur soloient avoir en leur teres et maisons et l'ont fait prendre en la main le roy dont pluseurs debaz pendant en Pallemenz, en assises et en prevosteez, que il plaise a nostre seigneur le roy a faire cesser les plais et a envoier II. chevaliers du païs prodonmes qui briefment et de plain sanz proces de plait, voient les privileges des diz religieus et sachent du droit et de la seisine que le dit conte et si anciseur a et ont eu tant en garde conme en justice et quel droit, li religieus ont eu de eus desavouer et des justices empescher, et ce seü il le raporthent par devers nostre seigneur le roy, si que il en puist ordener sa volenté.

Item conme nostre seigneur le roy eust rendue la tere de Pontif au dit conte par ses lettres contenans que il la rendoit en autel point que ele estoit quant il la seisi, et la dite tere soit en pluseur lieus et les droitures d'icele fortraites du tans que il la tenoit en sa main, que il plaise a nostre seigneur le roy a faire enquerre briefment et de plein sanz procés de plait de quex hiretages et de queles droitures la dite tere estoit despoilliee et empiree el tans que il la tenoit en sa main, et la verité sur ce soit raportee a nostre seigneur le roy si que il en puisse ordener sa volenté.

Item conme nostre seigneur le roy eust seisi et pris en sa main pluseurs terres et maisons des Templers assises en la conté de Pontif et donees et aumosnees au Temple des contes de Pontif et de leur subgis, lesqueles doivent si conme il semble retorner au dit conte por le forfait des Templers, que il plaise a nostre seigneur le roy que les dites teres et maisons lui soient delivrees en la maniere que il le fra a ses autres barons. Et s'il lui semble que il ne doive ce faire et que il ne le face a ses autres barons, que por la conté de Pontif enbelir et por oster pluseurs riotes et debaz qui en porroient naistre, il lui plaise que les dites teres et maisons lui soient bailliees a cense par pris de terre du quel la contee de Pontif soit chargee et obligee.

Item conme li abés et li covens de Saint Gioce sur la meer aient fait pluseurs entrepresures, damages et deshiretances au conte de Pontif de quoi il n'a encore peü avoir droit ne raison, et especiaument il aient la vile de Saint Gioce, qui est vile de conmuignie, tant grevee et oppressee que ele est aussi que destruite et mise au nient que il plaise a nostre seigneur le roy a envoier la bones gens et soffisans, le plus en haste que il porra, qui sachent des entrepresures et de la destruction de la dite vile, et que il enquergent diligentement du droit et de la seisine que les contes de Pontif et la vile de Saint Gioce i ont eü et doivent avoir, et ce que il en aront trové que il le raportent par dever nostre seigneur le roy si que il i puist mettre remede.

Item conme les contes de Pontif eüssent esté en seisine el tans passé de oster les empeschemens de la riviere de Sonme si avant conme la conté de Pontif s'estendoit et li baillis d'Amiens se soit mis en saisine de ce faire et ne voillie soffrir le dit conte user de sa droiture dessus dite, en la maniere que si anciseur en userent, que il plaise a nostre seigneur le roy a faire enquerre du droit et de la saisine que li anciseur du dit conte eürent et que le dit conte a ou doit avoir, et s'il est trové que ce soit le droit du dit conte, que il l'en lesse goïr.