« bullarium-franciscanum-3095 »

BONIFACIUS &c.

Dilecto filio ... Guardiano Fratrum Minorum Lucan.a Salutem, & Apostolicam Benedictionem.

Pridem in nostra præsentia constitutus Venerabilis Frater nosterb ... Lunen.c Episcopus Nobis exposuit, quòd dilecti fili ... Potestas ‥ Capitaneus, Syndicus, Antiani, Priores, Consilium, & Commune Lucan. finibus propriis non contenti in Terris, Castris, Villis, & Locis aliis, in quibus idem Episcopus, & Lunen. Ecclesia dominium obtinent temporale, sibi jurisdictionem contra justitiam usurpantes, Vicarios, Judices, & Notarios generales in Terris, Castris, Villis, & Locis prædictis, necnon Rectores seu Potestates hactenus ponere præsumpserunt, qui jurisdictionem temporalem exercebant ibidem, spretis inhibitionibus, & mandatis dudum per nonnullos prædecessores nostros Romanos Pontifices super hoc sub excommunicationis, & interdicti pœnis spiritualiter illis factis in contemptum Apostolicæ Sedis, & Episcopi, & Ecclesiæ prædictorum grave præjudicium, & jacturam. Præterea Castrum Ponzani cum pertinentiis suis ad Episcopum, & Ecclesiam prædictos pertinens, in cujus possessione pacifica dictus existebat Episcopus, hostiliter invadentes eosdem Episcopum, & Ecclesiam, possessione prædicta, & jurisdictione, quas in ipsis habebant indebite spoliatis. Quare præfatus Episcopus Nobis humiliter supplicavit, ut cum præmissa forent adeo notoria, quòd nulla possent tergiversatione celari, suis, & Ecclesiæ prædictæ dispendiis gravibus, & dispendiosis gravaminibus, quibus præfata subjacebat Ecclesia, per salutaris provisionis remedium dignaremur celeriter providere. Unde ne prædicta Ecclesia præmissorum occasione irreparabile incurreret detrimentum, Nos super præmissis tam ex clamoribus plurimis, quàm ex causis aliis evidentibus hactenus informati, volentes in hac parte opportunum remedium adhibere, dilecto filio Magistro Alberto de Grundula Canonico Veronen. per nostras sub certa forma dedimus litteras in mandatis, ut eos monere, ac inducere procuraret, ut infra quindecim dies a suæ monitionis tempore continue numerandos Castrum, & alias Terras, & Loca prædicta, amotis omnino exinde hujusmodi Vicario, Judice, Notario, Rectoribus, & aliis Officialibus quibuscumque, integre restituere, & Episcopo prælibato dimittere, ac de damnis illatis competenter eidem satisfacere curarent, nullam eisdem Episcopo, & Ecclesiæ super jurisdictione locorum prædictorum, vel aliis bonis suis per eosdem, vel alios quovis modo molestiam illaturi; non obstantibus quibusvis pactionibus, promissionibus, & obligationibus, quas ab eodem Episcopo præter Apostolicæ Sedis licentiam dicerentur extorsisse, quasque, si factæ fuerint, in præjudicium Lunen. Ecclesiæ non est dubium redundare. Quòd si fortè illi infra prædictum tempus monitioni ejusdem Canonici contemnerent forsitan obedire, ipse ex tunc illos ad id, appellatione postposita, per censuram Ecclesiasticam auctoritate nostra compellere procuraret, non obstante, si eisdem a prædicta Sede indultum existeret communiter, vel divisim, quòd interdici, vel excommunicari aliquatenus non possint per litteras dictæ Sedis non facientes plenam, & expressam de indulto hujusmodi mentionem, contradictores per censuram Ecclesiasticam appellatione postposita compescendo. Si verò in prædictis Castro, Terris, & Locis contenderent aliquod jus habere, amotis exinde Vicario, & Officialibus antedictis eidem Episcopo restitutione plenaria priùs facta, præfatus Canonicus eos ex parte nostra peremptorie citare curaret, ut infra unum mensem post citationem ipsius per eosdem, vel per Procuratorem idoneum cum omnibus actis, juribus, & munimentis suis coram Nobis comparere curarent omnino, facturi, & recepturi super hoc, quod ordo exigeret rationis. Verùm quia illi ab eodem Canonico canonice moniti hujusmodi mandatis nostris parere contumaciter non curarunt, dictus Canonicus in supradictos Potestatem, Capitaneum, Syndicum, Antianos, Priores, Consiliarios, & singulos Communis Lucan. excommunicationis sententiam promulgavit, & Civitatem antedictam Ecclesiastico interdicto subjecit, justitia exigente. Cum autem ipsi ad saniora consilia referentes mandatis in hac parte nostris, sicut pleniùs Nobis constat, curaverint efficaciter obedire, Nobis humili, & devota instantia supplicarunt, ut providere super hoc illis de Apostolicæ benignitatis clementia dignaremur. Nos itaque more pii Patris, quem non prætereunt incommoda filiorum, benigne volentes statui animarum suarum super hoc salubriter providere, eorumdem supplicationibus inclinati, omnes interdicti sententias per eumdem Canonicum occasione hujusmodi in illos, & Civitatem Lucan. prolatas auctoritate Apostolica relaxamus. Quocirca discretioni tuæ per Apostolica scripta mandamus, quatenus præfatis Potestati ‥ Capitaneo .... Syndico, Antianis, Prioribus, Consilio, & singulis ejusdem Civitatis juxta formam Ecclesiæ auctoritate nostra beneficium absolutionis impendas, injuncto eis, quod propter hoc de jure fuerit injungendum. Ita tamen, quòd si ipsi, vel successores eorum ulteriùs contra Episcopum Lunen. Ecclesiam, Castra, & Loca prædicta talia attentare præsumpserint, ipso facto pristinam sententiam excommunicationis incurrant. Non obstante indulgentia, si qua tibi vel Ordini tuo a Sede Apostolica sit concessa, quòd non tenearis &c. Datum Anagniæ X. Kalendas Julii, Pontificatus nostri Anno Secundo.