« bullarium-franciscanum-4205 »

Universis Christifidelibus.

Inter universa opera etc. Cum itaque dilecta in Christo filia nobilis mulier Margareta domina de sancta Cruce Lugdunen. diocesis quoddam monasterium sororum ordinis sanctae Clarae in fundo proprio iuxta civitatem Cabilonen., videlicet in loco vocato sancta Maria de Cabilone, ex licentia apostolica, sicut asserit, de bonis propriis noviter fundaverit pariter et dotaverit ac in eo collocaverit decentem numerum sororum ordinis antedicti: nos cupientes, ut erga dictum monasterium fidelium devotio augeatur ac ipsius ecclesia per Christi fideles spiritualibus allectos muneribus frequentetur, de omnipotentis Dei misericordia et beatorum Petri et Pauli apostolorum eius auctoritate confisi, omnibus vere poenitentibus et confessis, qui ecclesiam dicti monasterii in singulis beatae Mariae Virginis ac beati Francisci et sanctae Clarae praedictae festivitatibus venerabiliter visitaverint annuatim, sexaginta dies de iniunctis eis poenitentiis misericorditer relaxamus. Datum ut supra.