[1]

Information fete par le viconte du Pont Audemer du commandement mons. le baillif de Rouen en l'an de grace mil CCCVI, le samedi aprez la Saint Mahieu, pour savoir mon quel domage ou quel proufit seroit a nostre sire le roi ou a aucuns autres se de treis fiez, c'est assavoir se le quart du membre de hambert appelé Le Val Mennier et un quart apelé Le Pin aveques un autre tiers qui est dit Groolei, ledit nostre sire le roi fesoit un fié en conjoignant iceus ensemble.

Gervese Hache en Col, de l'aage de 45 ans ou environ, tesmogn juré et requis sus les choses dessus dites, dit par son serement que en fié du Val Mennier il y a 19 moultiers, de coi il y en a 2 qui sunt au roi quitement. Requis combien eus peuent valoir par an, dit par son serement 40 l. Requis comment il le set, dit pour cen qu'il est et a esté monnier as moulins le roi depuis que il se sut cognoistre et apres et recheu la moulte des 2 moultiers dessus dis qui sunt boulengiers, et de chen prent le prieur de Beaumont proufit de chen qu'il a la disiezme semeinne des moulins le roi. Requis sus les autres 17 moultiers dit qu'il sont moultiers des moulins le roi et du moulin Ricart de Preaux et du moulin au prieur dessus di et peuent aler auquel moulin que il leur plest sans contrainte de la gent le roi ne de nul autre. Requis quel proufit l'en peut avoir es moultes des 17 moultiers dessus dis, dit que la moulte de chacun d'iceus vault bien 15 s. chascun an, et est ainsi que la moulte de ches 17 moultiers vaut bien 12 l. 15 s.t. par an. Requis comment il le set, dit pour cen qu'il a esté monnier des moulins le roi depuis que il se sut cognoistre et a recheu les moultes des moultiers dessus dis. Requis quel proufit ou quel domage le roi nostre sire aroit s'il fesoit de chez 3 fiez un fié, dit qu'il ne set pour cen que en fié du Pin il n'i a nul homme resseant et est tout en bois et en terres et de tant comme moute au fié de Groolei les resseans sont moultiers du moulin d'eaue seant en fié de Groelei qui est au seigneur de Groolei. Requis se plus en set, dit que non.

Crespin le monnier, de l'aage de chinquante ans ou environ, tesmong juré et requis sus les choses dessus dites, l'acorde et depose partout et en toutes choses aussi comme le tesmong dessus dit. Requis comment il le set, dit pour cen qu'il est et a esté monnier des moulins le roi depuis que il se sut cognoistre et a recheu les moultes des hommes dessusdis. Requis se plus en set, dit que non.

Johan Bouchel, de l'aage de chinquante ans ou environ, id.

Adan Morel, de l'aage de 40 ans ou environ, tesmong juré et requis sus lesdites choses, dit et s'acorde et depose par tout et en toutes choses comme le tesmongn dessus dit. Requis comment il le set, dit pour cen qu'il est boulenger et de tele condicion comme les moultiers dessus dis. Et dit que il donrroit voulentiers chascun an 30 l. Tournois qui le quiteroit de sa moulte de tout l'an. Requis se plus en set, dit que non.

Ricart Le Telier, de l'aage de chinquante chinc ans ou environ, id.

Pierre Tournart de l'aage de 60 ans ou environ

Richier Barquet de l'aage de 40 ans ou environ

Raoul de Portes de l'aage de 60 ans ou environ

Ricart Hebert de l'aage de 60 ans ou environ

Michel Boenne de l'aage de 40 ans ou environ

Pierre Boenne de l'aage de 30 ans ou environ

Michel de la Fosse de l'aage de 40 ans ou environ, tesmoins jurez et requis singulierement chascun par soi sus lesdites choses dient par leurs seremens que des 19 moultiers dessus dis qui sunt du fié du Val Mennier, la moulte des 2 boulengiers qui sunt moultiers le roi vaut bien chascun an, bon an mal an, 50 livres tournois. Requis comment eus le sevent, dient pour cen que eus ont pris garde que la moulte de ces deux vault bien chascune semeinne deus mines de blé et 8 boissiaus de farine, et einsi est il trouvé que leur moulte vaut bien chascun an 26 sextiers de blé et 8 sextiers de ferine qui bien valent et peuent valleir 50 l. chascun an. Item des 17 moultiers dessus dis qui sunt moultiers as moulins le roi et au moulin Ricart de Preaux et au moulin au prieur de Beaumont, qui peuent aler moudre auquel moulin que il leur plest et de coi ledit prieur a la disiezme semeinne. Les tesmoins dessus dis dient que la moulte des 17 moultiers dessus dis vault bien, bon an mal an, 15 l.t. chascun an. Requis comment eus le sevent, dient pour cen que a estimacion commune des moultiers des moulins de Beaumont eus ont pris garde que la moulte des 17 moultiers dessus dis poet bien valoir chascun an les 15 l. dessus dis. Requis se plus en sevent, dient que non, fors que du fié Dupin il n'i a nul homme resseant et est tout en bois et en terres. Et de tant comme moute au fié de Groolai les resseans sunt moultiers du moulin a eaue seant en fié de Groolei qui est au segnieur de Groelei. Requis se plus en sevent, dient que non.

Item de tant comme moute a l'escange fet entre mons. Robert de Harecourt et ledit mons. Jehan de Gaillon l'on n'i trouve nul domage pour le roi, fors que tant que le segnieur de Groolei baille treis ostes au segnieur de Biaumesnil, qui li font 48 s. 11 d.ob. de rente par an. Et ledit segnieur de Biaumesnil en baille 14 resseans audit mons. Johan qui ont tousjours esté moultiers as moulins le roi et au moulin Ricart de Preaux et au moulin au prieur de Beaumont, et si l'escange estoit confermé entr'eus iches 14 moultiers qui sunt resseans en fié de Groolei devroient estre baniers au moulin dudit mons. Jehan s'il n'estoient retenus par point de lettre. Et1 a chen fere nous avon apelé le prieur de Beaumont et les heires Ricart de Preaux pour .

Et a cheu fere furent apelez le prieur de Beaumont et les heirs Ricart de Preaux pour tant comme il leur touche pour reson de leurs deus moulins et debatent quanque en a esté fet et ne s'i acorderent en nulle maniere, que l'escange fust fet que les 14 moultiers ne demourassent moultiers au moulins le roi et a leurs moulins. Et de tant comme moute as treis fiez dessus dis, eus ne s'acorderoient jamez que l'en en feist un fié se les 17 moultiers du Val Mennier ne demouroient moultiers as moulins le roi et a leurs moulins si comme il l'ont esté eu temps passé.

Ph. Dei gratia Francorum rex .. ballivo Rothomagensi salutem. Mandamus tibi quatenus te diligenter informes quod dampnum vel quod commodum esset nobis vel aliis quibuscumque si de tribus feodis, videlicet si quartum menbri lorice vocatum Le Vau Menier et unum quartum appellatum Le Pin cum uno alio tertio quod dicitur Grolay unum feodum faceremus ipsa insimul conjungendo et quod dampnum vel quod commodum haberemus vel quicumque alii haberent si quoddam escambium quod Johannes de Gaillon et Robertus de Haricuria, milites, invicem inter eos fecisse dicuntur, ratificaremus et approbaremus similiter, te diligenter informes et informationes quas inde feceris, nobis celeriter referas vel sub tuo sigillo fideliter remittas.

Actum apud Longum Campum XXVII^a die augusti, anno Domini M^oCCC^o sexto.