« bullarium-franciscanum-4287 »

Guillelmo Astre electo Apten.

Supremae dignitatis fastigio licet immeriti praesidentes etc. Nuper siquidem vacante Aptensia ecclesia (pro eo quod nos dilectum filium Bertrandum Bononiensem tunc Aptensem electum, licet absentem, a vinculo, quo ipsi Apten. ecclesiae, cui praeerat, tunc tenebatur, de fratrum nostrorum consilio et apostolicae potestatis plenitudine absolventes, ipsum ad Bononien. ecclesiam tunc vacantem duximus transferendum, praeficiendo eum dictae Bononiensi ecclesiae in episcopum et pastorem) nos volentes eidem Aptensi ecclesiae, ne dispendia prolixae vacationis incurreret, paterna sollicitudine praecavere, cum nullus praeter nos hac vice de ipsius Apten. ecclesiae ordinatione se intromittere possit etc., et ad provisionem ipsius Apten. ecclesiae celerem et felicem sollicitis studiis intendentes etc. demum ad te ordinis fratrum Minorum professorem, haereticae pravitatis inquisitorem in certis partibus auctoritate apostolica deputatum, in sacerdotio constitutum, cui religionis zelum, litterarum scientiam, honestatem morum et vitae munditiam, prudentiam spiritualium ac temporalium providentiam ex claris fide dignis testimoniis suffragari percepimus, direximus oculos nostrae mentis. Quibus omnibus attenta meditatione discussis, de persona tua, nobis et eisdem fratribus nostris ob huiusmodi tuorum exigentiam meritorum accepta, praefatae Apten. ecclesiae de fratrum praefatorum consilio auctoritate apostolica providemus teque illi praeficimus in episcopum et pastorem, curam et administrationem ipsius Apten. ecclesiae tibi tam in spiritualibus quam in temporalibus plenarie committendo etc. Datum Avinione, II idus iunii, anno sextodecimo.b