« bullarium-franciscanum-4286 »

Episcopo sancti Andreae.a

Ex gravi dilectorum filiorum ‥ gardianorum et conventuum fratrum Minorum de Berwico et Rexburgen.b tuae sancti Andreae et Glascuensisc diocesium, conquestione nuper accepimus, quod Adam Hanupli, Thomas de Irwy et Adam de Adington, qui olim dictum professi fuerunt ordinem in eo diutius commorando, ad suggestionem et instigationem Guilelmi de Dalgernot abbatis et conventus monasterii de Kelton ordinis sancti Benedicti tuae dioecesis ab eodem Minorum apostatantes ordine seque ad nefanda et illumd diabolico exagitati spiritu convertentes de ecclesiis et domibus dictorum gardianorum et conventuum biblias et libros alios, calices, ornamenta et res alias sacras manibus ceperunt sacrilegis et secum nequiter asportarunt, nonnulla ex eis ad supradictum monasterium deferendo et custodienda tam memorato abbati quam quibusdam praedicti monasterii monachis assignando, in divinae maiestatis offensam et eorumdem gardianorum et conventuum praeiudicium non modicum et gravamen. Cum itaque praedicti gardiani et conventus nobis fecerint humiliter supplicari, ut providere sibi super hoc de opportuno remedio dignaremur, nos nolentes eis in iustitia deficere, in qua sumus omnibus debitores, fraternitati tuae per apostolica scripta mandamus, quatinus super praedictis et ea tangentibus (summarie, de plano ac sine strepitu et figura iudicii, vocatis evocandis) veritatem inquirens ea, quae per dictos Adam et Thomam ac Adam vel eorum complices de ecclesiis et domibus fratrum Minorum praedictorum extracta et asportata repereris, ut praefertur, eis restitui facias indilate: ad hoc eosdem Thomam, Adam et Adam, necnon abbatem et monachos praelibatos ac alios, penes quos res praedictas esse cognoveris, auctoritate nostra appellatione postposita compellendo et excessus praedictos mediante iustitia corrigendo; non obstantibus etc. Ceterum nostrae intentionis existit, quod propter hoc exemptionis aliisque dicti monasterii privilegiis super ceteris nullatenus derogetur. Datum [Avinione], VI idus iunii, anno sextodecimo.