Pro comite Forensi super restitucione castri de Tyherno sibi facta.

Ph. Dei gratia Francorum rex universis presentes litteras inspecturis salutem. Notum fecimus quod cum dudum nos totum feodum nostrum castri de Thierno cum ipsius (sic) cum ipsis juribus et pertinenciis universis dilecto et fideli nostro Johanni, comiti Forensi, de speciali gratia donassemus, prout per nostras patentes litteras sub sigillo nostro et cera viridi super ipsa donacione confectas dicebat liquidius apparere, ac postmodum proprietatem dicti castri, jurium et pertinenciarum ejusdem a Guillelmo de Tiherno, tunc ipsius [v^o] castri domino, acquisivisse dicatur legitime dicti castri jurium et pertinenciarum ipsius possessio vacua sibi tradita per ipsum fuisse dicatur, et eadem gaudere pacifice et quiete, et gentes nostre et procurator noster Arvernie nostro nomine et pro nobis sub possessione dicti castri, jurium et pertinenciarum ejusdem, dictum comitem multipliciter, ut asserit, perturbassent, asserentes ad nos certis ex causis dictum castrum et possessionem ipsius, jurium et pertinenciarum ipsius non ad dictum comitem pertinere, nosque ad custodiam dicti castri deputassemus Berengarium Cap de Porc, servientem armorum, qui jam dictum castrum tenuit longo tempore pro nobis in dampnum dicti comitis, ut asserit et jatturam, propter quod nobis humiliter supplicavit quod nos possessionem dicti castri, jurium et pertinenciarum ejusdem ei vellemus restituere de gratia speciali, et super jure proprietatis quod in dicto castro asserit se habere per legitimos et probos viros nostri consilii de plano sciri facere veritatem et quod pro nobis honestum vel utile dictis nostris conciliariis videretur paratus erat adimplere in omnibus cum effectu. Nos igitur tocius dissensionis materiam que super possessione dicti castri de Tyherno inter gentes nostras pro nobis et dictum comitem, salvis hiis que ad declarationem juris nostri in proprietate facere possunt amputare volentes et dicto comiti gratiam facere specialem ; possessionem dicti castri de Tyherno, jurium et pertinenciarum ipsius quorumcumque et omnium aliarum terrarum et possessionum quarumlibet que occasione hujusmodi ad manum nostram quomodolibet tenebantur, sibi restituimus plenarie per presentis ac omni impedimento inde sublato ipsum restitui precepimus cum effectu ; ita tamen quod de expresso consensu dicti comitis nobis hoc humiliter supplicantis est actum, et inter gentes nostras et ipsum comitem expresse conventum quod per dilectos et fideles nostros Milonem d. de Noeriis et Johannem de Gressibus, marescallum Francie, milites, ad partes ipsas propter hoc specialiter transmittendos super jure proprietatis quod dictus comes in dicto castro, juribus et pertinenciis ipsius asserit se habere, et nostro diligenter inquiretur et si ad ipsum comitem jus proprietatis ipsius castri, jurium et pertinenciarum ejusdem, invenerint legitime pertinere, tunc in casu isto, si dictum castrum viderint nobis utile vel necessarium pro deffensione, comodo seu fideli custodia regni nostri, dicti Milo et Johannes, auctoritate sibi a nobis, dicto comite hoc supplicante, concessa, permutacionis titulo legitimam recompensacionem extra terram, feoda et retrofeoda dicti comitis de terra nostra in equivalenti valore ac equalitate decenti reddituum, jurium, honoris, dominii et juridictionis omnimode, hiis modis consideratis omnibus, cum nostro minori incomodo et cum ipsius comitis utilitate decenti facere poterunt et debebunt et dicto comiti et suis pleno jure perpetuo assignare ac mandamenta ipsius castri de Tyherno et territorium ipsius certis limitationibus designare metas certas et indubitatas super hiis apponendo, ita quod futuris temporibus briga vel dissensio in posterum nullatenus super ipsis limitationibus habeatur et licet prenominati M. et J. possint premissa omnia et singula facere et auctoritate sibi concessa ut premittitur ordinare, verumptamen inquestam seu informacionem et ordinacionem predictas, quas super premissis fecerint non poterunt nec debebunt aliquo modo publicare nec alias obtinebunt aliquam roboris [fol. 63] firmitatem nisi tunc demum non ante cum de karissimi germani et fidelis nostri K. comitis Valesie, vocato secum dilecto et fideli Ingerranno, d. Marigniaci ; milite et cambellano nostro, ratifficatione, ordinacione, voluntate speciali processit et assensu. Actum est insuper et inter gentes nostras et dictum comitem expresse conventum quod in casu in quo dicti M. et J., de consensu, voluntate et ordinacione expressis dictorum Karoli et Ingerranni ordinarent dictum castrum de Tyherno cum suis juribus et pertinenciis universis perpetuis temporibus dicto comiti et suis successoribus tanquam proprium remanendum, quod dictus comes et sui successores dictum castrum cum suis juribus et pertinenciis universis in feodum ligium jurabile et reddibile pro libito voluntatis nostre et successorum nostrorum Franc. regum a nobis et eisdem successoribus nostris tenebunt. Preterea dictus comes et successores sui castrum suum de Cerveria, quod in francum allodium asserit se tenere, cum juribus et pertinenciis ipsius omnibus, a nobis et successoribus nostris regibus Francie in feodum tenebunt. Si vera aliqua castra vel fortalicia habeat alia dictus comes, sive jure suo proprio, sive racione dotis uxoris sue, que dicti M. et J. cognoverint nobis et defensioni regni nostri neccessaria, ea pro nobis et successoribus nostris Franc. regibus dicti M. et J., de consensu, ordinacione et voluntate dictorum Karoli et Ingerranni pro legitima recompensacione et valore simili de terra nostra extra feoda et retrofeoda dicti comitis eidem comiti facienda debite poterunt retinere, et est nobis per dictum comitem solempni stipulacione promissum quod si aliqui cujuscumque status, sexus vel condicionis existant qui racione dicti castri vel alias seu ex causa donacionis, cessionis vel obligacionis cujuslibet super dicto castro nobis factarum quoquo modo, aliquid a nobis vel successoribus nostris peterent seu jus contra nos dicerent competere, quoquo casu dictus comes nos et successores nostros tenetur defendere et in se onus litis suscipere ac nos indempnes servare, inde obligans omnia bona sua in casu in quo ipsum castrum de Tyherno penes ipsum comitem remaneret, mandabimus etiam per nostras alias litteras ballivo Matisconensi impedimentum quodcumque per ipsum in terra dicti comitis vel alibi in terra quam dicto Guillelmo de Tyherno tradidisse dicitur racione permutacionis dicti castri de Tyherno quam cum predicto Guillelmo, tunc d. castri Tyherni, dicitur iniisse, nisi alia de causa appositum fuit amoveri. In cujus rei testimonium presentibus litteris nostrum fecimus apponi sigillum. Actum Pissiaci die martis post Pascha, anno Domini M^o CCC^o decimo.