« bullarium-franciscanum-4204 »

Dilectis filiis cappellae ducis Burgundiae de Divione Lingonen. dioc. et Cabilonen. decanis ac cantori Bisuntin. ecclesiarum.

Militanti ecclesiae etc. Sane dilectae in Christo filiae nobilis mulieris Margaretae dominae de sancta Cruce Lugdunen. diocesis petitio nobis exhibita continebat, quod ipsa ... quoddam monasterium sororum ordinis sanctae Clarae in fundo proprio iuxta civitatem Cabilonen. ... fundavit de bonis propriis et eidem dotem in bonis suis in imperio consistentibus congruam assignavit ...; quodque ipsa nobilis dubitat, ne praefato monasterio, cui nondum est de abbatissa provisum, in locis, terris, possessionibus, censibus, redditibus, proventibus, iuribus, iurisdictionibus et aliis bonis assignatis eidem seu ad illud spectantibus a nonnullis illarum et aliarum partium vicinarum, qui nomen Domini in vacuum recipere non formidant, inferantur iniuriae, molestiae, violentiae aut iacturae, seu loca, terrae, possessiones, census, redditus et proventus, iura, iurisdictiones et alia bona huiusmodi occupentur et occupata indebite teneantur. Quare praefata nobilis nobis humiliter supplicavit, ut abbatissae, quae erit pro tempore, et dilectis in Christo filiabus conventui dicti monasterii, quibus redderetur difficile pro singulis querelis ad sedem apostolicam habere recursum, adversus praesumptores, molestatores et iniuriatores quoslibet super praemissis efficacis defensionis praesidio assistere dignaremur. Nos igitur adversus occupatores, praesumptores, molestatores ac iniuriatores huiusmodi illo volentes eisdem abbatissae et conventui remedio subvenire, per quod ipsorum compescatur temeritas et aliis aditus committendi similia praecludatur, discretioni vestrae per apostolica scripta mandamus, quatenus vos vel duo aut unus vestrum per vos vel alium seu alios, etiam sint extra loca, in quibus deputati estis conservatores et iudices, praefatis abbatissae et conventui efficacis defensionis praesidio assistentes non permittatis easdem super his et quibuslibet aliis bonis et iuribus ad abbatissam et conventum praedictum spectantibus ab eisdem vel quibuscumque aliis indebite molestari vel eis gravamina seu damna aut iniurias irrogari: facturi dictis abbatissae, quae erit pro tempore, ac conventui, cum ab eis vel procuratoribus suis vel eorum aliquo fueritis requisiti, de quibuscumque molestiis, iniuriis aut damnis praesentibus et futuris (in illis videlicet, quae iudicialem requirunt indaginem, summarie et de plano, sine strepitu et figura iudicii, in aliis vero, prout qualitas ipsorum exegerit) iustitiae complementum, occupatores seu detentores, molestatores, praesumptores et iniuriatores huiusmodi nec non contradictores quoslibet et rebelles, cuiuscumque dignitatis, status, ordinis vel conditionis extiterint, quandocumque et quotiescumque expedierit, auctoritate nostra per censuram ecclesiasticam, appellatione postposita, compescendo, invocato ad hoc, si opus fuerit, auxilio brachii saecularis. Non obstantibus etc. Datum ut supra.